Read Kono CHUDA 1 Bible Online

CHUDA 1 - Kono bible

CHUDA 1

¹N fan Chuda, n fan mbe gboo chɛ nyɛn tena wo tena, wo wan Chisian mɔɛ nu. Chisɔsi Chasi 'a wai chɛ mɔɛ mu n na, n fan Chimisi dɔ kaima. Fa Yataa toen mu wo a, a‑a wo chee wan a tena, a sin, Chisɔsi Chasi ɛ wo kun ma fɛn tena wan.

²Yataa ni a a tun chinchin koe a wo ma, a ni faachima be wo ma, a ni a ma wo ni to wo nyɔn na.

³N dia nyɔɛ nu, n toen ni kaka n ni gboo chɛ nyɛn a si bauncha ma, Chisɔsi‑a min be mmɔ ma. Chɛɛ n yiima dɔndɔɛ‑a a fɔ wan n ye, mbɛ n ni wo faa nande, wo ni butuinɛ chɛ, wo 'a danaya ko a Yataa a. Danaya chɛ sin, Yataa an‑na a ma, mmɔ‑a a ma sɔn, a sin mbe ee mun to.

⁴Mɔɛ dɔ n yen ko, miin mbe ee Yataa kuiɛ ma, an mbe kan yama chɛ, an na‑a mmɔ tɛ ɔ yɛdɛn yɛdɛn. Mɔɛ chɛ n bakoe nyɛnden fan mu suun suun, mbɛ Yataa ɛ kaa a tɛ‑a wan an bakoe ma, a ni an tɔɔya. An ma Yataa sɔn, Yataa ɛ chinchin fan an ma. Chɛɛ an mbe an chinchincha chɛ an ya, mbɛ an ma‑a fɔɛ yama ɔ. An mbe yɛ wan to, mbɛ an ban‑da Chisɔsi Chasi ɔ, min mu mmɔ 'a mansa dɔndɔɛ a, mmɔ kun ti.

⁵Wo‑a chɛ ɔ sɔn bɛɛ boo ɔ boo, chɛɛ n mbe a ɔ yian‑da wan to wo a. Mbɛ Yataa na‑a Isɔɛɛ mɔɛ n bɔ wan yɔncha ɔ Ichipi chɛnyɛ ɔ. Chɛɛ chɛ gbakɔ, an dɔ nu, a‑a an kasaa wan, koe min na mu, an ma dɔn ni dan koe a a wan Yataa a.

⁶Koe chɛ wɛɛ to‑a wan wo yii ma, a si maeka chɛ n bɛɛ ma, miin faa nii ma chima ni an 'na sɔ tena a banda bu ɔ. An na‑a a boo ka wan, mbɛ an bɔ‑a nɔ. Chɛ ko a, Yataa‑a a ma wan, an chii‑a yɔɔɛ a kuɔ fɔ ko a, pimbi pimbi ɔ. Yataa sin 'na gbasaya ɔ, an mbe ma tena nɔ wan chii chɛ ɔ, aan tee chɛ ni che, gbɛmbo tee wa chɛ. An tee chɛ ma mu, Yataa ɛ kaa a tɛ‑a an bakoe ma.

⁷Sɔdɔn fea Komoa an bɛɛ mu to dɔndɔ an na. Duu wa fea chɛ nu, a basan konko mɛsɛ n na an 'na tindanɛ, an‑na ko yama sɛsɛ tɛ wan, an‑na Yataa 'a sawa sɛsɛ ka a chia ma. An 'na tɔɔya tana, a mu tɔmɔsi an na mɔɛ chɛ n tena, miin mbe na‑a ma‑a ta ɔ, kuɔ fɔ ko a.

⁸Mɔɛ chɛ n bɛɛ, miin na‑a mmɔ tɛ ɔ yɛdɛn, an mbe an ko dɔndɔ gbe chɛ n fan ma tena. An 'na yiinachii ɛ a ma tena wan, an mbe ban‑da don koe a Yataa da a kuiɛ kɔɔ. Ɛ a ma tena wan to, an mbe an fandi gbu gboo bia‑a yama yama, a yɛ to, an mbe maeka n main‑da.

⁹Chɛɛ maeka n 'na mansa dɔndɔ wɛɛ, min tɔ mu Maikɛɛ, a nii ma Sitana main ni. A na‑a a fɔ wan dechee a ma, a ɔ, Mansa Yataa ni a tɔɔya. Chɛ ma‑a Mosisi su kun ma wan. An fea chɛ dɔndɔ toen ni a ni su chɛ ya, min na ban‑da kɔɔsa ma an tɛ ɔ.

¹⁰Chɛɛ mɔɛ chɛ n tana, ni an ma koe min dɔ gbɛ ni, ma yɛn ma koe mu an tena, an sin mbe bai yama an sa a si a ma. An mbe wan dechee yɔ soe nu, koe min na mu, koe min mbe puin an yii ma, an mbe an ma. Koe n fan nɛ, miin mbe na kasaa a, an kun ma.

¹¹Koe min mbe an tan‑da, a yau gba an ko a. An puin‑da mɔna chɛ chen gba ɔ, mɔna min tɔ ni Ken,[1] min na‑a a dɔɛ fa. Kɔpɔ koe‑a a ma, an bɔ‑a Badaan[2] gba ɔ, an mbe ko ɔ ko ma wan kɔpɔ koe a. A yɛ to, Kɔya[3] 'a gbunɛ nyɔn sima, an‑na a a bea, min‑na an kasaa pɔɛ.

