Read Kono KO Ɔ NUNDENƐ 21 Bible Online

KO Ɔ NUNDENƐ 21 - Kono bible

KO Ɔ NUNDENƐ 21

¹Chɛ gbakɔ, mbɛ n‑na dunya nama yen, a mu min na, dunya saa tuin‑da wan. A sin, dunya nama chɛ ɔ, kɔ yii ee a ɔ.

²Mbɛ Chuusaɛn bɛɛ, Yataa 'a duu wa chɛ, n‑na a wɛɛ nama yen, ɛ yii‑a a ka Yataa tena banda bu ɔ. An duu wa chɛ, a ma bɛnden fan ni, a ma chiienɛ ɛ chɛndɛ chɛ, yɔ ni sɛnama ma bɛn‑da a chɛɛ ko a.

³A sin, n‑na mɔɛ kuiɛ a min fan gbankon, a ka mansa sea chɛ tena, a ɔ, “A yen ko, Yataa waa ɛ ma tena gbɛ mɔ gbu n tɛ ɔ wan. An bɛ an mbe ma tena gbɛ an na, an sin mbe ma‑a a 'a mɔɛ n fan na. A wan Yataa wandi, ɛ ma‑a wan an tɛ ɔ, an mbe ma‑a an 'na Yataa a.

⁴Ɛ di gbɛɛ ka‑a wan an ya a. Saya ee ma‑a to nɔ, n mbe ee baa sanka di chɛ koe ma, chɛ ma, di gbama gbama, tɔɔya wɛɛ ee ma‑a nɔ. Koe min na mu, koe kɔma n gbɛɛ, miin ni ma tee, an gbɛɛ ban‑da tuin‑da.”

⁵Yataa wɛn sin ni si ɔ a 'a mansa sea a, a ɔ, “A yen ko, n‑na fen fen ma a nama a gbɛ.” Mbɛ a ɔ te to n bɛɛ ma, a ɔ, “Chɛ nyɛn bɛ, koe min na mu, bai chɛ n mu tea bai n fan na, a nyin mɔ ɔ mɔ ni dan miin na.”

⁶Mbɛ a ɔ te n ma to, a ɔ, “N ban‑da koe chɛ n gbɛɛ chɛ‑a. N fan mbe a ma fen fen mbe a kuu sɔ, n fan mbe a ma to fen fen mbe danka. Mɔ ɔ mɔ min kanɛ a gbaaen mu, n mbe yii be‑a wan a ma. N mbe yii be‑a wan an ma, min ka‑a yii chɛ ɔ, yii min mbe fɔɛ be mɔɛ ma gbama gbama ko a.

⁷Mɔ ɔ mɔ min mbe sɔ‑a gban n ko a, koe chɛ n gbɛɛ, n mbe an fan chɛ‑a a ko a. N mbe ma‑a wan a 'a Yataa a, a wɛɛ ɛ ma‑a wan n 'na denɛ a.

⁸Chɛɛ mɔɛ chɛ n tana, an gbɛɛ, an baa ɛ ma‑a ta man ba chɛ an na, sen gbandima chɛ ɛ ka min dɔ. Mɔɛ chɛ nu, miin mbe chian sɔ koe a gban Chisɔsi ko a, miin mbe sɛmbɛ dan koe a Chisɔsi a, a basan chɛ n na, miin mbe ko yama sɛsɛ ma. A yɛ to, mɔ fa mɔɛ chɛ nu, ko yama tɛ mɔɛ nu, sua chɛ nu, miin mbe fenɛ n fai, miin ma Yataa a, an bɛ fania fɔ mɔɛ n gbɛɛ a. An mbe ma min chɛ‑a ta chɛ ɔ, an mu an 'na saya fean bɔɛ a, a dankama.”

⁹Mbɛ maeka wɔnfea chɛ nu, an dɔndɔ na‑a. Maeka chɛ nu, pani wɔnfea chɛ n ni miin boo ɔ, kasaa wɔnfea dankama chɛ n faen ni pani miin na. Mbɛ an maeka chɛ koɔ‑a n tena, a ɔ, “Na wɛ, n mbe sɛnama chɛ yian i a, min mbe na tena ma‑a sa tɔngbɔɛ 'a musu a.”

¹⁰Mbɛ Yataa Nyina bea‑a n fɛ gban, mbɛ maeka chɛ sɛ‑a n na kɔnkɔ a yansama wa ɔ. Mbɛ a‑a Yataa 'a duu wa yian n na, Chuusaɛn duu wa chɛ, ɛ yii‑a a ka banda bu ɔ Yataa tena.

¹¹An duu chɛ ni man tena wan, Yataa 'a manɛ a. A ni man tena taun, yɔ dɛmunɛ. Ɛ ma‑a mia mia yɔ mɛmɛ.

¹²An duu wa chɛ ma sansaen fan ni fɛnsi a, min nyanden ni senɛ a, a a yansama wa ɛ. A yɛ to, a a ni fanka wan gbɔtu gbɔtu, a da tɛenɛ ɛ kaina tan kun ma fea. A da tan kun ma fea chɛ kan kɔ kan, maeka dɔndɔ ni wan sɔ a a, duu chɛ kun ma fɛn koe a. A yɛ to, a da tan kun ma fea chɛ kan kɔ kan ma, dambi tan kun ma fea chɛ nu, Isɔɛɛ mɔɛ n tɛ ɔ, an nyɛnden fan ni ta‑a dɔndɔ dɔndɔɛ a.

