Read Kono KO Ɔ NUNDENƐ 16 Bible Online

KO Ɔ NUNDENƐ 16 - Kono bible

KO Ɔ NUNDENƐ 16

¹Mbɛ kuiɛ gbankon ba, n‑na a a min, a ka Yataa 'a chen chɛ a, a ɔ, maeka wɔnfea chɛ n ma, a ɔ, “Pani wɔnfea chɛ nu wo boo n na, miin na faenɛ ɛ ka Yataa 'a faatɛ gbɛ chɛ a, wo ta, wo ni an dɔ wuyan dunya kun ma.”

²Mbɛ maeka saa ta‑a, mbɛ a‑a a ta pani ɔ wuyan dunya ma. Mɔɛ chɛ n gbɛɛ, soe yama chɛ, a 'a nyɛnɛ saenɛ ɛ miin ma, miin ni fen chɛ fai, min bɔen ni a a, tɛ yama bɔ‑a an gbɛɛ gboo ma.

³Mbɛ maeka fean bɔɛ tana, a‑a a ta pani ɔ wuyan kɔ yii ɔ wan. Mbɛ kɔ yii chɛ mun‑da, a ma‑a yɔ mɔ su wii, a chinɔenɛ ɛ. A sin, mbɛ fɔɛ fen kan kɔ kan a ɔ, an fa‑a wan.

⁴Maeka sawan bɔɛ sin, a‑a a ta pani ɔ wuyan yii tɔɛ n gbɛɛ an dɔ, miin mbe yii. An gbɛɛ ma‑a wii a.

⁵Mbɛ maeka chɛ, min ni yii gbɛɛ kun ma, n‑na a kuiɛ a min, ɛ koɔ‑a Yataa tena, a ɔ, “Tea ko a, i kan nyɔ ee. I ni wan nɔ suun, e tun nɔ sanche wɛɛ.” A ɔ, “E ka kaa min na tɛ‑a dunya chɛ ma, tea ɛ wan i boo ɔ.”

⁶A ɔ, “I 'a mɔɛ n wii a bɔnden mu an boo ɔ, a basan i 'a gbonka chɛ mɔɛ n wii a.” A ɔ, “I wɛɛ, i‑a wii dechee be an ma, a min koe a yii a. An‑na wai chɛ chɛ an ko a.”

⁷Mbɛ n‑na mɔɛ kuiɛ a min, a ka gbengbe chɛ tena, a ɔ, “Yataa Mansa Wa, tea ko a, i danayaen mu, i 'a kaa a tɛ ɔ.”

⁸Maeka naanin bɔɛ‑a a ta pani ɔ wuyan tee an kun na. A sin, gbasaya be‑a wan a ma, mɔɛ n minda koe a, a ta manɛ a.

⁹Tee chɛ win ba chɛ‑a mɔɛ n ma fufu wan. Chɛɛ an ma an kan kɔ sɔ ni an 'na ko yama n na, an ma Yataa bai ni, a 'a gbasaya ko a. An‑na min ma, an‑na a main fan, gbasaya ɛ ka a wɛn boo ɔ kasaa koe chɛ n kun ma.

¹⁰Maeka duun bɔɛ tana, a‑a a ta pani ɔ wuyan soe yama chɛ 'a mansa sea an na. Chɛnyɛ chɛ, min ni a 'a mansaya kɔɔ, a ni wan pimbi pimbi ɔ. Mɔɛ n‑na an nɛnɛnɛ n chin fan tɔɔya ɔ.

¹¹Chɛɛ an ma an kan kɔ sɔ ni an 'na ko yama n na. An sin‑na bai yama n sa wan Yataa ma, min mbe banda bu ɔ. Koe min na mu, an 'na tɛɛ chɛ n ni an tɔɔ tena wan kaka.

¹²Maeka wɔdɔn bɔɛ‑a a ta pani ɔ wuyan yii chɛ an dɔ, an mbe min chee, an dɔ, Yufatesi. An yii chɛ gbaa‑a wan tado, chia be koe a mansa chɛ n ma, miin mbe ka tee bɔ.

¹³Mbɛ n‑na a ɔ yen, nyina yama sawa, miin ni yɔ tui gbɔfɔɛ nu, an bɔ‑a. Dɔndɔ bɔ‑a fɔɛ fen ma chiandenɛ chɛ an da ɔ. Mbɛ dɔndɔɛ bɔ‑a soe yama wa chɛ da ɔ. A sawan bɔɛ chɛ sin bɔ‑a fania fɔ mɔɛ chɛ an da ɔ, min ni a wandi ya Yataa 'a gbonka chɛ mɔɛ a.[8]

¹⁴Nyina yama ni an na, miin mbe a ma, kamaya koe n mbe ma. An mbe ta wan mansa kan kɔ kan tena dunya ma, an na kan koe a kaina dɔndɔɛ. An ni chɛ ma tena, chɛɛ chɛ koe an na tee wa chɛ ma, Yataa Mansa Wa 'a tee chɛ.

¹⁵Chisɔsi na‑a a fɔ wan, a ɔ, “A yen ko, n mbe na‑a wo tɛnɛ‑a wan yɔ kanka. Mɔ ɔ mɔ min mbe ma‑a a ya a, ɛ a 'a koa n kun ma fɛn‑da wan. Chɛ ɛ a ma‑a wan, a ee ben‑da a ma senɛ a, a ni mau fanka ɔ den. A mɔɛ chɛ duaen mu.”

¹⁶Mbɛ nyina yama chɛ nu, an‑na mansa chɛ n na kan kaina chɛ, Ibu mɔɛ n mbe min chee, an dɔ, Amakɛdon.

¹⁷Mbɛ maeka wɔnfean bɔɛ sin, a‑a a ta pani a fasi wan, mbɛ fia ta‑a a a. Mbɛ kuiɛ wa a min‑da gbankon, a ka Yataa 'a chenɛ a banda bu ɔ, mansa sea chɛ tena, a ɔ, “Ko ɔ ko ban‑da.”

¹⁸Mbɛ banda manɛ mia mia ben ben‑da, banda ɛ tu‑a diki diki, ɛ ta‑a koɔ‑a gbau gbau, mbɛ duu gboo wɛɛ samba‑a a ma chianden ba a. A ka mɔ gbu bɔ tima ma dunya chɛ ɔ, duu gboo ma samba nin bɛ, min yau kaka a ni che chɛ ɔ.

¹⁹Mbɛ Babidon duu wa chɛ, a tɛka‑a sawa a, duu gboo chɛ sambaenɛ gbakɔ. Duu wa tɔɛ chɛ n gbɛɛ dunya ma, an bɛɛ yɔn‑da wan. Yataa nii ma nyina ni Babidon duu yama wa chɛ ma. Chɛ an fɛ mu, a‑a a gbɛ tɔmbua chɛ din nɔ mɔɛ n ma, gbɛ min‑na a 'a faatɛ dankama yian.

²⁰A sin, kaina kan kɔ kan yii tinɛ ɔ, an tuin‑da wan, mɔ sin nii kɔnkɔ kan kɔ kan yen to.

²¹Mbɛ sankɔɛ gbugbu wa dɛgbɛ nu, miin dɔndɔɛ fanka ni che kɔɔ bɛchi dɔndɔɛ fanka ɔ, an bea‑a mɔɛ n ma, a ka banda a. Chɛɛ mɔɛ chɛ n‑na Yataa main fan, koe min na mu, koe chɛ ma chianden ni kaka.