Read Kono KO Ɔ NUNDENƐ 18 Bible Online

KO Ɔ NUNDENƐ 18 - Kono bible

KO Ɔ NUNDENƐ 18

¹An musu chɛ yendenɛ gbakɔ, mbɛ n‑na maeka dɔ mende yen to yii‑a, a ka banda bu ɔ. Gbasaya min ni a boo ɔ, a ni koo kaka. A sin, dunya gbɛɛ ɔ kaen fan ni wandaun, a 'a manɛ a.

²Mbɛ maeka chɛ‑a chee chɛ gbankon, a ɔ, “A teen fan mu, Babidon duu wa chɛ teen fan mu. A ma‑a gbɛ nyina yama n baa a, nyina yama kan kɔ kan bɛn tena, konde yama n gbɛɛ waa a.

³Dunya gbɛɛ‑a Babidon 'na gbɛ yama chɛ min, a 'a gbɛ yama min mbe yiima yama ma munda ka, a bɛbɛɛ ko tɛ. Dunya ma mansa gbɛɛ, an‑na waa ma basan a a, yua mɔɛ n nyan‑da a ɔ, a kunɛ a fuindenɛ ɛ duu diaya a.”

⁴Mbɛ n‑na kuiɛ dɔ mende a min to gbankon, banda bu ɔ, a ɔ, “N 'na mɔɛ nu, wo ka a fɛ, wo bɔ a ɔ, wo ni tanka a 'a ko yama ma koe ma, wo ni tanka a 'a kasaa n ma Yataa boo ɔ.

⁵A 'a ko yama kɔnkɔɛ che‑a banda bu ɔ, Yataa sin ma nyina ni a gba yama n ma.

⁶A bia ka wan, yɔ a‑a mɔɛ n bia buɛ min dɔ, a‑a min si mɔɛ n na, a si‑a gba fea ko a. A‑a gbɛ a kɔɔenɛ min be mɔ dɔ mende n ma, gbɛ min gbasa a ma, gba fea ko a, a fa a 'a kɔpu a.

⁷Tɔɔya be a ma kaka, a basan faayɔnɛ a, a ni ka a 'a dɔpanda nyan tɔ fɔɛ min gbɛɛ ɔ, a nyɔn sima tɔɔya ni si a a. A ni a yonka wan tima ɔ tima, a ɔ, ‘N yen ko si ɔ n 'na mansaya wa ɔ, fuinya musu ma n na, n sin mbe ee fuinya musu di chɛ‑a fion.’

⁸Chɛ ko a, kasaa sɛsɛ ɛ a tan‑da tee dɔndɔɛ an kɔɔ, saya, faayɔnɛ, a basan kɔnkɔ ma chianden ba a. A sin, ta an mbe a minda‑a, Yataa Mansa faa tɛ buɛ chɛ a ma, Yataa min mbe kaa a tɛ a wakoe ma, a gbasaen mu.”

⁹Mbɛ dunya ma mansa chɛ nu, miin‑na waa ma basan a a, a 'a duu diaya chɛ ɔ, an mbe di chɛ‑a wan, an 'na duu wa chɛ ko a. Ni an‑na a sisi yen bɔ‑a, an mbe di chɛ‑a wan, aan an ya ni yawa.

¹⁰An mbe sɔ‑a wan pɔɔ, an mbe chian‑da, an ma na tɔɔya chɛ ɔ bia, ɛ min dɔ. An mbe a fɔ‑a wan, an dɔ, “Kasaa ma chianden mu gba, kasaa ma chianden mu gba, i duu wa gbasayaen ba chɛ ko a. I wan Babidon duu chɛ, awa dɔndɔ gbe kɔɔ ka, i tɔɔ‑a ka.”

¹¹Yua mɔɛ miin gbɛɛ, an mbe dunya ma, an mbe di chɛ‑a wan a ko a, koe min na mu, mɔ ɔ mɔ ee to nɔ an 'na fee n chɛ koe a.

¹²An 'na sanu chɛ nu, kain chɛ nu, yɔɔɛ nu an basan fen baa gbanden dɔ mende n na. A yɛ to, koa nyima kani kani kan kɔ kan, ni kɔn kunyɛ a diama kani kan kɔ kan, a basan fenɛ sɛsɛ a, miin nyanden ni kama nyinɛ ɔ. Fenɛ kani kani kan kɔ kan ni wan nɔ, a ka gbɛ kɔn baa gbandenɛ ma, a ta fen chɛ n tena miin nyanden mu kundu ɔ, miin bɛɛ nyanden mu sen baa gbandenɛ ɔ, a basan fen baa gbanden dɔ mende a.

