Read Kono GBOO IBU MƆƐ N KO A 2 Bible Online

GBOO IBU MƆƐ N KO A 2 - Kono bible

GBOO IBU MƆƐ N KO A 2

¹Chɛ an fɛ mu, mmɔ‑a tea bai chɛ min na min, mmɔ a bia mmɔ boo fea a, mmɔ ma na ka an chia chɛ ma.

²Koe min na mu, Yataa na‑a sawa min na ben suun maeka n na, mɔɛ n na‑a a ɔ yen fan, mbɛ tea mu. A sin, ni mɔ ɔ mɔ na‑a a yɔn, chɛ ma, a ni ko yama ma, a ni tɔɔya an dɔ bia.

³Chɛ mu ka buɛ min dɔ tea a, mmɔ ee kun mmɔ kunɛ ni bɔ tɔɔya ɔ, ni mmɔ‑a mmɔ too ka bauncha wa chɛ ma, Yataa na‑a min chɛ mmɔ a. Mansa Chisɔsi wandi gbu, an na‑a a ɔ yian, Yataa na‑a mmɔ baun chia min na. Mbɛ mɔɛ chɛ n bɛɛ, miin na‑a a da a kuiɛ chɛ a min, an na‑a toa si wan a kɔɔ mmɔ tena.

⁴Yataa wandi wɛɛ, a na‑a a ɔ yian fan, mbɛ tea mu sakana bai chɛ a. A na‑a chɛ ma kamaya koe sɛsɛ n fan dɔ. A yɛ to, a ni a ma wan to, a Nyina ni mɔɛ n dua chia sɛsɛ n na. Ni Yataa wandi toen ni chɛ ni ma, tima ɔ tima ko a, a ni ma wan.

⁵Koe min na mu, dunya chɛ min mbe ya ɔ ma, Yataa nii ma a fɔ ni, mbɛ maeka n fan mbe a kun ma. A sin, nn mbe ka koɔ tena, a si an dunya chɛ an ma.

⁶Yataa 'a gboo kaka dɔndɔ ɔ, a ɛ ka wan, a ɔ, “Mansa Yataa, mɔ gbu ma fen kɔ fen na. Fen mu i‑a i yii na chii a a? Fen mu i gbɔsɔen mu a ko a?[1]

⁷I na‑a a ma wan, i‑a a don maeka n 'na gbasaya kɔɔ, tima ɛnden ko a dechee. Chɛɛ i yɛ‑a wan, i‑a a ma mansa a, tando ɛ min ma, a basan basɔmaya a.

⁸A sin, i‑a gbasaya be wan a ma, fen kɔ fen kun ma dunya ɔ.” Yataa‑a gbasaya sin be kɛn a ma, fen kɔ fen kun ma, Yataa wɛɛ‑a fen kɔ fen don fan a 'a gbasaya kɔɔ. Chɛɛ koe n mbe buɛ min dɔ, mmɔ ma a ɔ yen nin bɛ, fen kɔ fen dondenɛ ni ma a kɔɔ.

⁹Chɛɛ mmɔ‑a a ɔ sɔn fan Chisɔsi ɛ gbɛ buɛ min dɔ. Tima ɛnden ko a, Yataa na‑a a don fan maeka n 'na gbasaya kɔɔ. A na‑a a ma wan mansa a, tando ɛ min ma, a basan basɔmaya a. Chɛ ma‑a, a mu min na, a na‑a tɔɔ wan saya ɔ. Chɛ ko a, Yataa 'a koadia demanɛ ni a ma, a ni saya ɔ yen mɔɛ gbɛɛ ko a.

¹⁰Yataa an na‑a fen kɔ fen na dan, a sin fan mbe fɔɛ be fen kɔ fen ma. A na‑a a ma wan, mɔ sɛsɛ ma‑a a 'a denɛ n na, mbɛ an don‑da a waa banda bu ɔ. A ni chɛ ma tena tima min na, a na‑a a yii na chii wan, mbɛ a nyin Chisɔsi ni ma mɔɛ n baun mɔɛ chɛndɛ a. Chɛ ni bɔ tɔɔya chɛ ɔ, a wan Chisɔsi ni na tena min dɔ bia‑a. A wan mbe chia a ka‑a, mɔ gbu n gbɛɛ ni bauncha ma sɔn.

¹¹Koe min na mu, Chisɔsi ni ma, ni mɔɛ chɛ nu, a 'a gbasaya ɛ a ma, miin mbe ma tenchen Yataa ko a, an fa ɛ dɔndɔ gbe. Chɛ an fɛ mu, Chisɔsi ee mau an chee koe a, a suun ma nyɔɛ n na.

¹²A ɛ a fɔ wan, a ɔ, “Yataa, n mbe i tɔɛ bai‑a wan n suun ma nyɔɛ n tena. I 'a mɔɛ n tɛ ɔ, n mbe i tando‑a wan.”

¹³A yɛ to, Chisɔsi ɔ, “N mbe n kai fa‑a wan Yataa a.” A sin to, a ɔ, “N yen ko nɛ, nn bɛ a 'a denɛ n na, Yataa‑a miin be n ma.”

¹⁴Chɛ an fɛ mu gbɛ, den chɛ nu, mɔ gbu gbama gbama mu an na. An fɛ mu, a wandi wɛɛ, a na‑a ma wan to mɔ gbu a, min mbe a ma, a ni fa. A 'a saya chɛ sin mbe a ma‑a wan, a ni Sitana kasaa, gbasaya ɛ ka min boo ɔ saya ko a.

¹⁵Mbɛ mɔɛ chɛ n gbɛɛ, miin ni yɔncha ɔ, an 'na fɔɛ gbɛɛ ko a, saya ma chianɛ fɛ, a‑a an kun bɔ a ɔ.

¹⁶Koe min na mu, tea gbu ko a, a gbɔsɔen mu chɛ n fan ko a, miin mu Ebeami cheeya n na. A ma a gbɔsɔ ni maeka n fan ko a.

¹⁷Chɛ an na‑a a ma, a na‑a ma wan mɔ gbu a, chia ɔ chia a, yɔ Yataa‑a a suun ma nyɔɛ n na dan buɛ min dɔ. Chɛ ni a ma, a ni chinchincha yian. A yɛ to, a ni ma tɛ mɔ wa a, mɔ gbu n tɛ Yataa a, min danayaen mu Yataa 'a wai ɔ. A ni a ma, Yataa ni a boo bɔ mɔɛ n 'na ko yama n dɔ.

¹⁸Koe min na mu, a wandi gbu wɛɛ, Sitana na‑a a yiima yan fan, ko yama ma koe a. A sin, a tɔɔya‑a wan. Chɛ ko a, ɛ che wan, a ni mɔɛ n deman, Sitana ɛ miin yiima yan‑da, ko yama ma koe a.