Read Kono 1 CHƆN 4 Bible Online

1 CHƆN 4 - Kono bible

1 CHƆN 4

¹N dia nyɔɛ nu, wo ma dan mɔɛ n gbɛɛ a, miin mbe a fɔ‑a, mbɛ Yataa Nyina ɛ wan an fɛ. Wo an mɔɛ chɛ n fɔ bai ma mɛn pɛn, min mbe a ma, wo ni a ɔ sɔn, ni Yataa Nyina an mbe an fɛ tea ko a. Wo chɛ ma, koe min na mu, fania fɔ mɔɛ n sɛsɛ fasanden mu a ɔ, an mbe an fandi ya‑a Yataa 'a gbonka chɛ mɔɛ n na.

²Wo e kun‑da ka wan wo ni a ɔ sɔn, ni Yataa Nyina an mbe an fɛ. Mɔ ɔ mɔ min mbe a fɔ‑a fanka ɔ den, mbɛ Chisɔsi Chasi na‑a wan dunya chɛ ɔ mɔgbuya ɔ, Yataa Nyina an mbe a fɛ.

³Chɛɛ ni mɔ ɔ mɔ‑a kɔɔsa bia chɛ chɛ ma, Yataa 'a Nyina ee a fɛ. A ta nyina chɛ nɛnɛ, an mbe ma mɔɛ chɛ n fɛ, miin mu Chasi chɛɛ ma nyɔɛ n na. Wo na‑a a mɔɛ chɛ nyɔn sima n na koe a min fan. A sin gbu na‑a. Sanche chɛ wɛɛ ɔ, ɛ nɛ dunya ɔ.

⁴Chɛɛ wo tana, n 'na denɛ nu, wo e Yataa an ko a. A sin, wo kun‑da an fania mɔɛ chɛ n ma, koe min na mu, Yataa Nyina min mbe wo fɛ, a benden mu chɛ ma, min mbe dunya chɛ ma.

⁵Dunya chɛ ɔ mɔɛ mu an na. Chɛ an‑na a ma, an mbe dunya chɛ ma bai n fan sa, a sin, dunya chɛ ɛ a too ma sɔ wan an ma.

⁶Chɛɛ nn tana, nn mbe Yataa an ko a. Chia chɛ a mu, mmɔ ɛ tɛ bɔɛ sɔn mɔɛ ma, Yataa Nyina min mbe tea ɔ yian, ɛ min fɛ, an tɛ mɔɛ a, fania fɔ nyina gbama ɛ min fɛ. Mɔ ɔ mɔ min‑na Yataa sɔn, ɛ a too ma sɔ wan nn ma. Chɛɛ mɔɛ min mbe ee Yataa ko a, a mɔɛ chɛ ee a too ma sɔ nn ma.

⁷N dia nyɔɛ nu, mmɔ a tun to koe a mmɔ nyɔn na, koe min na mu, koadia kaen mu Yataa an na. A sin, mɔ ɔ mɔ min to‑a a bɔɛ a, a mɔɛ chɛ mu Yataa 'a denɛ an na, a sin‑na Yataa sɔn fan.

⁸Mɔ ɔ mɔ min ma to ni a bɔɛ a, a ma Yataa sɔn. Koe min na mu, Yataa mu koadia Yataa an na.

⁹Yataa 'a koadia, a na‑a a ɔ yian ka wan mmɔ a. A na‑a a 'a den dɔndɔ gbe a na wan dunya chɛ ɔ, min mbe a ma, mmɔ ni kuɔ fɔ fɔɛ ma sɔn.

¹⁰An ma a fɔ ni, mbɛ mmɔ wan to‑a Yataa a, chɛɛ a wan to‑a dechee mmɔ a. Chɛ‑a a ma wan, a wan Yataa, a‑a a 'a den chɛ a na, a ni ma yasi a mmɔ 'a ko yama n ko a. Koadia chɛ mu chɛ an na.

¹¹N dia nyɔɛ nu, ni Yataa toen mu ka wan mmɔ a, mbɛ mmɔ wɛɛ, mmɔ ɛ to wan mmɔ nyɔn na.

¹²Kɛn gba, mɔ ɔ mɔ ma Yataa yen nin bɛ. Chɛɛ ni mmɔ to‑a mmɔ nyɔn na, mbɛ mmɔ ma‑a mɔ dɔndɔɛ a Yataa a. A sin, a 'a koadia kuu, a si‑a mmɔ faa ɔ chɛndɛ chɛ.

¹³Yataa sin‑na a Nyina be wan mmɔ ma, a ni ma mmɔ fɛ. Chɛ an mbe a ɔ yian, mbɛ mmɔ ɛ wan mɔ dɔndɔya ɔ Yataa a, a sin, a wɛɛ ɛ wan mɔ dɔndɔya ɔ mmɔ a.

¹⁴A yɛ to, Fa Yataa‑a a 'a denɛ a na wan, min mbe a ma, a ni dunya kun ka. Nn‑na chɛ ɔ yen fan nn ya a, a sin, nn mbe koe ɔ yian fan, a si a ma.

¹⁵Ni mɔ ɔ mɔ‑a a fɔ den, mbɛ Chisɔsi mu Yataa 'a denɛ an na, a ma‑a mɔ dɔndɔɛ a, an fea Yataa a. Yataa wɛɛ, a ma‑a mɔ dɔndɔɛ a, an fea an mɔɛ chɛ a.

¹⁶Mmɔ sin danden fan mu a a, mbɛ mmɔ ko a di wan Yataa ye. Yataa mu koadia Yataa an na. A sin, mɔ ɔ mɔ min mbe to‑a mɔ dɔ mende n na, a ma‑a mɔ dɔndɔɛ a, an fea Yataa a. Yataa wɛɛ, a ma‑a mɔ dɔndɔɛ a, an fea an mɔɛ chɛ a.

¹⁷Ni Yataa 'a koadia kuu si‑a mmɔ faa ɔ, ni mmɔ tachɛ‑a fɔɛ ɔ yɔ Chisɔsi‑a a ma buɛ min dɔ, mmɔ faa ee gbaa, a si gbɛmbo tee ma Yataa boo ɔ.

¹⁸Koe min na mu, Yataa 'a koadia mmɔ ko a, ɛ faagbaa bonda chɛ ban fan mmɔ ma. Ni mmɔ‑a mmɔ yii na chii, mbɛ tɔɔya ɛ wan mmɔ ya ɔ, an mbe a ma, mmɔ faa ɛ gbaa ka. Chɛ ɛ a ɔ yian fan, mbɛ Yataa 'a koadia kuu ma si nin bɛ mmɔ faa ɔ.

¹⁹A nyin koadia ni ma mmɔ ɔ, koe min na mu, Yataa pɛn‑na koadia yian mmɔ a.

²⁰Ni mɔ ɔ mɔ‑a a fɔ, mbɛ a toen fan mu Yataa a, chɛɛ a ma to ni a suun ma nyɔɛ a, ɛ ka fania an fɔ‑a. Koe min na mu, mɔ ɔ mɔ min ma to ni a suun ma nyɔɛ a, ɛ min yen tee ɔ tee a, a mɔɛ chɛ ee che to‑a Yataa a, a ee min yen.

²¹Yataa sin‑na chɛ an fɔ mmɔ ye, a ɔ, mɔ ɔ mɔ, i wɛn mbe to‑a a wan Yataa a, a ɔ, i mɔɛ chɛ ni to i suun ma nyɔɛ wɛɛ a.