Read Konyak Naga KAHTAMYENGHAN 12 Bible Online

KAHTAMYENGHAN 12 - Konyak Naga bible

KAHTAMYENGHAN 12

¹Sha-a Youngwanpawe Abram te i, “Nang chingshao nyoi mepu, hüyange nang kahtalan mepu, hüyange nangpa nok mepu yayonge Taowe nangte hüolak kahtok te taitüoh.

²Taowe nanga jat üyongne lingtamlak. Taowe nang moiman tamlak hüyange nang min ütahpa ne menge tamlak, tüokaiye nanga moiman tüopa ja ne menglak.

³Aoyinne nang moiman tamlakei, Taowe iman moiman tamlak; hüpoi aoyinne nang te phoiwümlakei Taowe imante phoiwümlak. Hüyange nang kaiye kahtoknyu jatlan üshei te moimanlak.”

⁴Tüokhei Youngwanpawe Ite ipu kih-e Abram tai; hüyange Lot I phei tai. Haran mepu yayonge taiwante Abram nyupuh wangpeng denyit me nga ngoh yangki.

⁵Hüyange Abram-e I shekonyu Sarai, hüyange I nao üha Lot, hüyange iman-e yopu iman me nangpu üshei, hüyange kahta hangshin iman-e Haran me woijem, tüolan khongkümpu woiye tai, hüyange iman-e Kanan kahtok te taine yayong. Aope Kanan kahmük te iman pei,

⁶Abram Shekhem kahmük lin-e Moreh mepu longkhampee ngoi. Hüwante tüopa kahmük me Kananlan nyoi tei-e ngohyangki.

⁷Hüwante Youngwanpa Abram tangte ngai, hüyange Ite i, “Nang huhayimlan te Taowe phalak kahmük-a tüopa ngohnang.” Hüwante tüokenme Youngwanpa ao I tangte ngaiye hüo, Iye I jingne wümjong ja ling.

⁸Tüophei me Iye tüomepu Bethel heong kahtang yete yayonge tai, hüyange Bethel henyip hüyange Ai heongye me Iye yoi nyenok we. Hüyange tüoken me Iye Youngwanpa jingne wümjong linge Youngwanpa min me nyik.

⁹Hüyange Abram nyoijing ja mepu ja she yelakpe Kanan heye kaote tai.

¹⁰Sha-a tüopa kahmük me seanyao yenglepu ngoh. Tüokhei Abram Egypt te tüo me yinpa ja kih-e nyoine tai, hangjingne tüopa kahmük me seanyaoyengle loi-e ngohyangki.

¹¹Aope I Egypt te onglak owe pei, Iye yoi shekonyu Sarai te i, “Taowe nanga leilak jingne yeong shemei yaomapu sheko ja she mei mei-e shingnang;

¹²hüyange aope Egypt lan-e nang ngelakeih, iman-e ikülak, ‘hatüo-a I sheko’; tüophei me iman-e tao toikülak, hüpoi iman-e nanga yin angkülak.

¹³Nanga ü-nao üja she ikei, hüke nange ipu kaiye üjingne meikülak, hüyange nang kaiye ü-üyin yinpu okkülak.”

¹⁴Aope Abram Egypt te ongyapeih, Egyptlan-e shekonyuwa yeonge naoyha meiye nge.

¹⁵Aope Pharaoh ahnghalan ne yha nge, iman-e yha naoyha meipu jeng ahngpate i. Tüokhei yha-a Pharaoh nokte yah-e pei.

¹⁶Yha jing ne ahngpawe Abramte meimawe jon hüyange Ite nyee ükhong hüyange younlan, mahulan, gadolan, rhalan, hüyange udhlan pha.

¹⁷Hüyangpoi ahngpawe Sarai yahpu jingne Youngwanpawe nyam nyam shepu dak ümeng Ite hüyange ahngnok me ngohpu kahtalan te peine tam.

¹⁸Tüokhei ahngpawe Abramte nyik hüyange Ite tonge i, “Nange üte lingpu hatüowa hanghe shi? Hangne yha-a nenok shekonyu üja she üte ye-ipu?

¹⁹‘Yha ü-nao üja’ she hangne nange ipu? Tüokhei taowe yha-a ü-sheko ne yah. Sha-a hüma-a nenok shekote leiyah, yha yayah, hüyange tai te pha.”

²⁰Hüyange Pharaohwe kahmük mepu Abram yanne taine tamlak jingne yoi kahtalan te ngao pha, hüyange iman-e I me nangpu üshei phei lünge teiye taine tam.