Read Kono KO Ɔ NUNDENƐ 17 Bible Online

KO Ɔ NUNDENƐ 17 - Kono bible

KO Ɔ NUNDENƐ 17

¹Mbɛ maeka wɔnfea chɛ n dɔndɔ, miin‑na pani chɛ n dɔ wuyan ka, a na‑a n tena, a ɔ, “Na wɛ, n ni a ɔ yian i a, duu dia wa chɛ, Yataa ɛ kaa a tɛ‑a buɛ min dɔ a wakoe ma.” A ɔ, “Duu dia chɛ mu duu wa chɛ an na, min sɔen mu ka yii sɛsɛ n kaa a.”

²A ɔ, “Mansa wa chɛ nu dunya chɛ ɔ, an‑na waa ma basan fan an duu dia chɛ a.” A ɔ, “Mɔɛ miin sin gbɛɛ an mbe dunya ɔ, an‑na a 'a gbɛ yama chɛ min fan, min mbe yiinachii yama ma munda, a bɛbɛɛ ko tɛ. An gbɛ chɛ sin‑na an bia wan.”

³Mbɛ Yataa Nyina bea‑a n fɛ gban, mbɛ maeka chɛ ta‑a n na fuinɛ ma. Nɔ ni, mbɛ n‑na musu yen si ɔ soe yawa kun ma, soe yama wa. An soe chɛ gboo gbɛɛ ma, Yataa main bai n dechee an nyɛnden ni a ma. A kunɛ ni wɔnfea, a bena n sin ni tan.

⁴Musu chɛ ma bɛnden fan ni chɛndɛ chɛ, koa yawaenɛ ɔ, min ni man tena sanu a, ni sen baa gbanden ba nu, a basan fen baa gbanden dɔ mende n na a ma. Kɔpu ni wan a boo a, min nyanden ni sanu a, ko yama faenɛ a a gban, a basan a 'a duu dia wai yama a.

⁵Musu chɛ ya kɔɔɛ ma, tɔɛ nyɛnden fan ni nɔ, min fasai nunden ni. Chɛ an nyɛnden ni a ma, a ɔ, “Babidon duu wa chɛ, an mu duu dia n gbɛɛ de a, mɔɛ chɛ n gbɛɛ, miin mbe ko yama kan kɔ kan ma.”

⁶Mbɛ n‑na a ɔ yen, mbɛ musu chɛ gbɛ tɔɛ ni, mɔɛ chɛ n wii a, Yataa 'a mɔɛ chɛ nu, an na‑a miin fa, bea koe a Chisɔsi fɛ. N‑na a yen kɛn, n da ɔ gbaa‑a wan.

⁷Chɛɛ maeka chɛ ɔ te n ma, a ɔ, “I da ɔ ma gbaa. N mbe koɔ nunden chɛ ɔ yian‑da wan i a, a si musu chɛ ma. N mbe a ɔ yian‑da wan i a, a si soe yama chɛ wɛɛ ma, ɛ ka si ɔ min kun ma, soe min kunɛ ɛ ka wɔnfea, a bena sin mbe tan.

⁸I na‑a soe yama min yen ka sunɛ, a ni wan fɔɛ ɔ, chɛɛ a fa‑a gbɛ. A ɛ na tena wan bɔ‑a to, a ka son dɔ yiien ba chɛ ɔ, min danka ee ka. A sin, ɛ ta‑a wan kaina chɛ, Yataa ɛ a kasaa kaina min. Dunya chɛ ma mɔɛ nu, Yataa nii ma miin tɔɛ nyɛn ni a 'a gboo ɔ, an gbɛɛ, an da ɔ gbaa‑a wan, an mbe ma‑a soe yama chɛ ma fɛn‑da. A 'a gboo chɛ, mɔɛ miin mbe kuɔ fɔ fɔɛ ma sɔn‑da, a na‑a an tɔɛ nyɛn min dɔ, a e na dunya a dan. Soe chɛ ni wan tee fɔɛ ɔ, a ee sanche fɔɛ ɔ, chɛɛ ɛ yɛ‑a wan to fɔɛ ɔ.”

