Read Kono KO Ɔ NUNDENƐ 10 Bible Online

KO Ɔ NUNDENƐ 10 - Kono bible

KO Ɔ NUNDENƐ 10

¹Chɛ gbakɔ, mbɛ n‑na maeka dɔ mende yen yii‑a, a ka banda bu ɔ, min ni gbasa. A ma koa ni dugbu an na, ninkinankantuu tindandenɛ ɛ a kunɛ a. A ya kɔɔɛ ni man tena wan yɔ tee, a chenɛ n sin ni wan yɔ ta sanku manɛ.

²Gboo nyɛndenɛ ni wan a boo a, min nii ma koo, a ɔ fuindenɛ ɛ. Mbɛ a‑a a boo nyima ɔ chenɛ sɔ kɔ yii ɔ, a man dɔ chenɛ sin to‑a sɔ ɔ duu gboo ma.

³Mbɛ a‑a yee wa tɛ, yɔ yaa ɛ ma dau‑a. Mbɛ a‑a yee chɛ tɛ kɛn, banda koɔ‑a gba wɔnfea.

⁴Banda chɛ sɛmbɛ‑a kɛn koɔ koe a, a‑a min gbɛɛ fɔ, n toen ni n ni a nyɛn. Chɛɛ n‑na kuiɛ a min fan, a ka banda bu ɔ, a ɔ, “Koe chɛ n sa i yii ma. I ma an nyɛn gboo ma.”

⁵Mbɛ n‑na maeka wa chɛ min yen ka sɔ ɔ kɔ yii ɔ, ni duu gboo ma, a‑a a boo nyima a si banda a.

⁶Mbɛ a‑a a fɔ, a ɔ, “Tima ban‑da, makɔn chɛ tima Yataa boo ɔ.” A ɔ, a ɛ ka tea an fɔ tena, a ɔ, Yataa tɔɛ ɔ. Yataa min mu, a ee fa kuɔ fɔ ko a, min‑na banda bu ɔ a dan, a basan fen fen na, miin mbe nɔ. A yɛ to, a‑a dunya a dan, a basan fen fen na dunya ɔ, a‑a kɔ yii wɛɛ a dan, ni fenɛ miin gbɛɛ ɛ a ɔ.

⁷A ɔ, “Yataa na‑a a yii ma koe n fɔ wan a 'a yɔnɛ n ye, a 'a gbonka chɛ mɔɛ nu. Ni maeka wɔnfean bɔɛ chɛ‑a a ta buu fɛ, an koe chɛ nu, an mbe ban‑da wan ma‑a. An mbe ma‑a wan, yɔ a na‑a fɔ buɛ min dɔ an ye.”

⁸Mbɛ kuiɛ chɛ, min ka‑a banda bu ɔ, a koɔ‑a to n tena, a ɔ, “Ta, i ni gboo nyɛnden chɛ bia. A bia maeka chɛ boo ɔ, min chenɛ dɔndɔɛ ɛ sɔ ɔ kɔ yii ɔ, dɔndɔɛ ɛ sɔ ɔ duu gboo ma, gboo chɛ da a kaenɛ ɛ a boo a.”

⁹N ta‑a, n‑na maeka chɛ tan. N‑na a tan kɛn, a ɔ tisa koe a gboo chɛ be koe a n ma, a ɔ te n ma, “Gboo chɛ bia, i ni a daun. I da ɔ, ɛ chinchia‑a wan yɔ kuminɛ, chɛɛ a konama an mbe ma‑a i bu ɔ.”

¹⁰Mbɛ gboo nyɛnden chɛ, min nii ma koo, n‑na a bia a boo ɔ, mbɛ n‑na a daun. A ni chinchi n da ɔ yɔ kuminɛ, chɛɛ a kona‑a wan n bu ɔ.

¹¹Mbɛ n‑na kuiɛ dɔ n na min, an dɔ, “Chɛnyɛ kun kan kɔ kan, chɛnyɛ koɛ kan kɔ kan, mɔ gbu kan kɔ kan, a basan an 'na mansa wa n gbɛɛ a dunya ɔ, Yataa 'a sakana bai ɔ yian, a si an gbɛɛ ma.”