Read Kono CHIMISI 1 Bible Online

CHIMISI 1 - Kono bible

CHIMISI 1

¹N fan Chimisi, n fan mbe gboo chɛ nyɛn tena. N mbe wai chɛ tena Yataa an ko a, an fea Mansa Chisɔsi Chasi a. N mbe a nyɛn tena wo wan tena, wo wan Yataa 'a mɔɛ nu,[1] wo wɛn na fasandenɛ ɛ a ɔ gbɛɛ ben‑da dunya ɔ. N mbe wo gbɛɛ kɔndɔn tena kaka.

²N suun ma nyɔɛ nu Chasi ɔ, wo bu ɔ ni dia, ni ko yawaen kan kɔ kan‑na wo tan.

³Koe min na mu, wo‑a ɔ sɔn fan, mbɛ ni an koe chɛ n‑na wo tan, a ɔ sɔn koe mu ni wo kai faen fan mu Chisɔsi Chasi a. A sin, ni wo kai faen fan mu a a, mbɛ wo e kun‑da wan an dɔ bia‑a.

⁴Wo 'a faabia ma ni munda, a da ni fa gban. Chɛ ɛ a ma‑a wan, wo ni ma yɔ Yataa toen mu buɛ min dɔ wo ma koe a. A sin, mabɔ kan kɔ kan mbe ee ma‑a wo ma fɔɛ ɔ.

⁵Ni yiimatɛ ee wo ɔ, a ɔ sɔn koe a, Yataa toen mu wo ni ma buɛ min dɔ, wo a ɔ tisa. A ee ban‑da a be koe a wo ma. Koe min na mu, ɛ fen sɛsɛ be wan mɔ gbu ma, a bu ɔ diama ɛ.

⁶Chɛɛ ni wo ma‑a a ɔ tisa‑a, sika ma ma wo ɔ, wo ni wo kai fa a a gban. Ni sika ma‑a mɔɛ min dɔ, a mɔɛ chɛ ɛ wan yɔ yii wa, fia ɛ min dɔ ma ma tangban tangban.

⁷Mɔɛ n fan nɛ, miin mbe ee an yiima ɔ bɛn, a maenɛ ɛ taka taka. Mɔɛ chɛ n sima nu, a ni ma an yii ma, mbɛ Mansa Yataa ee fen kɔ fen be‑a an ma.

⁹Yataa 'a mɔ kan kɔ kan, min mu yɔn tɔɛ a, a bu ɔ ni dia. Koe min na mu, Yataa‑a a ya mansaenɛ a.

¹⁰Yataa 'a mɔ kan kɔ kan, min mu nyan tɔɛ a, a wɛɛ bu ɔ ni dia. Koe min na mu, a 'a nyanɛ ma Yataa ya a fen fen na. Nyan tɔɛ chɛ ɛ ma‑a wan, yɔ kɔn fu. Ɛ bi yen fan, mbɛ sinan a fa‑a.

¹¹Ni tee bɔ‑a, a a kɔɔen ba a, a winɛ ɛ kɔn fu a kɔnya‑a wan, mbɛ a fuu bɔn‑da. A 'a nyanɛ gbɛɛ yayi‑a. Nyan tɔɛ n bɛɛ, an mbe ka wan. An na ɛ kɔnya‑a wan, mbɛ an fa‑a, an 'na nyanɛ gbɛɛ ɔ.

¹²Yataa ɛ mɔɛ chɛ n dua‑a wan, miin mbe an faa bia, ni ko yawaenɛ‑a an tan. Koe min na mu, ni an‑na an koe chɛ ɔ bia, Yataa ɛ boo ɔ gbasi woo min be‑a an ma, ɛ ma‑a kuɔ fɔ fɔɛ an na. Fɔɛ chɛ, a na‑a tooɔdia be koe an na mɔɛ n ma, miin toen mu a a.

¹³Chɛ ni ma wo yii ma, mbɛ mɔ ɔ mɔ ee Yataa ɔ siman, ko yama ma koe a. A sin mbe ee mɔ ɔ mɔ yiima yan, ko yama ma koe a. Mɔ ɔ mɔ, min toen mu a ni ko yama ma, a ma a fɔ kuɔ fɔ, mbɛ Yataa an mbe ka a yiima yan‑da.

