Read Kono KO Ɔ NUNDENƐ 5 Bible Online

KO Ɔ NUNDENƐ 5 - Kono bible

KO Ɔ NUNDENƐ 5

¹Min ma‑a gbɛ, mbɛ a wɛn mbe ka si ɔ mansa sea chɛ a, n‑na fenɛ yen a boo nyima a. An fen chɛ ni gboo yamba an na, fenɛ nyɛndenɛ ɛ a ya fea gbɛɛ ma. A a mendemende n fan ni, a a chiienɛ ɛ gba wɔnfea.

²Mbɛ n‑na maeka gbasaen ba yen, ɛ tisa chɛ‑a, a kuiɛ ma sɛenɛ a, a ɔ, “Gbasaya bɛnden mu nyɔn ma, yuu tɛ koe a gboo chɛ ma, a ni a a fuin?”

³Chɛɛ mɔ ɔ mɔ nii ma bɔ ni banda bu ɔ, min ni yuu chɛ tɛ gboo chɛ ma, a ni a ɔ fɛn. Mɔ ɔ mɔ nii ma bɔ ni dunya wɛɛ ma, a basan faa a, min ni chɛ ma.

⁴N‑na chinchima di chɛ wan, kɛn mɔ ɔ mɔ ma a gbasaya chɛ ma sɔn ni yuu chɛ tɛ koe a, gboo chɛ ɔ ni fɛn.

⁵Mbɛ gbakoo chɛ n dɔndɔ‑a a fɔ n ye, a ɔ, “Sɛmbɛ di chɛ‑a. A yen ko, an mbe a wɛn chee, an dɔ, Chuda dambi ɔ mɔɛ n 'na yaa, a wan bɔ‑a Mansa Defidi 'a dambi ɔ, a kun‑da a chɛɛ ma nyɔɛ n ma. Chɛ an‑na a fɔ, ɛ kun fan a ni yuu wɔnfea chɛ n tɛ gboo chɛ ma, a ni a ma fɛn.”

⁶Mbɛ n‑na sa tɔngbɔɛ yen sɔ ɔ, mansa sea chɛ tɛ ɔ fɔɛ fen naanin chɛ n na, gbakoo chɛ n tɛtɛ ma. Sa chɛ bena ni wɔnfea, a ya wɛɛ ni wɔnfea, miin ni Yataa 'a nyina wɔnfea chɛ n na,[4] miin na naen mu dunya gbɛɛ ɔ. A maen fan ni yɔ sa min faenɛ yasi a.

⁷Mbɛ sa tɔngbɔɛ chɛ ta‑a gboo chɛ bia, a boo nyima chɛ a, a wɛn ni ka si ɔ mansa sea chɛ a.

⁸Sa tɔngbɔɛ chɛ‑a a bia kɛn, mbɛ fɔɛ fen naanin chɛ nu, an bɛ gbakoo bi fea kun ma naanin chɛ n na, an‑na an kumbai gbangban a chen kɔɔ. Kɔninka an ni gbakoo chɛ n gbɛɛ boo a, ni sanu pani nu. Fen kunyɛ a diama an ni pani chɛ n gbɛɛ ɔ. Fen kunyɛ a diama chɛ n sin ni samunɛ an na, Yataa 'a mɔɛ n ni miin chɛ.

⁹Mbɛ an‑na si nama a bɔ, an dɔ, “Gbasaya bɛnden mu i wan ma, gboo chɛ bia koe a, yuu tɛ koe a a ma. An‑na i wan fa, i 'a saya chɛ sin‑na a ma, i‑a mɔ gbu gbɛɛ kun ka Yataa ko a. Chɛ nu chɛnyɛ kunɛ n dɔ, chɛnyɛ koɛ n dɔ, ni dambi nu, an bɛ mɔ gbu kan kɔ kan na.

¹⁰I‑a an ma mɔɛ n na, Yataa 'a mansaya kɔɔ, tɛ mɔɛ mu miin na, miin mbe ma‑a mansa a dunya chɛ kun ma.”

¹¹Mbɛ n‑na n ya a ta to, mbɛ n‑na maeka n kuiɛ a min, an wu sɛsɛ, dan mbe ee an ma. An ni sɔ ɔ mansa sea chɛ 'a tindanɛ wan, fɔɛ fen chɛ n na tindanɛ, a basan gbakoo chɛ n na.

¹²An mbe dau‑a si a, an dɔ, “Basɔmaya bɛnden mu i wan ma, sa tɔngbɔɛ chɛ, an‑na min fa. Tando bɛnden mu i ma, gbasaya bɛnden mu i ma, a basan nyanɛ a, yiimatɛ wɛɛ to, a basan dɔgbɛaya a. Chɛ bɛnden mu dechee i wan ma.”

¹³Mbɛ n‑na fɔɛ fen kan kɔ kan kuiɛ a min. Fɔɛ fenɛ miin ni banda bu ɔ, chɛ nu dunya ma, faa nɛnɛ n bɛɛ, ni fɔɛ fen chɛ n gbɛɛ yii ɔ. An mbe a fɔ‑a, an dɔ, “Mɔɛ chɛ min mbe si ɔ mansa sea a, an fea sa tɔngbɔɛ chɛ a, an fan ta mu tando a, a basan basɔmaya a, dɔgbɛaya, a basan manɛ a, kuɔ fɔ ni kuɔ fɔ ko a.”

¹⁴Mbɛ fɔɛ fen naanin chɛ n dɔ, “A ni ma ka.” Mbɛ gbakoo chɛ n gbɛɛ‑a an kumbai gbangban, an‑na Yataa fai, an fea sa tɔngbɔɛ chɛ a.