¹³A yɛ to, fenɛ miin mbe chɛ da ɔ, daun fenɛ dia koe a, an ni wan nɔ. Tu kunyɛ a diama kani kani kan kɔ kan, a basan pɔɔda kani kan kɔ kan na, an baa gbanden ba. Gbɛ wɛɛ, a basan tu a, min ni bɔ wodifi kɔnɛ gbɔɛ ɔ, ni feawa, a basan fen chɛ a, ɛ nyan fenɛ min dɔ. Ninchi n bɛɛ, an basan sa n na, soo nu, an basan mɔto gbingbi chɛ n na, soo n mbe miin sawan ka. Mɔɛ n bɛɛ ni wan nɔ, miin ni yɔnɛ n na, an basan mɔɛ n na, miin bia‑a chɛɛ ɔ.

¹⁴Mbɛ yua mɔɛ chɛ n‑na a fɔ a ma, an dɔ, “I faa ma fen chɛ n gbɛɛ, an tuin‑da i ma, i 'a nyanɛ gbɛɛ, fenɛ miin gbɛɛ, miin mbe i 'a gboo ma nyanɛ kun ma chɛ, i fo‑a an na kuɔ fɔ ko a. A sin, an ma ee sɔn‑da to kuɔ fɔ.”

¹⁵Yua mɔɛ chɛ nu, miin ta mu fee fen ba chɛ n na, miin‑na duu chɛ 'a nyanɛ ɔ daun ka, an mbe ee gbɛn‑da a ma. An mbe sɔ‑a wan pɔɔ, an mbe chian‑da a 'a tɔɔya ma, chɛɛ an mbe di chɛ‑a wan a ko a, aan an ya yii ni bɔn.

¹⁶Mbɛ an dɔ, “Kasaa ma chianden mu gba, kasaa ma chianden mu gba, duu wa gbasayaen ba chɛ ko a. Duu min ma bɛndenɛ ɛ koa kani kani n dɔ, an baa gbanden ba nu, a yawaenɛ nu. A ni man tena sanu an na, sen baa gbanden ba nu, a basan fen baa gbanden dɔ mende n na.

¹⁷Awa dɔndɔ gbe kɔɔ, nyan chɛ gbɛɛ kasaa‑a.” Dɛndɛ wa ti nu, dɛndɛ chɛ n wii mɔɛ n gbɛɛ, yii a ta yua n gbɛɛ, mɔɛ gbɛɛ sɔ‑a pɔɔ.

¹⁸An‑na sisi yen kɛn bɔ‑a, an‑na yee tɛ wan gbankon, an dɔ, “Duu wa ma ben nin bɛ duu chɛ ma.”

¹⁹Mbɛ an‑na sanka boo sin an ma, an kunɛ gbɛɛ a, an mbe ta‑a saya di chɛ‑a gbafi gbafi, an dɔ, “Kasaa ma chianden mu gba, kasaa ma chianden mu gba, duu wa gbasayaen ba chɛ ko a. Mɔɛ n gbɛɛ, dɛndɛ wa ni miin boo ɔ kɔ yii a, duu min 'na nyanɛ pɔpɔɛ‑a an nyan, awa dɔndɔ gbe kɔɔ, a kasaa‑a ka.”

²⁰Wo wɛn mbe banda bu ɔ, wo buɔdia bɔ, Babidon yɔn koe a Yataa boo ɔ. Yataa 'a mɔɛ nu, Chisɔsi 'a sɔ mɔɛ gbau gbau nu, wo buɔdia bɔ, wo bɛ Yataa 'a gbonka chɛ mɔɛ n gbɛɛ a. Koe min na mu, Yataa‑a kaa a tɛ Babidon duu wa chɛ ma koe chɛ n ko a, a na‑a miin ma wo a.

²¹Chɛ gbakɔ, maeka dɔndɔ min ni gbasa, a‑a sen gbugbu wa ya, mbɛ a‑a a a dɛ kɔ yii ɔ, a ɔ, “Babidon duu wa chɛ, ɛ kasaa‑a ka wan gbasaya ɔ. Ɛ ma‑a duu wa tombo an na kuɔ fɔ.

²²Kɔninka kuiɛ, a basan mɔ gbu n ta a, koee fɛ mɔɛ nu, an bɛ buu fɛ n na, an na ee min‑da to nɔ. Wai chɛ mɔ ee ma‑a a ɔ, wai ee ma‑a, min mbe to‑a nɔ. Daun fen tu kuiɛ ee bɔ‑a to a ɔ.

²³Dambo wɛɛ ee manɛ be‑a to nɔ. Musu fuu mɔɛ nu, an 'na sɛnama nu, an kuiɛ a ee min‑da to nɔ. A 'a yua nu, an kan nyɔn nii dunya ɔ, a 'a suaya wa, a‑a dunya bun fan.”

²⁴Yataa 'a mɔɛ n wii, a 'a gbonka chɛ mɔɛ n wii, a bɔn‑da nɔ, a sin‑na duu chɛ kasaa. An‑na mɔɛ miin gbɛɛ fa dunya ma, a boo ni wan an dɔ.