¹⁴Chɛɛ mɔ faa ma koe nu, miin ma nyin, an fan mbe mmɔ nande ko yama ma koe a.

¹⁵Mɔ faa ma koe yama chɛ nu, an fan mbe na ko yama n na. Mbɛ ko yama chɛ n sin ko a, a na‑a saya a.

¹⁶N suun ma nyɔɛ nu Chasi ɔ, wo ko a di n ye. Wo ma dɔn mɔ ɔ mɔ ni wo bun.

¹⁷Ko chɛndɛ gbɛɛ, mabɔ ee min ma, ɛ ka Yataa an tena. Manɛ gbɛɛ, miin na dandenɛ ɛ banda bu ɔ, a boo gba mu an na. Ko chɛndɛ kan kɔ kan, mabɔ ee min ma, a wan‑na an be mmɔ ma, a ka banda bu ɔ. A tana, a ee mun kuɔ fɔ. A ee ka yɔ nininɛ, min mbe ka a gba ɔ.

¹⁸Yataa wandi gbu ta dɔbɛn chɛndɛ ɔ mu, a‑a mmɔ ya a ta denɛ n na. Yataa‑a a ma wan, a 'a bai, min mu tea a, a‑a fɔɛ nama be mmɔ ma. Chɛ‑a a ma wan, fen fen a na‑a min na dan, mmɔ wan mu a saa a.

¹⁹N suun ma nyɔɛ nu Chasi ɔ, wo ko a di n ye. A sin, wo chɛ sa wo yii ma. Ni wo too ma sɔ koe mu, wo ma tima yayi a ma sɔ koe a. Chɛɛ wo tima ya koɔ koe a. Wo ni tima ya, faatɛ bɔ koe a.

²⁰Wo e faatɛ min bɔ ka, Yataa toen mu wo ni ma mɔ tandenɛ min na, a ee wo ma‑a a a, tima dɔndɔ wɛɛ ko a.

²¹Chɛ an fɛ mu, wo ni wo boo bɔ ko yama gbɛɛ ɔ wo 'a fɔɛ ɔ. Wo ni wo boo si a 'a sakana bai chɛ kɔɔ, min been mu wo ma. Bai chɛ, a‑a a kun a ma koe a, wo ni bauncha ma sɔn.

²²A sin ni ma wo yii ma, mbɛ sakana bai chɛ ma bea dechee wo too an dɔ, wo ni wo wandi bun. Chɛɛ Yataa 'a bai chɛ‑a min fɔ, wo an ma.

²³Mɔɛ min mbe a too ma sɔ dechee bai chɛ ma, chɛɛ a ee koe ma, a chia ma, ɛ wan yɔ mɛmɛ ɔ fɛn mɔɛ chɛ. Ɛ a wandi ma fɛn tena wan.

²⁴Ɛ a wandi ma fɛn fan, mbɛ a ka‑a nɔ, a ta‑a a ye. A ya kɔɔɛ a, ɛ nyina wan a ni buɛ min dɔ. A gbu gbɔsɔ ma, a ma buɛ ɛ buɛ min dɔ.

²⁵Chɛɛ Yataa 'a sakana bai tana, a nyin kaka. An mbe mɔ gbu kun ka. Mmɔ ma nyina a ma, mmɔ a a tun mmɔ too ma sɔ koe a a ma, mmɔ tachɛ chɛ a gbee a. Yataa ɛ mmɔ dua wan ko ɔ ko ɔ, mmɔ ɛ min ma. Mmɔ ɛ ma‑a mɔɛ n fan na, miin mbe bai chɛ a min, an mbe tachɛ a gbee a.

²⁶Ni mɔ ɔ mɔ‑a a fɔ, mbɛ Yataa sɔn mɔɛ mu a a, a ni a da a kuiɛ kun ma fɛn. Ni a ma chɛ ma ni, ɛ ma‑a ka a wandi an woo a. A ma Yataa sɔn.

²⁷Mmɔ ɛ basan fan chiandenɛ n ma, an bɛ fuinya n na, ni an deman koe bɔ‑a. Mmɔ sin mbe ee a ma, dunya chɛ ɔ ko yama ma ni mmɔ wɛɛ ɔ chɛ. Chɛ an mu fɔɛ chɛndɛ a, mmɔ Fa Yataa toen mu min na, ma bɔ ee min ma.