⁹A ɔ, “Yiimatɛ wa, an mbe chɛ nɛnɛ bɔ. Kun wɔnfea chɛ nu, an mu kɔnkɔ wɔnfea an fan na, musu chɛ ɛ si ɔ miin ma.

¹⁰An mu to mansa wɔnfea an fan na. An mɔ duu nii to fɔɛ ɔ, dɔndɔɛ ɛ tun mansaya ɔ, a dankama sin ma na nin bɛ mansaya ɔ. A sin ni a na‑a, ɛ ma‑a mansaya ɔ tima kundu ɛnden fan ko a dechee.

¹¹Soe yama chɛ tana, min ni fɔɛ ɔ, chɛɛ a ee to fɔɛ ɔ, a sin fan mu to mansa sɛin bɔɛ a. A sin to, ɛ bɔ‑a mansa wɔnfea chɛ n fan tɛ ɔ, chɛɛ a wɛɛ ɛ kasaa‑a wan.”

¹²A ɔ, “Bena tan chɛ n sin, i na‑a miin yen ka, mansa tanɛ n fan nɛ, miin ma si nin bɛ an 'na mansaya ɔ. Chɛɛ an mbe gbasaya ma sɔn‑da wan, mansaya wai chɛ koe a yɔ mansa nu, awa dɔndɔ gbe ko a, an bɛ soe yama chɛ a.

¹³An mansa tan chɛ n gbɛɛ yiima ni dɔndɔ gbe, an sin gbɛɛ kuiɛ bɛn‑da wan kaina dɔndɔɛ, mbɛ an 'na mansaya gbasaya gbɛɛ, an‑na a be soe yama chɛ ma.

¹⁴Soe yama chɛ, an bɛ mansa tan chɛ n na, an mbe chɛɛ bun‑da wan sa tɔngbɔɛ ma. Chɛɛ sa tɔngbɔɛ chɛ, an bɛ a fɛ mɔɛ n na, an mbe tu‑a wan an chɛɛ ma nyɔɛ chɛ n na chɛndɛ chɛ. Koe min na mu, sa tɔngbɔɛ an mu mansa wa a, mansa wa n gbɛɛ kun ma mansa. A fɛ mɔɛ nu, an mu mɔɛ chɛ n fan na, Yataa‑a a boo sɔ miin ma, mbɛ a‑a an chee. An sin, an fan kai faen mu a a.”

¹⁵Mbɛ maeka chɛ a ɔ te n ma, a ɔ, “I na‑a yii miin sin yen ka, duu dia chɛ ni ka si ɔ miin kaa a, an mu mɔ gbu n fan na, mɔ fanka nu, chɛnyɛ kunɛ nu, a basan chɛnyɛ koɛ n na.

¹⁶I na‑a bena tanɛ miin sin yen, an bɛ soe yama chɛ a, duu dia chɛ wakoe ɛ don‑da wan an ma. An mbe fen kɔ fen bɔ‑a wan a boo ɔ, an ni a ma senɛ to. An mbe a gboo daun‑da wan, mbɛ an‑na ta ya, mbɛ an‑na a minda.

¹⁷Koe min na mu, Yataa an‑na a chɛ an faa ɔ, an yiima bɛn‑da kaina dɔndɔ, kuiɛ dɔndɔɛ ɔ, an ni an 'na mansaya be soe yama chɛ ma. Yataa faa ma koe ni a a, an ni ma soe yama chɛ kɔɔ, aan Yataa 'a dɔbɛnɛ gbɛɛ kunɛ a ni bia chɛndɛ chɛ.

¹⁸“Musu chɛ sin, duu dia chɛ, i na‑a min yen, a mu duu wa chɛ an na, duu gbasayaen ba chɛ, dunya mansa n gbɛɛ, an mbe min kɔɔ.”