Read Kono KO Ɔ NUNDENƐ 8 Bible Online

KO Ɔ NUNDENƐ 8 - Kono bible

KO Ɔ NUNDENƐ 8

¹Mbɛ sa tɔngbɔɛ chɛ‑a yuu wɔnfean bɔɛ tɛ kɛn, kaina ɔ maun‑da wan don banda bu ɔ, miniti bi sawa ko a.

²Mbɛ n‑na maeka wɔnfea n yen, miin mbe ma Yataa baima, wai chɛ koe a. An‑na buu wɔnfea an be wan an ma.

³Mbɛ maeka dɔndɔ na‑a, a sɔ‑a gbengbe chɛ baima. Pani min mbe a boo a, a nyanden mu sanu an dɔ. Fen kunyɛ a diama been fan ni a ma, Yataa 'a mɔɛ n 'na samunɛ ma munda koe a. A yɛ to, a minda koe a sanu gbengbe chɛ ma, mansa sea chɛ ya kɔɔɛ.

⁴Mbɛ fen kunyɛ a diama chɛ, a sisi sɛ‑a, a basan Yataa 'a mɔɛ n 'na samunɛ a. Sisi chɛ sɛ‑a wan, a bɔ maeka chɛ boo ɔ, min mbe Yataa baima.

⁵Mbɛ maeka chɛ‑a sanu pani chɛ ya, mbɛ a‑a a a fa ta a, a‑a min ya gbengbe chɛ ma. Mbɛ a‑a fen kunyɛ a diama ta chɛ ya, a‑a a a bɔn dunya chɛ ɔ. A ya kɔɔɛ a, banda koɔ‑a gbau gbau, banda manɛ ɛ ta‑a ben‑da mia mia, sɔnkɔ sɔnkɔ chɛ kuiɛ ɛ ta‑a bɔ‑a, duu gboo wɛɛ samba‑a to gbididi.

⁶Mbɛ maeka wɔnfea chɛ nu, buu wɔnfea chɛ ɛ miin boo ɔ, an‑na an ma bɛn an fɛ koe a.

⁷Maeka saa‑a a ta buu fɛ kɛn, mbɛ ko sɛsɛ ma‑a. Sankɔɛ bɔn‑da wan, ni ta basan wii a dunya chɛ ma. Ni dunya chɛ du‑a si tena sawa a, a si tena dɔndɔɛ minda‑a wan. Kɔnɛ n bɛɛ si tena dɔndɔ minda‑a wan, a basan chin fen kan kɔ kan na.

⁸Mbɛ maeka fean bɔɛ wɛɛ, a‑a a ta buu fɛ. Mbɛ fenɛ, yɔ kɔnkɔ wa dɛgbɛ, ta sonko sɔenɛ ɛ a ma, a a dɛ‑a kɔ yii ɔ. Kɔ yii chɛ, ni a du‑a si tena sawa a, a si tena dɔndɔɛ wɛɛ fan‑da wan wii a.

⁹A yɛ to, fɔɛ fenɛ n gbɛɛ kɔ yii chɛ ɔ, ni an du‑a si tena sawa a, an si tena dɔndɔ fa‑a wan. Dɛndɛ wa n bɛɛ, ni an du‑a si tena sawa a, an si tena dɔndɔ yɔn‑da wan.

¹⁰Maeka sawan bɔɛ‑a a ta buu fɛ. Mbɛ tɔmbuaka wa bea‑a a ka banda a, ɛ man‑da yɔ sanku. Mbɛ a bea‑a yii si tena dɔndɔ ɔ, ni a du‑a si tena sawa a.

¹¹Tɔmbuaka chɛ tɔ mu koee. A sin, min yii si tena dɔndɔɛ, ni a du‑a sawa a, a kona‑a wan. Mɔ sɛsɛ n fa‑a wan yii chɛ boo ɔ, koe min na mu, a ni kona a min koe a.

¹²Mbɛ maeka naanin bɔɛ‑a a ta buu fɛ. Tee ni ma, kau, a basan tɔmbuaka n na, an gbɛɛ ma‑a dama. Chɛ‑a a ma wan, an ma manɛ be ni tima ɛnden ko a. Ni tee du‑a si tena sawa a, tee nii ma bɔ ni si tena dɔndɔ ko a. Ni pimbi wɛɛ du‑a si tena sawa a, kau basan tɔmbuaka n na, an ma manɛ be ni si tena dɔndɔ ko a.

¹³Mbɛ n‑na n ya a ta, n‑na kochɛ yen ben‑da banda a. Mbɛ a koɔ‑a gbankon, a ɔ, “Kasaa na‑a, kasaa na‑a, kasaa na‑a dunya ma mɔɛ n ko a. Kasaa chɛ ma ɛ chian‑da wan, buu tɔɛ chɛ nu, maeka sawa chɛ n boo a, an fɛenɛ ma.”