Read Kono 2 PITA 1 Bible Online

2 PITA 1 - Kono bible

2 PITA 1

¹N fan, Saimɔn Pita, n fan mbe gboo chɛ nyɛn tena wo tena. Chisɔsi Chasi 'a wai chɛ mɔɛ mu n na, a 'a sɔ mɔɛ mu to n na. N mbe gboo chɛ nyɛn tena wo wan tena, wo wɛn danden mu Chasi a, yɔ nn mbe buɛ min dɔ. Mmɔ 'a Yataa mu an na, ni mmɔ baun mɔɛ, min‑na mmɔ ya mɔ tandenɛ a Yataa tena.

²Yataa ni wo dua, a ni faachima ma munda wo ɔ. Koe min na mu, wo‑a a sɔn fan. A yɛ to, wo‑a mmɔ 'a mansa Chisɔsi wɛɛ sɔn fan.

³Chasi 'a gbasaya ɔ, fen kɔ fen been fan mu mmɔ ma, min mbe a ma, mmɔ ni ma mɔɛ n na, Yataa wakoe ɛ miin faa ɔ. Chɛ ɛ ma‑a koe min na, mmɔ ma‑a gbɛ Yataa sɔn mɔɛ n na. A wan Yataa an‑na mmɔ chee a tena. A‑a chɛ ma, min mbe a ma, mmɔ wɛɛ ni a 'a gbasaya ɔ daun. A yɛ to, a 'a ko chɛndɛ ma ni ma mmɔ 'a fɔɛ ɔ.

⁴Chɛ an‑na a fɔ, a na‑a mmɔ too ɔ dia wai nyima ma kawaen ba min na, a na‑a a be wan mmɔ ma. An wai nyima chɛ ni a ma, wo kunɛ ni bɔ koe n boo ɔ, wo faa a miin ya kaka, miin mbe na kasaa a dunya chɛ ɔ. Mbɛ mmɔ sɔnɛ ta‑a Yataa ta fɛ.

⁵Chɛ ko a, a nyin wo ni chɛ an ma, chia ɔ chia a. Danaya min mbe wo ɔ, wo a ma munda wo sɔn chɛndɛ a. Mbɛ wo‑a wo sɔn chɛndɛ ma munda yiima a, a si Yataa ma.

⁶A yɛ to, wo wo 'a Yataa yiima ma munda wo tachɛ buɛ n na fɔɛ ɔ. Mbɛ wo‑a faabia sa wo tachɛ buɛ kun ma fɔɛ ɔ. Mbɛ wo yɛ‑a to, wo ma‑a mɔɛ n na, Yataa wakoe ɛ miin faa ɔ kaka.

⁷Chɛ sin to, wo a wɛɛ ma munda bia chɛndɛ a, wo e min chɛ wo nyɔn na. A dankama nɛnɛ an nɛ, wo an ma munda koadia a, wo nyɔn ko a.

⁸Ni sɔn chɛ n ma‑a wo ɔ chɛndɛ chɛ, a ɔ benden ba a, wo e mmɔ 'a mansa Chisɔsi Chasi sɔn‑da wan chɛndɛ chɛ. Chɛ sin mbe na‑a ma‑a ko chɛndɛ an na wo 'a fɔɛ ɔ.

⁹Chɛɛ ni sɔn chɛ n mbe ee mɔɛ min dɔ, a maen fan mu yɔ fion tɔɛ. A mɔɛ bonda chɛ sin nyina‑a, mbɛ Yataa na‑a a boo bɔ wan a 'a ko yama n dɔ, mbɛ a ma‑a mɔ chɛndɛ a.

¹⁰Chɛ an‑na a fɔ, n suun ma nyɔɛ nu Chasi ɔ, wo butuinɛ chɛ wo sɔɛ gbɛ a. Wo ni a ɔ yian, mbɛ Yataa‑a wo chee min chɛ, a‑a a boo min sɔ wo ma, ma koe a a ta mɔɛ n na, kuɔ fɔ koe mu. Chɛ sin mbe a ma‑a wan, wo ee sɛmbɛ‑a wo kai fa koe a Yataa a.