¹³Fɛnsi da sawa an ni tee bɔ, sawa ɛ tee bea, sawa ɛ boo nyima ɔ, mbɛ sawa ɛ man dɔɛ.

¹⁴Fɛnsi chɛ, duu chɛ a tindanɛ, a kuu sien ni sen gbugbu wa tan kun ma fea an ma. An senɛ chɛ n kan kɔ kan ma, sa tɔngbɔɛ 'a sɔ mɔ tan kun ma fea, an tɔɛ nyɛnden fan mu an ma. Sɔ mɔ dɔndɔ, sen dɔndɔ.

¹⁵Maeka chɛ sin, min ni koɔ tena n tena, kɔn sɔngbɔɛ an ni a boo a. An kɔn chɛ nyanden ni sanu an na, a sin ni fen siman koe an na. A ni duu wa chɛ gbɛɛ siman koe an na, a fɛnsi gbɛɛ siman koe a, a basan a da tan kun ma fea chɛ n na.

¹⁶Duu chɛ sɔngbɔya, a basan a fanaya a, an ni dɔndɔ gbe. Maeka chɛ‑a a 'a kɔn chɛ ya wan, mbɛ a‑a duu chɛ siman a a. A sɔngbɔya ni wan mai wu dɔndɔ, ni chɛmɛ duu (1,500).[9] A fanaya wɛɛ, a basan fɛnsi a yansancha a, an bɛɛ ni ka wan yɔ a sɔngbɔya.

¹⁷Maeka chɛ‑a duu chɛ fɛnsi chɛ wɛɛ siman fan. A sin, a yansancha ni fiti chɛmɛ fea, fiti tan kun ma wɔdɔ (216).[10] A tima chɛ a, maeka chɛ na‑a a ya, mɔgbuya ta fen siman buɛ an na.

¹⁸An fɛnsi chɛ, a sɔen ni dɛmun senɛ n fan na. Fen kɔ fen min sin ni an duu wa chɛ ɔ, an nyanden ni sanu an na, an mbe man mia mia yɔ mɛmɛ.

¹⁹Fɛnsi chɛ min tindandenɛ ni duu wa chɛ a, a kuu sien ni sen gbugbu miin ma, an ma chɛen fan ni sen baa a gbandenɛ a, a ma kawaenɛ kani kani n na. An sen chɛ saa saa ni dɛmunɛ an na, a fean bɔɛ ni senɛ chɛ an na, an mbe min chee, an dɔ, safai. A yɛ to, a sawan bɔɛ tɔ ni, akɛti senɛ, a naanin bɔɛ ni ɛmɛyadi senɛ an na.

²⁰A duun bɔɛ ni wɔnisi senɛ an na, a wɔdɔn bɔɛ kanidian, a wɔnfean bɔɛ, kisodaiti, a sɛin bɔɛ, bɛyi, a kɔnɔntɔn bɔɛ, topasi, a tan bɔɛ, kisopesi, a tan kun ma dɔndɔn bɔɛ, chasinti, a tan kun ma fean bɔɛ chɛ sin tɔ ni, amɛtisi.

²¹An fɛnsi chɛ da tan kun ma fea n gbɛɛ, an nyandenɛ ni sen baa gbandenɛ nyima nyima, kani dɔndɔ an na. A da dɔndɔ kan kɔ kan, a nyandenɛ ni an senɛ chɛ dɔndɔ an na. Chia miin sin gbɛɛ ni an duu wa chɛ ɔ, an nyanden ni sanu chɛndɛ chɛndɛ an na, an maenɛ ɛ mia mia yɔ mɛmɛ.

²²A sin, n ma Yataa 'a chenɛ kan kɔ kan yen ni an duu wa chɛ ɔ, samun chɛ koe a. Koe min na mu, Yataa Mansa wandi, an fea sa tɔngbɔɛ a, an fan mu gbɛ an chen chɛ a, an duu chɛ ɔ.

²³A sin, tee ma gbɔsɔ nii an duu chɛ ma, kau ma gbɔsɔɛ wɛɛ nii a ma. Koe min na mu, Yataa 'a manɛ ɛ wan a ɔ, a yɛ to, sa tɔngbɔɛ wɛɛ ɛ manɛ be wan a ma, yɔ dambo ɛ manɛ be buɛ min dɔ.

²⁴Mɔɛ miin gbɛɛ, an mbe dunya ɔ, an mbe an man chɛ an dɔ, duu wa chɛ a man chɛ. A sin, dunya ma mansa n mbe na‑a wan an 'na nyanɛ n na a ɔ.

²⁵An duu wa fɛnsi chɛ da chɛ n na kaenɛ ɛ ma‑a wan tee ɔ tee a, an na ee tɔn‑da kuɔ fɔ ko a, koe min na mu, pimbi ee ma‑a nɔ.

²⁶Mɔɛ n gbɛɛ dunya ma, an mbe na‑a wan an 'na nyan fen ma kawaenɛ gbɛɛ n na duu wa chɛ ɔ.

²⁷Chɛɛ ko yama kan kɔ kan mbe ee don‑da an duu chɛ ɔ, n mbe ee baa mɔɛ ma, min mbe mauma koe n ma, chɛ ma, fania fɔ mɔɛ nu. Chɛɛ mɔɛ miin mbe don‑da dechee, an nɛ yɔ mɔɛ chɛ nu, miin tɔɛ nyɛnden mu sa tɔngbɔɛ chɛ 'a gboo ɔ. Gboo chɛ, mɔɛ miin mbe kuɔ fɔ fɔɛ ma sɔn‑da, an tɔɛ ɛ ka min dɔ.