Read Kono 3 CHƆN 1 Bible Online

3 CHƆN 1 - Kono bible

3 CHƆN 1

¹N fan chɔchi gbakoo, n fan mbe gboo chɛ nyɛn tena i tena, i wan Kayɔsi. E Yataa 'a chia an ma, an fɛ mu i ko a di n ye.

²N dia nyɔɛ, n‑na a ɔ sɔn fan, mbɛ wo fea Yataa a, wo e wan kuiɛ dɔndɔya chɛndɛ ɔ. Chɛ an‑na a fɔ, Yataa ni i gboo ɔ bɔ, Yataa ni i dua.

³Suun ma nyɔɛ dɔ n na‑a wan, an‑na a fɔ n ye, mbɛ e wan sɔ ɔ den Chisɔsi ko a, yɔ e buɛ min dɔ Yataa 'a chia ma teaya ɔ, tee ɔ tee a. Chɛ‑a n bu ɔ dia wan kaka.

⁴Koe min na mu, buɔdia dɔ gbɛɛ ee to nɔ n ko a, min benden mu chɛ ma, ni n‑na a a min, mbɛ n 'na denɛ n mbe tachɛ tena wan Yataa 'a chia ma teaya ɔ.

⁵N dia nyɔɛ, i tanden mu i 'a wai ɔ, e min chɛ tena mmɔ suun ma nyɔɛ n ye, an dɔ n mu wɛɛ sonda n na i tena.

⁶Koadia min nyɔn sima e a yian tena an na, a a benden fan mu gbɛ chɔchi tena nɛ. An mbe ka tachɛ min dɔ, ɛ nyan‑da wan, i ni an na ben masaa chɛndɛ a, min mbe Yataa faa chima.

⁷Koe min na mu, an mbe ka tachɛ min dɔ Chisɔsi Chasi ko a, an ma dɔn ni fen kɔ fen bia koe a, mɔɛ chɛ n na‑a min be, mɔɛ miin nii ma an kai fa ni Chisɔsi a.

⁸Chɛ an fɛ mu, a nyin mmɔ wɛɛ, mmɔ ni toa si an kɔɔ, a nyin mmɔ ni a bun a a, wai chɛndɛ chɛ chɛ‑a, Yataa 'a sakana bai chɛ a ta koe a ya ɔ ma.

⁹N na‑a gboo nyɛn fan nɔ chɔchi tena. Chɛɛ Diotɛfesi, min toen mu a wandi ma koe a an ya ɔ sɔɛ a, a ee dɔn a too ma sɔ koe a, nn da a kuiɛ ma.

¹⁰Ni n na‑a nɔ, n mbe a fɔ‑a wan a ye den chɔchi ya kɔɔ, ɛ koe miin ma tena, nn tɔ yama min ɛ ben tena a ɔ tɛ‑a. Chɛ dechee ma, ni mmɔ suun ma nyɔɛ n‑na a tan, a ee ko chɛndɛ ma an na. A ka chɛ ma, mɔɛ miin bɛɛ toenɛ ma, an ni ko chɛndɛ ma an na, ɛ a mɔɛ chɛ n na gban fan. A sin to, ni an mɔɛ chɛ n‑na ko chɛndɛ chɛ ma, ɛ an gbain fan a bɔ chɔchi ɔ.

¹¹N dia nyɔɛ, i ma bea mɔɛ n fɛ, miin mbe ko yama ma. Chɛɛ bea chɛ n fan fɛ, miin mbe ko chɛndɛ ma. Mɔ ɔ mɔ min mbe koe ma min nyin, Yataa 'a mɔɛ mu. Chɛɛ mɔ ɔ mɔ min mbe koe ma, min ma nyin, a ma Yataa sɔn.

¹²Demetiɔsi tana, mɔ ɔ mɔ ɛ a bai tena wan. A sin tea gbu sin ko a, nn bɛɛ, nn mbe wan a bai tena. I sin‑na a ɔ sɔn fan, mbɛ ni nn na‑a chɛ ma, tea ɛ wan a ɔ.

¹³Ko sɛsɛ ɛ wan n yii ma, a fɔ koe a i ye, chɛɛ n ma to ni, n ni a finɛ puin a gbɛ ɔ.

¹⁴N toen mu n ni na i tan sanche, mɔ ni chia ɔ bɔ dɔndɔ chɛ.

¹⁵Yataa ni faachima be i ma. I dia nyɔɛ n gbɛɛ nɛ, an‑na i kɔndɔn. Nn dia nyɔɛ nu nɔ, an kɔndɔn nn ye dɔndɔ dɔndɔɛ a.[1]