Read Kono CHIMISI 4 Bible Online

CHIMISI 4 - Kono bible

CHIMISI 4

¹Koe n fan mbe a ma wo ee bɛn, an mbe a ma, koɛ ɛ don wo tɛ. Wo faa ma koe chɛ nu, an fan mbe ma ka wo tɔɔ‑a.

²Wo toen mu fenɛ n na, wo ee che miin ma sɔn‑da. Wo e to wo bɔɛ n boo fenɛ n na yama yama, chɛɛ wo ee an ma sɔn. Wo e koɔ, wo e butuinɛ chɛ. Wo e mɔɛ fa wan, boo fen koe a. Wo ee fen chɛ n gbɛɛ ma sɔn, wo toen mu miin na. Koe min na mu, wo ee Yataa ɔ tisa.

³Chɛɛ wo sin gbu, wo ni Yataa ɔ tisa wɛɛ, wo ee an ma sɔn. Koe min na mu, wo 'a samunɛ ee ma a chia ma. Wo e samunɛ chɛ fen chɛ n fan ko a, wo faa ma koe n dɔ bɛn koe a.

⁴Wo ma danaya ni gba Yataa tena. Wo gbu‑a a ɔ sɔn fan, mbɛ ni dunya chɛ ko a dia‑a wo ye, mbɛ Yataa ɛ ma‑a wan wo chɛɛ ma nyɔɛ a. Chɛ an‑na a fɔ, ni dunya chɛ ma‑a mɔ ɔ mɔ koadia nyɔɛ a, Yataa ma‑a a mɔɛ chɛ chɛɛ ma nyɔɛ a.

⁵Bai min nyɛndenɛ ɛ Yataa 'a gboo ɔ, wo ma a ya bai fuu a. A ɔ, Yataa‑a a Nyina min be mmɔ ma, a ɔ, toomaya an mbe a ɔ, mmɔ ma koe a Yataa ko a.

⁶Chɛɛ Yataa 'a koadia demanɛ koo, min been mu mmɔ ma. Chɛ an fɛ mu, Yataa 'a gboo chɛ‑a a fɔ, a ɔ, “Yataa ma to ni dɔpanda tɔɛ n na, chɛɛ ɛ koadia demanɛ chɛ‑a wan mɔɛ chɛ n na, miin dɔ ma panda ni.”

⁷Chɛ an‑na a fɔ, wo kooya be Yataa ma. Wo ma dɔn Sitana ni kun wo ma. Ni wo‑a chɛ ma, ɛ a bui‑a wan, a ni ka wo fɛ.

⁸Wo gbɛn Yataa ma, mbɛ a wɛɛ, ɛ gbɛn‑da wan wo ma. Wo wo boo a ko, wo wan ko yama ma mɔɛ nu. Wo faa ɔ ni gbɛ, wo wan nɛnɛn fea ti nu.

⁹Wo chinchin wo wandi ma, wo ni sɛmbɛ yɛn chɛ koe a, mbɛ wo‑a di chɛ gbafi gbafi, wo 'a ko yama ko a. Wo wo 'a yɛn chɛ mun di a. Wo 'a buɔdia ni ma faayɔnɛ a.

¹⁰Wo kooya be Mansa Yataa chen kɔɔ, mbɛ a‑a wo a sɛ.

¹¹N suun ma nyɔɛ nu Chasi ɔ, wo ma wo nyɔn ma bɔ. Mɔ ɔ mɔ min mbe a bɔɛ ma bɔ‑a, a ni kaa a tɛ a ma, a mɔɛ chɛ ɛ ma‑a ka sawa chɛ an ma bɔ‑a, Mosisi‑a min be. Ɛ ɛ ma‑a ka kaa a tɛ‑a an sawa chɛ an ma. Ni mɔɛ sin‑na kaa a tɛ sawa chɛ ma, mbɛ a ee ma‑a to a kɔɔ. Koe min na mu, a ban‑da ma‑a kaa a tɛ mɔɛ a sawa gbu ko a.

¹²Mɔ ɔ mɔ ma i a, kaa a tɛ koe a mɔ dɔ mende n ma. Yataa dɔndɔ gbe an‑na sawa be, a sin fan mbe kaa a tɛ. A dɔndɔ gbe an mbe baunɛ chɛ, an mbe kasaa wɛɛ chɛ.

¹³Wo chɛ a min, wo wɛn mbe a fɔ, wo ɔ, wo e na‑a wan ta‑a duu dɔndɔ ɔ, wo ɔ, wo ni ma nɔ san dɔndɔ ko a. Wo ɔ, wo e ma‑a wan nɔ fee fen ma tachɛ‑a, wo ɔ, wo ni kɔpɔɛ sɛmbɛnden ma sɔn. Wo ɔ, ni wo ma ta ni bi, wo ɔ, wo e ta‑a wan sinan.

¹⁴Wo ee kun wo ni chɛ fɔ. Wo gbu ma a ɔ sɔn, fen mbe ma‑a sinan wo a. Wo wo fɔɛ ma fɛn bɛ, ɛ wan dechee yɔ sisi. Ɛ si dechee tima kundu ɛnden fan ko a, mbɛ a gbu ban‑da.

¹⁵Wo e a fɔ wan dechee, mbɛ ni Mansa Yataa dɔn‑da, wo fɔɛ ni ma wo sun da a, mbɛ wo e chɛ an ma‑a sinan.

¹⁶Chɛɛ wo e min ma, wo e yonka an tɛ ben‑da, wo dandenɛ ɛ wo wandi a. Yonka chɛ gbɛɛ ma nyin.

¹⁷A ni ma wo yii ma, ni mɔ‑a a ɔ sɔn, e koe min ma, min nyin, chɛɛ i sin ma an koe chɛ ma ni, ko yama mu a a.