Read Kono KO Ɔ NUNDENƐ 19 Bible Online

KO Ɔ NUNDENƐ 19 - Kono bible

KO Ɔ NUNDENƐ 19

¹Maeka chɛ da a kuiɛ chɛ gbakɔ, a ma‑a wan yɔ n‑na mɔ fanka wa kuiɛ a min bɔ‑a gbankon, a ka banda bu ɔ. An dɔ, “Mmɔ Yataa tando, mmɔ 'a mansa, bauncha ɛ an boo ɔ, basɔmaya wɛɛ, a basan gbasaya a.

²A 'a kaa a tɛ, tea ɔ, danaya ɔ. A‑a kaa a tɛ duu dia wa chɛ wakoe ma, dunya ɔ chɛ chɛ duu chɛ, ko tɛ a. A 'a mɔɛ n wii ko a, a‑a tɔɔya sa duu chɛ ma.”

³Mbɛ fanka wa chɛ kuiɛ bɔ‑a to gbankon, an dɔ, “Mmɔ Yataa tando, duu chɛ minda sisi, a tɛ ee tɛ tena kuɔ fɔ.”

⁴Mbɛ gbakoo bi fea kun ma naanin chɛ nu, an bɛ fɔɛ fen naanin chɛ n na, an‑na an kumbai gbangban, an‑na Yataa tando, min mbe si ɔ a 'a mansaya sea a. An dɔ, “A ni ma ka. Tando ni be Yataa ma.”

⁵Mbɛ mansa sea chɛ tena, mɔɛ kuiɛ bɔ‑a nɔ, a ɔ, “Wo gbɛɛ, wo mmɔ 'a Yataa tando. Wo wɛn gbɛɛ mu a 'a wai chɛ mɔɛ n na, yɔn tɔɛ nu, nyan tɔɛ nu, wo wɛn mbe chian Yataa ma.”

⁶Mbɛ a ma‑a, yɔ n‑na mɔ fanka kuiɛ a min. An kuiɛ chɛ maen fan ni gbankon, yɔ yii tu kuiɛ waa a, chɛ ma, banda tu kuiɛ gbau gbau. An dɔ, “Mmɔ Yataa tando, mmɔ 'a mansa, gbasaya mansa wa mu an na.

⁷Mmɔ bu ɔ ni dia, mmɔ ni buɔdia wa bɔ, mmɔ ni basɔmaya be a ma. Sa tɔngbɔɛ 'a musu fuu tima che‑a, a sin, a 'a sɛnama‑a a ma bɛn, a fuu koe gbu a.

⁸Sɛnama koa min be‑a a ma, a ni nyin, ɛ man‑da.” Koe min na mu, koa gbɛ chɛ‑a a ɔ yian fan, mbɛ Yataa 'a mɔɛ n chɛ chɛ wai an fan nɛ.

⁹Mbɛ maeka chɛ ɔ te n ma, a ɔ, “Chɛ nyɛn gboo ɔ. Mɔɛ chɛ n duaen mu, miin cheeen mu sa tɔngbɔɛ 'a musu si tena, daun chɛ koe a.” Mbɛ maeka chɛ‑a a fɔ to n ye, a ɔ, “Bai chɛ nu, min fɔ‑a ka, Yataa da a bai chɛndɛ chɛndɛ n fan nɛ.”

¹⁰Mbɛ n‑na n kumbai gbangban a chen kɔɔ, a fai koe a. Chɛɛ a ɔ te n ma, a ɔ, “I ma chɛ ma. Yataa an fai. N mbe wai chɛ an ko a, yɔ wo e wai chɛ buɛ min dɔ a ko a. Wo gbɛɛ, wo wɛn kai faen mu tea chɛ a, min ka‑a Chisɔsi tena. An tea chɛ, an mbe a ma, mɔɛ n ni Yataa bai sa.” Koe min na mu, Chisɔsi‑a bai min fɔ, an mu Yataa 'a sakana bai kunɛ a mɔ gbu n tena.

