Read Konyak Naga KAHTAMYENGHAN 11 Bible Online

KAHTAMYENGHAN 11 - Konyak Naga bible

KAHTAMYENGHAN 11

¹Sha-a chahwannyu nopu me ngaolam ja hüyange ngao ja hei ngaopu ngoh yangki.

²Hüyange kahtalan heong yekao me kem taiwante, iman-e Shinar kahmük me kahjee ja nge, hüyange iman tüome nyoi.

³Hüyange iman hei imanpa me teingaowe i, “Kei, teman-e jaklong meimei-e jak hah;” hüyange iman-e long nanleiye jaklong yah, hüyange kümp (sham) nanleiye wüalüng yah.

⁴Tüophei me iman-e i, “Kei, teman nying nyingke chingnyu ja linghah, hüyange daonok wang ngoiye daowe weyange, hüyange teman jingne teman nying nyingke min ja anghah, hüke yelingma-a chahwannyu khongkümpu yete teman yankülak yang.”

⁵Hüyange Youngwanpawe kahta ühalanne lingpu chingnyu hüyange daonok leine pei.

⁶Hüyange Youngwanpawe i, “Leitüoh, iman jat ja, üne-o iman-e ngao ja hei ngao nang; sha-a iman-e hatüo toi linge hei wangnang; tüokhei iman jingne iman hanghe linglak jingne mong yapheih, iman-e ye-oklak hango yengoh külak yang.

⁷Kei, teman yu hah, hüyange iman pa me ngao tei yeshing oklak ne ngaolam püohne tamhah.”

⁸Hüke Youngwanpawe iman tüoken mepu chahwannyu üshei yete yanne tam, hüyange iman-e chingnyu lingpuwa lakke mah.

⁹Tüokhei tüopa chingnyu min Babilon she nyik, hangjingne Youngwanpawe tüokenme chahwannyu nopu jing ngao püohne tam; hüyange tüomepu Youngwanpawe iman chahwannyu üken phe te yanne tam.

¹⁰Hatüolan-a Shem huhayimlan ngoh nang. Aope Shem nyupuh wangpeng gho ja ngoi, muleam phei me wangpeng ni shepupa me Arpachshad puh.

¹¹Hüyange Arpachshad puhyang phei me Shem wangpeng gho nga üyin me ngoh, üne-o sheko hei netan hayimlan tüo.

¹²Aope Arpachshad wangpeng delüm phei me nga ngoi, I Shelah üpa ne meng;

¹³Hüyange Shelah puhyang phei me Arpachshad wangpeng gho peli me lüm üyin me ngoh-e netan hei sheko hayimlan tüo.

¹⁴Aope Shelah wangpeng delüm ngoi, I Eber üpa ne meng.

¹⁵Eber puh phei me Shelah wangpeng gho peli phei me lüm üyin me ngoh-e netan hei sheko hayimlan tüo.

¹⁶Aope Eber wangpeng delüm phei me peli ngoi, I Peleg üpa ne meng.

¹⁷Hüyange Peleg puh phei me Eber wangpeng gho peli phei me delüm ngoh-e netan hei sheko hayimlan tüo.

¹⁸Aope Peleg wangpeng delüm ngoi, I Reu üpa ne meng.

¹⁹Hüyange Reu puh phei me Peleg wangpeng gho ni phei me tu ngoh-e netan hei sheko hayimlan tüo.

²⁰Aope Reu wangpeng delüm phei me ni ngoi, I Serug üpa ne meng.

²¹Hüyange Serug puh phei me Reu wangpeng gho ni phei me nyit ngoh-e netan hei sheko hayimlan tüo.

²²Aope Serug wangpeng delüm ngoi, I Nahor üpa ne meng;

²³hüyange Nahor puh phei me Serug wangpeng gho ni ngoh-e netan hei sheko hayimlan tüo.

²⁴Aope Nahor wangpeng da phei me tu ngoi, I Terah üpa ne meng;

²⁵hüyange Terah puh phei me Nahor wangpeng gho ja me pen me tu ngoh-e netan hei sheko hayimlan tüo.

²⁶Aope Terah wangpeng denyit ngoi, I Abram, Nahor hei Haran lan üpa ne meng.

²⁷Sha-a tüolan-a Terah huhayimlan ngoh nang. Terah-a Abram, Nahor hei Haran üpa, Haran-a Lot üpa.

²⁸Haran-a Ipa Terah shaote I nyupuh kahmük Chaldea mepu Ur me li.

²⁹Abram hei Nahor ni-e sheko yah. Abram shekonyute Sarai she min, üne-o Nahor shekonyute Milcah she min. Yha-a Haran üha hüyange Haran-a Milcah hei Iscah ni üpa ne ngohyangki.

³⁰Sha-a Sarai-a heelang ne ngoh, yha hayim yenangpe ngoh.

³¹Terah-e Iha Abram hei Ihu Lot, Haran üha, hüyange I nyemnya Sarai, Iha Abram shekonyu woiyange iman üshei Kanan kahmük te tailak jingne, Chaldealan Ur chingnyu mepu yayonge tai; hüyangpoi aope iman Haran ngoi, iman tüome nyoi.

³²Hüyange Terah nyupuh wangpeng gho ni phei me nga ngoh yangki, hüyange Terah Haran me li.