¹¹Chia chɛ sin na mu, wo e tea da faenɛ ma sɔn‑da ben koe a, a ta dɔndɔ gbe mmɔ 'a mansa, ni mmɔ baun mɔɛ Chisɔsi Chasi, ɛ kaina min mansaya ɔ kuɔ fɔ ko a. Yataa ɛ a boo si‑a wan wo kɔɔ.

¹²Chɛ an fɛ mu, n mbe wo yiima n na che tena tun koe chɛ n ma. Wo‑a an tea n dɔ sɔn bɛɛ ka boo ɔ boo, min dɔ yian‑da wo a, a si Chisɔsi ma. A yɛ to, wo e a sɔ tena wan an tea chɛ fɛ gbau gbau.

¹³N‑na a ɔ sɔn fan, mbɛ n fɔɛ ɔ ma yansan to, n gboo gbama chɛ boo ka koe a. A ɛ ma‑a wan, yɔ mmɔ 'a mansa Chisɔsi Chasi‑a a fɔ buɛ min dɔ, a boo kaenɛ ɛ a ma den. Chɛ an‑na a fɔ, n ma fa nin bɛ ka tima min na, n‑na n yii na chii, mbɛ a nyin n ni wo yii na che koe chɛ n ma.

¹⁵N mbe a ɔ yen‑da wan, n ni chia yan an to koe a wo yii ma, n faenɛ gbakɔ wɛɛ.

¹⁶Nn‑na a ɔ yian fan wo a, mbɛ mmɔ 'a mansa Chisɔsi Chasi ɛ na‑a wan gbasaya wa ɔ. Nn‑na a 'a gbasaya ɔ yen fan nn ya gbu a. Nn nii ma chɛ tɛ ni nn gboo an ma.

¹⁷Koe min na mu, nn bɛ ni nɔ kɔnkɔ duaen chɛ ma, tima min na Fa Yataa‑a basɔmaya wa be mansa Chisɔsi ma. A sin, nn‑na kuiɛ chenama wa a min fan, kamaya ɔ, a ka banda bu ɔ Yataa tena. Kuiɛ chɛ ɔ, “N 'na denɛ an nɛ, a ko a di n ye kaka. N faa chimaen mu a ko a.” Nn fandi gbu an‑na kuiɛ chɛ a min, a ka banda bu ɔ.

¹⁹Chɛ an fɛ mu gbɛ mmɔ gbu 'a danaya gbu ɔ gbɛa‑a gbɛ, sakana bai chɛ a, Yataa 'a gbonka chɛ mɔɛ n na‑a min dɔ yian suun. Ɛ nyan‑da wan wo ko a, ni wo‑a wo too ma sɔ a ma. Koe min na mu, ɛ wan yɔ dambo manɛ si ɔ pimbi pimbi ɔ. Ɛ ma wan man‑da aan banda ɔ ni ka, mbɛ sayi ma tɔmbuaka man‑da wo faa ɔ, min mu Chisɔsi wandi a.

²⁰Koe saa an nɛ, a nyin wo ni min dɔ gbɛ. Wo ni a ɔ gbɛ, mbɛ Yataa 'a gbonka chɛ mɔɛ n dɔndɔ wɛɛ nii ma chɛ ma ni. An dɔndɔ wɛɛ, an na‑a Yataa 'a gboo nyɛn tima min na, an nii ma an fandi ta yiimatɛ an nyɛn ni dechee.[1]

²¹Koe min na mu, Yataa 'a gbonka chɛ mɔɛ n fandi an ma si ni an ni yiinachii chɛ, mbɛ an‑na bai chɛ n tɛ an gboo ma. Chɛɛ Yataa Nyina an na‑a bai chɛ n fɔ an ye, Yataa toen ni an ni min fɔ.