Read Kono KO Ɔ NUNDENƐ 13 Bible Online

KO Ɔ NUNDENƐ 13 - Kono bible

KO Ɔ NUNDENƐ 13

¹Mbɛ n‑na n ya a ta, n‑na soe wa yen, soe ma chianden ba, ɛ bɔ‑a yii ɔ. Chɛ nɛnɛ bena ni tan, a kunɛ ɛ wɔnfea. Mansa banfua an ni si ɔ a bena tan chɛ n kan kɔ kan na. A kun chɛ n sin gbɛɛ, tɔɛ nyɛnden fan ni an ma, tɔɛ miin ni mainɛ a Yataa tena.

²N na‑a soe min yen ka, a bɔen ni kui an na. Chɛɛ a chenɛ ni wan yɔ nyima soe dɔ mende, a nyɛnsenɛ n bɔenɛ a sa n dɔ, a da sin yɔ yaa da. Mbɛ fɔɛ fenɛ ma chianden ba saa chɛ, a‑a a 'a sɔ tena dɔ be soe yama nama chɛ ma, a basan a 'a mansaya gbasaya wa dɔ a dunya ma.

³Mbɛ n‑na a yen, an soe yama chɛ kunɛ dɔndɔɛ, tɛɛ paa wa dɛgbɛ ɛ wan a ma, tɛɛ min, mɔ ɔ mɔ ee dan a a, mbɛ a ni baun fan. Dunya gbɛɛ da ɔ gbaa‑a wan chɛ a, mbɛ an bea‑a a fɛ.

⁴Mbɛ an‑na fɔɛ fen yama chɛ fai yɔ Yataa, min‑na a 'a gbasaya dɔ be ka a bɔɛ chɛ ma. Gbasaya chɛ be‑a ka soe yama min bɛɛ ma, an‑na a wɛɛ fai wan, an dɔ, “Mɔ ɔ mɔ ma gbasa, a ni che i ɔ. Mɔ ɔ mɔ ee che kun‑da i ma butuinɛ ɔ.”

⁵Mbɛ soe yama chɛ bun‑da yonka bai n sa‑a, ɛ ta‑a Yataa main‑da. Chɛɛ Yataa‑a a too ka wan a ma, ma koe a an gbasaya chɛ ɔ, kau bi naanin kun ma fea (42) ko a.

⁶A bun‑da a da a ka‑a, ɛ Yataa main, ɛ a tɔɛ ɔ yɔn, ɛ a waa ma nyin, a basan mɔɛ chɛ n gbɛɛ a, miin mbe nɔ banda bu ɔ.

⁷Yataa‑a a to wan nɔ, a‑a chɛɛ bun Yataa 'a mɔɛ n ma, a sin kun‑da wan an ma. A yɛ to, gbasaya be‑a wan a ma mɔɛ gbɛɛ kun ma dunya ɔ. Chɛ nu chɛnyɛ kunɛ n dɔ, chɛnyɛ koɛ n dɔ, ni dambi nu, an bɛ mɔ gbu kan kɔ kan na.

⁸A sin, mɔɛ gbɛɛ dunya ma, an mbe a fai wan. Mɔɛ chɛ n gbɛɛ, miin mbe ee a fai‑a, an fan nɛ dechee mɔɛ chɛ n na, miin tɔɛ nyɛndenɛ ɛ gboo chɛ ɔ, a ka dunya a dan tima ma. Gboo chɛ, mɔɛ miin mbe kuɔ fɔ fɔɛ ma sɔn‑da, an mbe min dɔ. An gboo chɛ, ɛ sa tɔngbɔɛ an boo ɔ, an‑na min fa.

⁹Wo wɛn too ɛ koe a min, wo chɛ a min.

¹⁰Mɔ ɔ mɔ, Yataa‑a min ma bia mɔɛ a, a mɔɛ chɛ ɛ ma‑a bia an dɔ. Mɔ ɔ mɔ, Yataa‑a min ma fa mɔɛ a, chɛɛ chɛ mɛ a, chɛɛ chɛ mɛ an mbe a mɔɛ chɛ fa‑a pɔɛ. Chɛ gbɛɛ‑a a yian fan ka, mbɛ Yataa 'a mɔɛ n danayaen fan mu, an sin mbe an faa bia wan to.

¹¹Mbɛ n‑na soe yama dɔ gbɛɛ yen to, min nɛnɛ bɔ‑a duu gboo ɔ. A tana, a bena ni fea yɔ sa tɔngbɔɛ, chɛɛ a kuiɛ maen fan ni yɔ fɔɛ fen ma chianden ba koɔ kuiɛ.

¹²A‑a gbasaya gbɛɛ a tachɛ wan, min ni soe yama chɛ boo ɔ, paa wa chɛ ɛ ka min kunɛ ɔ. A ya kɔɔɛ ma, a‑a a 'a gbasaya din fan dunya ma, mɔɛ gbɛɛ ma miin mbe dunya ma, an ni soe yama saa chɛ fai.

¹³Soe yama fean bɔɛ chɛ‑a kamaya koe sɛsɛ ma wan. Mɔ ɔ mɔ ya kɔɔɛ ma, a‑a a ma wan, ta gbu wɛɛ, a yii‑a a ka banda a.

¹⁴A sin, a 'a kamaya koe chɛ n‑na mɔɛ n gbɛɛ bun fan dunya ma, Yataa‑a a too ka a ma ka koe miin ma koe a, soe yama saa chɛ ya kɔɔ. Soe yama fean bɔɛ chɛ‑a a saa chɛ a gbasaya a tachɛ wan, a fɔ koe a mɔɛ n ye, an ni soe yama saa chɛ bɔ nyɔɛ nyan. Mɔɛ ɛ a yen, yɔ an na‑a an soe yama saa chɛ fa wan chɛɛ chɛ mɛ a, mbɛ a yɛ‑a to fɔɛ ɔ.

¹⁵Soe yama fean bɔɛ chɛ, gbasaya be‑a wan a ma, a ni fɔɛ be fen chɛ ma, soe yama saa chɛ, a bɔ nyɔɛ chɛ, mɔɛ chɛ n‑na min nyan ka. Chɛ‑a a ma wan, a ni koɛ chɛ, ɛ a ma wan, mɔ ɔ mɔ min nii soe yama chɛ fai, an ni a fa.

¹⁶A yɛ to, soe yama chɛ, a din‑da wan to mɔɛ n gbɛɛ ma, mɔ mɛsɛ n bɛ gbakoo n na, yɔn tɔɛ nu, an bɛ nyan tɔɛ n na, yɔnɛ nu, an bɛ mɔɛ n na, miin ma yɔn na, an gbɛɛ ni nyɛnɛ ma sɔn. A ni sa an boo nyima a boo a, chɛ ma, an ya kɔɔɛ.

¹⁷A sin, mɔ ɔ mɔ ee fee chɛ, chɛ ma, mɔ ɔ mɔ ni fee fenɛ ma tachɛ, ni nyɛn chɛ ee a ma. An nyɛn chɛ, a mu soe yama saa chɛ tɔɛ an na, ni chɛ ma, nɔmba min sɔen mu a tɔɛ ko a.

¹⁸Yiimatɛ wa, an mbe chɛ bɔ. Mɔɛ min sin yiima tɛen mu, an mbe a ɔ gbɛ nɔmba chɛ sɔen mu fen ko a. Mɔ gbu 'a nɔmba mu. A mu chɛmɛ wɔdɔ, ni bi wɔdɔ kun ma wɔdɔɛ (666) an na.