Read Konyak Naga KAHTAMYENGHAN 1 Bible Online

KAHTAMYENGHAN 1 - Konyak Naga bible

KAHTAMYENGHAN 1

¹Üwangne aope Kahwange wang phang linge ngaiya peih,

²kahtoknyuwa hango ülam yenangpe ükeng me ngoh hüyange wangnyak-a ülam hango yenangpu tangme ngoh, hüyange Kahwang yaha-a yeng tang me mokh powe ngoh yangki.

³Hüyange Kahwange i, “Wangngai ngoh tüoh”; hüyange wangngai ngai.

⁴Kahwange wangngai-a meiye nge; hüyange Kahwange wangnyak mepu wangngai tam.

⁵Kahwange wangngai te Nyih she nyik, hüyange wangnyakte Iye Nyak she nyik. Hüyange yaning linne tai hüyange napning ngai, tüopa-a üwangpa nyih ne meng.

⁶Hüyange Kahwange i, “Yeng yo me khwngmong ngaitüoh, hüyange tüo kaiye yeng mepu yeng tamme ngaitüoh.”

⁷Hüyange Kahwange khwngmong linge, khwngmong ütangye me ngohpu yeng mepu khwngmong üphangye me ngohpu yeng tam; hüyange hüke ngai.

⁸Hüyange Kahwange khwngmong te “Wang” she nyik. Hüyange yaning linne tai hüyange napning pei, hatüowa ni shepupa nyih ne ngoh.

⁹Hüyange Kahwange i, “Wangmai me ngohpu yeng üken ja me jemtüoh, hüyange eawahpu kahtok ngaitüoh.” Hüyange hatüo ngai.

¹⁰Kahwange kahtok te Kahtoknyu she nyik; hüyange yeng shaijempu te Iye Yengching she nyik; hüyange Kahwange tüopa-a meinang she lei.

¹¹Hüyange Kahwange i, “Kahtokke phümha weangyong ngai tüoh, üli lick pheipu üphao, hüyange iman üli lick pheipu pee ülam lili kahtok me ngaitüoh.” Hüyange hatüo hüke ngai.

¹²Hüyange kahtok-e phümha weangyong, yoi yoi ülam me üli lickpu ülick lickpu pee, ülam lili lickpu ülick hanghe me yoi yoi üli lick ngoh nang, hatüo ngaine tam. Hüyange Kahwange hatüo meinangki she lei.

¹³Hüyange yaning linne tai hüyange napning pei, hatüowa lüm shepupa nyih ne ngoh.

¹⁴Hüyange Kahwange i, “Wangnyak mepu wangngai tamlak jingne khwngmong me wangngai ngai tüoh; hüyange juheiwan hüyange nyih hei wangpeng itpu yepinlak ngoh tüoh,

¹⁵hüyange kahtoknyu te wangngai ngohlak jingne khwngmong me wangngai ngaitüoh;” hüyange hüke ngai.

¹⁶Hüyange Kahwange wangngai üyong ni ling, nyihning teelak jingne wanghe, hüyange yaning jingne leatnyu; lye üne-o shanhalan-o ling.

¹⁷Hüyange Kahwange kahtoknyute wangngai phalak jingne khwngmong me iman nyimtam;

¹⁸yaning hei nyihning tangme wanglam lamlak jingne, hüyange wangnyak mepu wangngai tamlak jingne ling, hüyange Kahwange hatüowa meinangki she nge.

¹⁹Yaning linne tai napning pei, hatüowa peli shepupa nyih ne ngoh.

²⁰Hüyange Kahwange i, “Yengwo yinmok ülam lili maatüoh, hüyange awhalan khwngmong kaiye kahtok ütang yeme putüoh.”

²¹Tüokhei Kahwange khongkhai hüyange powe ngohpu üyin yinmok üshei, yengme powe ngohpu ülam lili hüyange üyang nyimpu awhalan ülam lili ngaine tam, hüyange hatüowa meinangki she lei ok.

²²Hüyange Kahwange yinmoknyuha moiman tam me i, “Ülick wangmanne licktüoh, hüyange ngaitüoh hüyange yengching me yeng-a maatüoh; hüyange kahtoknyu me awhalan jalun tüoh.”

²³Hüyange yaning linne tai hüyange napning ngai; hüyange hatüowa nga shepupa nyih ne ngoh.

²⁴Hüyange Kahwange i, “Kahtoknyu we üyin yinmok yoi ülam lili tampu yinmok, kahtok me lih-e kempu, hüyange phao yinmok yoi ülam lili ngaitam tüoh.” Hüyange hüke ngai.

²⁵Hüyange Kahwange kahtoknyu yinmok yoi ülam lili, hüyange tampu yinmok yoi ülam lili hüyange kahtok me kempu shemin lamphe yoi ülam lili ling. Hüyange Kahwange hatüowa meinangki she lei.

²⁶Tüophei me Kahwange i, “Teman-e kahta teman kih-e, teman lepu me linghah; hüyange yengching nyah tangme hüyange wang awha tangme, hüyange ching yinmok tangme hüyange kahtoknyu üshei tangme hüyange kahtok me lih-e kempu üshei tangme iman nokpu ne mengtüoh,”

²⁷Hüyange Kahwange yoi kih-e kahta linge ngai, Kahwang lepu me lye I ngaine tam; netan hüyange sheko lye iman ngaine tam.

²⁸Hüyange Kahwange iman moimantam hüyange Kahwange iman te i, “Jaluntüoh hüyange maawe ngaitüoh, hüyange kahtoknyu maane tamme hatüo tükke oktüoh; hüyange yengching nyah tangme, hüyange wang awha tangme, hüyange kahtoknyu me popu üyin ngohpu shemin lamphe tangme, nokpu ne mengtüoh.”

²⁹Hüyange Kahwange i, “Leitüoh, Kahtoknyu üshei me ngohpu üli lickpu phümha weangyong üshei hüyange pee üshei ümeken me üli lickpu pelick ngoh nang, Taowe numante phanang; numan jingne hatüowa hahying ne ngohlak.

³⁰Hüyange kahtoknyu yinmok üshei te, hüyange wang awha üshei te hüyange kahtok me powe kempu üshei te ümeken me üyin ngoh, Taowe phümha weangyong ühüng hahying jingne phanang.” Hüyange hüke ngoh.

³¹Hüyange Kahwange Iye lingpu üshei nge, hüyange leitüoh, tüolan yeonge meiye ngoh. Hüyange wangnyak hei wangngai ngoh, hatüowa wok shepupa nyih.