¹¹Chɛ gbakɔ, n‑na banda bu ɔ yen a a kaenɛ ɛ. Mbɛ a yen ko, soo gbɛ ɛ nɔ. Mɔɛ min mbe si ɔ an soo chɛ kun ma, a tɔ mu Danaya ni Tea. A sin, kaa min ɛ a a tɛ, tea an mbe ma a ɔ, a sin mbe ee ta chɛɛ ɔ fania kun ma.

¹²A ya ni wan yɔ ta sanku manɛ, a kunɛ sin na, mansa banfua sɛsɛ an ni si ɔ a a. A gboo wɛɛ ma, tɔɛ nyɛnden fan ni a ma, mɔ ɔ mɔ ma min sɔn, fɔ a dɔndɔ gbe dechee.

¹³Mbɛ a yɛ to, doma kai min ni a ma, a chimaenɛ ni wii a dɔgbɔ dɔgbɔ. A mɔɛ chɛ sin tɔ mu, Yataa Da 'a Bai.

¹⁴Soya mɔɛ miin sin ni banda bu ɔ, an‑na an gbee gbasi wan a gbaa chia a, an mbe si ɔ soo gbɛ an kun ma. An ma bɛndenɛ ɛ koa nyima ɔ, a gbɛenɛ ɛ fo fo.

¹⁵Yataa Da 'a Bai chɛ da ɔ, chɛɛ chɛ mɛ a saenɛ chɛndɛ chɛ, a bɔ‑a wan a ɔ. Ɛ an mɛ chɛ an ya tena, a ni kun dunya gbɛɛ ma chɛɛ ɔ. Ɛ ma‑a wan dunya kun ma mansa a, a sin mbe ee a 'a mansaya a tachɛ‑a chinchincha ɔ. A yɛ to, ɛ tɛn tɛn‑da wan fen chɛ ma bondonɛ ɔ, fen chɛ min tɔ mu keepi, a yii bɔ koe a a ɔ. Ɛ ma‑a ka Yataa 'a faatɛ wa an dɔ yian‑da.

¹⁶Doma kai chɛ min ni a ma, a woo kun ma, tɔɛ an nyɛnden ni a ma, min ni Mansa Wa 'a Mansa a.

¹⁷Mbɛ n‑na maeka yen, ɛ sɔ ɔ tee ɔ, ɛ yee tɛ‑a konde n tena ben‑da banda a. A ɔ, “Wo na, wo a ni kan Yataa 'a daun chɛ bɛn ba chɛ ko a.

¹⁸Wo na, wo ni mansa n gboo daun, wo ni soya mansa n bɛɛ gboo daun, an bɛ an 'na soya mɔɛ n na. A yɛ to, soo n gboo wɛɛ, a basan soo ti n bɛɛ a, mɔɛ gbɛɛ gboo, yɔnɛ nu an bɛ chɛ n na, miin ma yɔn na, nyan tɔɛ n bɛ yɔn tɔɛ n na.”

¹⁹Mbɛ n‑na soe yama wa chɛ yen, an bɛ dunya ma mansa n na. An 'na soya mɔɛ n na sɔnden fan ni gbɛ, chɛɛ bun koe a mɔɛ chɛ ma, min ni si ɔ soo chɛ kun ma, an bɛ a ta soya n na.

²⁰Mbɛ an‑na soe yama chɛ bia wan, an fea fania fɔ mɔɛ chɛ a, min ni a wandi ya Yataa 'a gbonka chɛ mɔɛ a. A‑a kamaya koe n ma wan an soe yama chɛ ya kɔɔɛ ma. An koe chɛ n fan na‑a mɔɛ chɛ n bun, miin na‑a soe yama chɛ 'a nyɛnɛ sa an ma, miin bɛɛ na‑a fen chɛ fai, fenɛ min bɔen ni soe yama chɛ a. Soe yama chɛ, an fea soe yama fean bɔɛ chɛ a, an na dɛ‑a wan ta man ba chɛ ɔ, sen gbandima wa faen ni min na.

²¹An 'na soya mɔɛ n tana, chɛɛ chɛ mɛ a saen chɛ, min bɔ‑a mɔɛ chɛ da ɔ soo gbɛ chɛ kun ma, a‑a an gbɛɛ fa wan. Konde n gbɛɛ, an bu ni te tena wan an su daunɛ a.