Read Konyak Naga KAHTAMYENGHAN 13 Bible Online

KAHTAMYENGHAN 13 - Konyak Naga bible

KAHTAMYENGHAN 13

¹Tüokhei Abram Egypt mepu, I hei I sheko, hüyange I me nangpu üshei; hüyange I phei Lot yahyange Negeb te tai.

²Sha-a Abram, tampu yinmok me, hon hei khüm me yeonge hakpa ne ngoh.

³Hüyange I yin kem-e Negeb mepu taiye I nyenok üwangne wepu nyoi Bethel ngoi, hatüowa Bethel hei Ai nipa me ngoh.

⁴Iye üwangne wümjong lingpu nyoi, hüyange tüo me Abram-e Youngwanpa min me nyik.

⁵Hüyange Lot, ao Abram phei jamme tai, I me-o nyee hei youn, hüyange mahu ükhong hüyange yoi noksalan hüyange rhapalan ngoh yangki.

⁶Tüokaiye iman jam-e ngohlak ne hahnyoi kahmük wange yenang, hangjingne iman me nangpu moth hei yinmoklan üngang ngohpu jingne iman jamme nyoilak ye-ok.

⁷Tüokaiye Abram yinmok paopalan hei Lot yinmok paopalan nipa me teepu ngai; hüwante Kananlan hei Perizzlan tüopa kahtok memuh nyoiteiye ngohyangki.

⁸Tüokhei Abram-e Lot te i, “Tümnipa me, hüyange tenok yinmok paopalan hei nenok yinmok paopalan nipa me teelapu hango angne tahtam; hangjingne teman-a jeiheinao ngoh nang.

⁹Kahtok khongkümpuwa nang sheshao me yenang a? Nang nying nyingke ü-mepu yantüoh. Nange yaknya ye yahma-a, taowa yakjah yete tailak, yejema-a nange yakjah ye yahma-a, taowa yaknya yete tailak.”

¹⁰Lotte yoi mük weamme Jordan kahjee üshei te lei, hüyange Youngwanpa pesha kih-e tüopa üshei yeme, yeng üngang Zoar yekao mepu Egypt kahtok kih-e nge. (Tüopa-a üne-o Youngwanpawe Sodom hei Gomorrah manmah tamwante).

¹¹Tüokhei Lotte yoi jingne Jordan kahjee üshei le; hüyange Lot heong yekao te yayong; hüke iman jawe japhei teiyan.

¹²Abram Kanan kahtok me nyoi, hüpoi Lot-a kahjee me ngohpu chingnyulan phei nyoi hüyange I nyenok Sodom ngoiye linge tai.

¹³Sha-a Sodomlan-a ünu hüyange Youngwanpa kaiye yeonge ümeng jonpu kahtalan ne ngoh yangki.

¹⁴I mepu Lot yanne tai phei me, Youngwanpawe Abram te i, “Nang mük nganne nang ngohpu nyoi mepu apye hei heye, hüyange heong hei henyip yete leitüoh;

¹⁵hangjingne hanghe kahmük nange ngenang, tüolan khongküm taowe nangte, hüyange nang huhayimlante jinte pu jingne Taowe phalak.

¹⁶Taowe nang huhayim chahwannyu kahmak shinne ngaitamlak; tüokhei ütam jawe chahwannyu kahmak ipu okma-a, nang huhayimlan-o ipu oklak.

¹⁷Yayong tüoh, kahmük üjük üpeam kaiye kemtüoh; hangjingne Taowe nang te tüolan khongkümpu phalak.”

¹⁸Tüokhei Abram-e yoi nyenok khokke taiye, Hebron me ngohpu Mamre longkhampee yome ngoh, hüyange lye tüoken me Youngwanpa jingne wümjong ja ling.