Read Kono GBOO IBU MƆƐ N KO A 8 Bible Online

GBOO IBU MƆƐ N KO A 8 - Kono bible

GBOO IBU MƆƐ N KO A 8

¹Nn mbe bai min gbu fɔ tena, an nɛ. Tɛ mɔ wa min mbe mmɔ tɛ Yataa a, a koo sai ma. Ɛ wan si ɔ kaina ma bɛndenɛ, Mansa Yataa 'a mansaya sea boo nyima ɔ, pan banda bu ɔ.

²A saa a, mɔɛ chɛ nu miin ni mɔɛ n tɛ Yataa a, an ni wai chɛ tɛndi an kɔɔ. A tɛndi chɛ sin, an ni yasi bɔ kaina min, mɔɛ n 'na ko yama n ko a, mɔ gbu an na‑a a sɔ. Chɛɛ Chisɔsi tana, ɛ wai chɛ Yataa 'a tɛndi an kɔɔ, banda bu ɔ, kaina min mbe tenchen Yataa ko a. An kaina chɛ sin, Mansa Yataa an‑na a sɔ, mɔ gbu ma.

³Koe min na mu, mɔ ɔ mɔ kan kɔ kan, min mu tɛ mɔ wa a, mɔ gbu n tɛ Yataa a, a yianden mu yasi bɔ koe an na, a basan boo fen be koe a Yataa ma. Chɛ an fɛ mu, a nyin an tɛ mɔ wa chɛ wɛɛ ko a, fenɛ ni ma a boo ɔ, a be koe a Yataa ma.

⁴Sanche gbɛ, ni a ni dunya chɛ ɔ wan, a nii ma‑a mɔɛ n tɛ Yataa a, ɛnden bɛɛ a. Koe min na mu, mɔɛ n mbe wan nɔ mɔɛ n tɛ Yataa a, miin mbe boo fenɛ n be Yataa ma, sawa ta fɛ chia a.

⁵An mbe wai min chɛ Yataa 'a tɛndi kɔɔ, a ɛ wan dechee yɔ koe miin mbe ma banda bu ɔ, an nininɛ gbama, an mbe buɛ min dɔ. Koe min na mu, Mosisi ni tima min na Yataa 'a tɛndi chɛ sɔ‑a, Yataa na‑a koɔ wan a tena, a ɔ, “Fen kɔ fen min sien mu tɛndi chɛ ma, a nyan yɔ i‑a a nyandenɛ yen buɛ min dɔ, Saina kɔnkɔɛ kun ma.”

⁶Chɛɛ koe gbu, ɛ buɛ min dɔ, Chisɔsi 'a wai chɛ, a benden mu an 'na wai kɔma n ma. Ɛ wan dechee, yɔ a 'a dɔbɛn nama chɛ, a benden mu buɛ min dɔ a kɔma ma. Koe min na mu, a 'a dɔbɛn chɛ, a chɛen mu tooɔdia min na, a kɔ gbɛ.

⁷Koe min na mu, ni mabɔ nii dɔbɛnɛ saa chɛ ma, mbɛ dɔbɛnɛ fean bɔɛ nii ma nɔ.

⁸Chɛɛ Yataa na‑a a 'a mɔɛ n ma nyin fan. An fɛ ni, a‑a a fɔ a 'a gboo ɔ, a ɔ, “Tee ɛ bɔ‑a wan, n fan Yataa, n ni a fɔ, n dɔ, n mbe dɔbɛn nama chɛ‑a wan mɔɛ n na, miin ka‑a Isɔɛɛ chɛnyɛ ɔ, an bɛ chɛ n na, miin ka‑a Chuda chɛnyɛ ɔ.

⁹A nɛnɛ ee ma‑a, yɔ dɔbɛn chɛ, n na‑a min chɛ an fa n na. N‑na an bia tee min na, an boo ma, sɔ koe a an ya ɔ, a bɔ Ichipi chɛnyɛ chɛ ɔ, chɛɛ an nii ma an boo a chii ni n 'na dɔbɛnɛ ma. Chɛ sin ko a, n fan, Mansa Yataa, n ma n too kan kɔ kan sɔ ni an ma.

¹⁰Mbɛ dɔbɛnɛ an nɛ, n mbe min chɛ‑a mɔɛ n na, miin ka‑a Isɔɛɛ chɛnyɛ ɔ. N fan Mansa Yataa, ni tee chɛ n ben‑da, n mbe n 'na sawa n sa‑a wan, an yii ma, n ni a sa an faa ɔ. A sin, n mbe ma‑a wan an 'na Yataa a, mbɛ an bɛɛ, an ma‑a n 'na mɔɛ n na.

¹¹An dɔndɔ wɛɛ, an mbe ee an chɛnyɛ nyɔɛ n kan‑da, chɛ ma, an dɔndɔ wɛɛ ni an suun ma nyɔɛ n kan. An ni a fɔ, an dɔ, ‘Wo Mansa Yataa sɔn.’ Koe min na mu, mɔɛ gbɛɛ, an mbe na‑a wan n sɔn‑da, a ka mɔɛ ma, baa sima wɛɛ ee min ma, a ta mɔɛ tena, min mu mɔ chenama wa a.

¹²Koe min na mu, n mbe chinchin‑da an ma, ko yama n ko a. A sin, n mbe ee n yii na chii‑a tun, an 'na ko yama n na.”

¹³Ni a ma‑a bai sa‑a, a si dɔbɛn nama chɛ ma, ɛ a ma wan yɔ a kɔma tana, a kɔkɔya‑a gbɛ. A sin, fenɛ min kɔkɔya‑a, a bun‑da chenancha‑a, a ma bɛndenɛ an nɛ ka gbɛ, tuin koe a.