¹²Mɔ bonda chɛ nu, mɔ yama mu an na, miin mbe an bɔɛ n ka chia chɛndɛ ma. Ni wo ma‑a daun chɛ wɛɛ a, wo bɛ an na, kuiɛ dɔndɔya ɔ, an mbe an yii na chii dechee an fandi an na. An 'na yiima yaua daun chɛ, ɛ kuiɛ dɔndɔya chɛ a ɔ yɔn fan. Mɔ gbu a tenden ma an na. An mbe wan yɔ sona min mbe gbii teema ɔ, chɛɛ a ee na. An mbe wan to yɔ kɔnɛ, min yamba bandenɛ a a, a sin, a ee gbɔ be, kɔn fu tima wɛɛ a. Kɔn bonda chɛ kuu ɛ bɔ wan, a a ni dɛ, mbɛ a fa‑a gba fea.

¹³A yɛ to, ni yii fa‑a, ɛ fenɛ n na fɔnɔ wan tindi ma, mbɛ a yɛ‑a. Mɔɛ chɛ n bɛɛ, an mbe ka wan. An mbe an 'na mauma koe n to ka wan an gbaa, mbɛ an ta‑a. An mbe wan to yɔ tɔmbuaka chɛ nu, miin ka‑a chia chɛ ma, Yataa‑a min yian an na, mbɛ an ta‑a an ta gbee a. Yataa‑a kaina ɔ bɛn an ko a, ma koe a pimbi pimbi ɔ kuɔ fɔ ko a.

¹⁴Adami mama denɛ ta mama denɛ ta mama n denɛ dɔndɔ ni wan nɔ, min tɔ ni Ɛnoku. A na‑a bai sa wan suun, a si an mɔ bonda chɛ n ma. A ɔ, a yen ko, mbɛ Mansa Chisɔsi ɛ na‑a wan, a ɔ, an bɛ a 'a maeka wu sɛsɛ sɛsɛ n na.

¹⁵A ɔ, ɛ na‑a wan mɔɛ n gbɛɛ gbɛmbo koe a. A ɔ, mbɛ mɔɛ chɛ nu, miin ma Yataa sɔn, a ɔ, mbɛ kaa a tɛ‑a an 'na ko yama n gbɛɛ ma. A ɔ, ko yama chɛ n gbɛɛ, a ɔ, a basan an 'na bai yama n gbɛɛ a, an‑na miin sa a si a ma.

¹⁶An mɔ bonda chɛ nu, an faa ee chima, tima ɔ tima an mbe gbonyɛ‑a. An sin, an faa ma koe yama nu, an mbe bea an fan fɛ. A yɛ to, an da ɔ yonka koo, an sin mbe da ma dia bai n sa wan mɔ dɔ mende n tena, min mbe a ma dechee, an faa ma koe ni chɛ an ye.

¹⁷Chɛɛ n dia nyɔɛ nu, ɛ wan wo yii ma, mmɔ 'a mansa Chisɔsi Chasi 'a sɔ mɔɛ nu, an na‑a bai min fɔ suun.

¹⁸An na‑a a fɔ wan wo ye, an dɔ, mɔɛ n mbe na‑a wan tee dankama nɛnɛ chɛ n kɔɔ, an dɔ, miin mbe bea‑a an 'na Yataa sɔn baiya koe n fɛ, miin na di an ye. An dɔ, an mɔɛ chɛ nu, an mbe mayɛma bun‑da wo ma, wo bɛ Yataa a.

¹⁹Dunya ma mɔ bonda chɛ nu, Yataa Nyina ee miin fɛ, an fan mbe na ko a fasanɛ a.

²⁰Chɛɛ wo tana, n dia nyɔɛ nu, wo ma yɛ kuu kɔ wo 'a danaya ɔ Yataa a. Wo samunɛ chɛ gbasaya chɛ ɔ, Yataa Nyina ɛ min be.

²¹Wo ma bɔ Yataa 'a koadia kɔɔ. Wo chinchimaya chɛ ma kɔn, mmɔ 'a mansa Chisɔsi Chasi ɛ min chɛ‑a, min mbe na‑a kuɔ fɔ fɔɛ a.

²²Mɔɛ dɔ nu, sika ɛ miin dɔ, wo an deman.

²³Dɔ n bɛɛ baun, i ni an sogban, a bɔ ta ɔ. Chinchimaya, a basan sika a, a ni ma wo ɔ dɔ n sin ko a. Chɛɛ tima ya, an 'na ko yama maenɛ ma na sin i ma.

²⁴Sanche gbɛ, mmɔ tando be Yataa ma. An mu dechee mmɔ 'a Yataa a, an mbe mmɔ baun, a 'a denɛ Chisɔsi Chasi ɔ, mmɔ 'a mansa. A wan Yataa, an mbe a ma, mmɔ ee bea, mbɛ a‑a a ma, mmɔ sɔ‑a a chen kɔɔ manɛ ɔ, mabɔ kan kɔ kan mbe ee mmɔ ma, mɔɔ buɔdia mmɔ ɔ. Mansaya, ni bemaya, a basan gbasaya a, a ka suun ma, aan sanche, ɛ Yataa an boo ɔ, kuɔ fɔ, ni kuɔ fɔ ko a. A ni ma ka.