Read Kono KO Ɔ NUNDENƐ 20 Bible Online

KO Ɔ NUNDENƐ 20 - Kono bible

KO Ɔ NUNDENƐ 20

¹Chɛ gbɛɛ gbakɔ, mbɛ n‑na maeka dɔ mende yen yii‑a, a ka banda bu ɔ. Chi ɛ a boo a, son dɔ yansama wa chɛ, min danka ee ka, min mbe a da a ka. Kundu yɔɔɛ fankama wɛɛ, a ni wan a boo a.

²Mbɛ a‑a fɔɛ fen chɛ bia gban, fɔɛ fen ma chianden ba chɛ. An fɔɛ fen chɛ mu ka kɔkɔ wa chɛ an na, nyina yama n 'na mansa chɛ, min tɔ mu Sitana. Mbɛ maeka chɛ‑a a chii fɔin kundu yɔɔɛ chɛ a, san wu dɔndɔ (1,000) ko a.

³Mbɛ a‑a a a dɛ son dɔ yansama wa chɛ ɔ, a‑a a da bun a a, mbɛ a‑a son chɛ da a tɔn gban. Chɛ ɛ a ma‑a wan, a ee dunya bun‑da to kuɔ fɔ, aan san wu dɔndɔɛ (1,000) chɛ ni ban. Chɛ gbakɔ, a ɛ fuin‑da wan tima kundu ɛnden ko a.

⁴Mbɛ n‑na mansa sea n yen, mɔɛ miin sin ni si ɔ an sea chɛ n na, gbasaya been fan ni an ma, ma koe a mansa n na. A yɛ to, mɔɛ chɛ nu, an‑na miin kunɛ tɛ a a, sɔ koe a gban Chisɔsi ko a, a basan Yataa bai sa a, n‑na an fuɛ n yen fan. An mɔɛ chɛ nu, an nii ma soe yama chɛ fai ni, an nii ma fen chɛ wɛɛ fai ni, fenɛ min bɔen ni a a. A yɛ to, an nii ma soe yama chɛ 'a nyɛn chɛ sa ni an ya kɔɔ, an ma a sa ni a boo wɛɛ ma. An mɔɛ chɛ n yɛ‑a wan to fɔɛ ɔ, an ma‑a mansa a, san wu dɔndɔ (1,000) ko a, an bɛ Chasi a, kunka mansa.

⁵Tima saa saa an nɛ, Yataa‑a a ma, mɔɛ n yɛ‑a to fɔɛ ɔ. Mɔɛ tɔɛ nu, miin faen ni, an ma yɛ ni to fɔɛ ɔ, aan san wu dɔndɔɛ ban‑da.

⁶Yataa‑a miin na sɔ a ka saya ɔ tima chɛ a, an duaen mu chɛndɛ chɛ, Yataa 'a mɔɛ mu an na. An mbe ee saya fean bɔɛ chɛ‑a, chɛɛ an mbe ma‑a wan mɔɛ n na mɔ gbu n tɛ ɔ Yataa a, an fea Chasi a, kunka mansa. An bɛ Chasi a, an mbe ma‑a wan mansaya ɔ san wu dɔndɔ ko a.

⁷A sin, ni san wu dɔndɔɛ (1,000) chɛ ban‑da, Sitana ɛ fuin‑da wan, a bɔ bia ɔ.

⁸A sin, ɛ ta‑a wan ben‑da mɔɛ n bun‑da, mɔɛ miin na fasandenɛ ɛ kan kɔ kan dunya ɔ. An mɔɛ chɛ dɔ n tɔ mu Koki, dɔ n tɔ mu Makoki. Sitana ɛ an gbɛɛ a kan‑da wan kaina chɛ, an mbe butuinɛ chɛ‑a kaina min. An kɔ ɛ koa‑a wan kaka, dan mbe ee ma‑a an ma.

⁹Mbɛ an fasan‑da a ɔ, duu gboo ɔ fuinden ba ta‑a. Mbɛ an‑na duu wa chɛ a tindan, Yataa toen mu duu min na, a 'a mɔɛ n mbe ka duu min dɔ. Chɛɛ ta yii‑a wan, a ka banda bu ɔ, mbɛ a‑a an gbɛɛ minda, an fɛn gbɛɛ‑a duu chɛ a tindan ka.

¹⁰Nyina yama n 'na mansa chɛ sin, min na‑a an bun ka, a a dɛ‑a wan ta man ba chɛ ɔ, sen gbandima wa chɛ ni ka min dɔ. Ta chɛ ɔ ni, an‑na soe yama chɛ a dɛ min dɔ, an fea fania fɔ mɔɛ chɛ a, min ni a wandi ya Yataa 'a gbonka chɛ mɔɛ a. Su ɔ tee a, an gbɛɛ sin mbe ma‑a tɔɔya an dɔ, ta chɛ ɔ, kuɔ fɔ ko a.

¹¹Mbɛ n‑na mansa sea wa dɛgbɛ yen banda bu ɔ, a gbɛenɛ fion, Yataa ɛ si ɔ a ma. A bɔ‑a kɛn dechee a a, duu gboo fea banda a, an tuin‑da, mɔ ɔ mɔ ma an yen ni to.

¹²Mbɛ mansa sea chɛ ya kɔɔ to, n‑na mɔɛ n yen fan sɔ ɔ, yɔn tɔɛ n bɛ nyan tɔɛ n na, miin na‑a fa tee. Gboo n bɛɛ da a kaen fan ni, mɔ gbu gbɛɛ dunya ma, an chɛ chɛ wai nu, an nyɛn‑da gboo miin dɔ. Mbɛ gboo dɔ mende wɛɛ da a kaen fan ni, mɔɛ n tɔɛ ni gboo min dɔ, mɔɛ nu, miin mbe ma‑a fɔɛ ɔ kuɔ fɔ ko a Yataa chen kɔɔ. Mɔɛ chɛ n gbɛɛ, miin na‑a fa, kaa a tɛ‑a wan an bakoe ma. Dɔndɔ dɔndɔɛ a, mɔ ɔ mɔ na‑a min ma dunya chɛ ɔ, a nyɛndenɛ ɛ gboo chɛ ɔ, kaa a tɛ‑a an ma.

¹³A tima chɛ a, mɔɛ miin na‑a to yii ɔ tee, an bɔ‑a wan. Mɔɛ chɛ n bɛɛ, miin ni faa a, an bɔ‑a wan. An gbɛɛ ta‑a wan Yataa chen kɔɔ, kaa a tɛ koe a an bakoe ma. Kaa chɛ a ɛ tɛ‑a, a ka an chɛ chɛ wai n fan ma dunya ma.

¹⁴Mbɛ saya fea faa a, an na dɛ‑a ta man ba ɔ. Ta wa chɛ ɔ ta, an mu saya fean bɔɛ a, a dankama.

¹⁵A sin, mɔ ɔ mɔ min tɔɛ nii ma bɔ ni gboo chɛ ɔ, mɔɛ miin‑na kuɔ fɔ fɔɛ ma sɔn, an tɔɛ ɛ gboo min dɔ, an mɔɛ chɛ a dɛ‑a wan ta man ba ɔ.