Read Konyak Naga KAHTAMYENGHAN 14 Bible Online

KAHTAMYENGHAN 14 - Konyak Naga bible

KAHTAMYENGHAN 14

¹Ahngpalan peli, Shinar ahngpa Amraphel, Ellasar ahngpa Arioch, Elam ahngpa Chedorlaomer, hüyange Goiim ahngpa Tidal nyih hipak me,

²iman-e Sodom ahngpa Bera, Gomorrah ahngpa Birsha, Admah ahngpa Shinab, Zeboiim ahngpa Shemeber hüyange Bela ahng lan phei wehok ükong wang.

³Tüolan ahngpalan shüppe jemyange Siddim kahjee (hatüowa hüm yengching) me jem.

⁴Iman-e wangpeng pen me ni ngoiye Chedorlaomer shaoshan, hüyange wangpeng pen me lüm shepupa me iman-e I phei hokwe yong.

⁵Hüyange wangpeng pen me peli shepupa me Chedorlaomer, hüyange I phei ngohpu ahngpalan-e, Ashteroth Karnaim me Rephaimlan, hüyange Ham me Zuzimlan, hüyange Shaveh Kiriathaim me Emimlan,

⁶hüyange Horlan iman kahtang Seir me wüngwü-ükpu ü-o me ngohpu Elparan ngoiye chinghah-e naowe tai.

⁷Tüophei me iman-e leih-e ye, Enmishpat (Kadesh) te peiye Amaleklan kahtok hüyange Hazazon-tamar me ngohpu Amorlan kahtok khongkümpu chinghah.

⁸Tüophei me Sodom ahngpa, Gomorrah ahngpa, Admah ahngpa, Zeboiim ahngpa, hüyange Bela ahngpa iman üshei Siddim kahjee wehok shapju me iman yayong.

⁹Elam ahngpa Chedorlaomer, Goiim ahngpa Tidal, Shinar ahngpa Amraphel, hüyange Ellasar ahngpa Arioch phei ahngpa nga phei tüi-e peli yong.

¹⁰Sha-a Siddim kahjee me wüalüng kahsa maawe ngoh yangki; hüyange Sodom hei Gomorrah ahngni phette tai hüyange tüome yei; hüyange iman yo me topu lüm-a kahtang yete phette tai.

¹¹Tüokhei wepalanne Sodom hei Gomorrah toinyu nanha üshei, hüyange iman hahying üshei nyieye yahyange taimah.

¹²Hüyange iman-e Abram ü-nao üha Lot, aohipa Sodom me ngoh, I hüyange I jing toinyu nanha nyieye yahyange yanne tai.

¹³Hüyange shaoyinne tai okpupa kahta ja peiye Hebrewlan Abram te tüopa jeng i. I-a Eshkol ü-nao, hüyange Aner ü-nao, Amorlan Mamre longkhampee shongme yome ngoh; tüolan-a Abram phei teishinpu ngoh yangki.

¹⁴Aope Abram-e Inao üha phowe teiteki she jai, lye yoinok me puhpu shapju jingne thrimlei yahyangpu kahta gho lüm phei me penmetet woiyange Dan ngoiye ahngpalan peli te jange tai.

¹⁵Hüyange lye yoi kahtalan ükhong ükhong tamyange wangnyak me wepalante shüm; hüyange iman-e okpu nge, hüyange Damascus apyekao me ngohpu Hobah ngoiye jange tei.

¹⁶Hüyange nyieyah taipu moth üshei tük-e ye; yoi nao üha Lot-o I jing toinan phei, shekolan hüyange phowe teiyangpu kahtalan leih-e woiye yah yeyangki.

¹⁷Aope Abram, Chedorlaomer hüyange ülao ahngpalan naoyange okpu ngeye ye, Sodom Ahngpawe Shaveh-kahjee me I phei hüo (tüopate Ahngpa kahjee she-o nyiknang).

¹⁸Hüyange Salem ahngpa Melkhizedek ao ütahpa Kahwang ngengpa ne-o ngoh, I an hei wuwüngti yahyange I pongte yu.

¹⁹Hüyange Ite moiman phawe i, “Wang hei chahwannyu lingpupa ütahpa Kahwang moiman Abram tangme ngohtüoh!

²⁰Hüyange aowe nang wepalan nang yak me pha, I Ütahpa Kahwang min yongtüoh!” Hüyange Abram-e lte penphong dopu pha.

²¹Hüyange Sodom ahngpawe Abram te i, “Üte ü-kahtalan pa-a yahkei, hüpoi nyieye yahpu toinanpa-a nange yayah.”

²²Hüpoi Abram-e Sodom Ahngpa te jan-e i, “Chahwan hei Wangdang linge ngaipupa ütahpa Kahwang, Youngwanpa sheshao me taowe jienge inang,

²³hüke nang jingne mengpu ülam ja nehoi, velah ja yejema-a, yashom wu nehoi taowe yeyahlak. Hümme nakshih, ‘Taowe Abram hakpa ne menge tam’, she nange aope-o yengaolak.

²⁴Ü-phei taipu kahtalan meitam hüyange naoshelan-e hanghe hah, tüolan tokte kaiye taowe hango yeyahlak; Aner, Eshcol, hüyange Mamre imanpa-a iman meitam yahne tamtüoh.”