Read Konyak Naga KAHTAMYENGHAN 15 Bible Online

KAHTAMYENGHAN 15 - Konyak Naga bible

KAHTAMYENGHAN 15

¹Tüo lan phei me Youngwanpa ngao himang me Abramte pei. “Nyam tahteih, Abram, Taowa nang ree; nang khintak yeong yonge ngohlak.”

²Hüpoi Abram-e i, “O Youngwanpa Kahwang, nange üte hanghe phalak shi, hangjingne taowa ha-nao yenangpe ngoh-e peinang, hüyange ü-nok mothleilak ne Damascus mepu Eliezer ngoh nang.”

³hüyange Abram-e i, “Leitüoh, üte nange üli hango yepha; hüyange tenok me puhpu rhapaja ü-moth leine ngohnang.”

⁴Hüyange leitüoh, Youngwanpa ngao I tangte pei, “Hatüo kahta nang mothleipa ne yemenglak, nang ha ütingpawe nang moth leilak.”

⁵Hüyange Youngwanpawe I nokshao te woiye yüowe i, “Wang yete leitüoh, hüyange tüopa iye okma-a, shanhalan itüoh.” Tüophei me Iye Ite i, “Hükih-e nangmepu üli ngohlak.”

⁶Hüyange Iye Youngwanpate ütinglak, hüyange Iye Youngwanpa-a khakshupupa she monghah-e yah.

⁷Hüyange Youngwanpawe Ite i, “Tao Youngwanpa aowe nang te tüopa kahtok mothlei phalak jingne, nang Chaldealan chahwan Ur mepu woi pei.”

⁸Hüpoi Iye i, “O Youngwanpa Kahwang, hangke taowe hatüo mothlei yah oklak she shinglak?”

⁹Iye Ite i, “Üte wangpeng lüm ngoitephei mahu ja, wangpeng lüm younpi ja, wangpeng lüm nyeeha ja, awshu ja hüyange awyei ja she yahpeikei.”

¹⁰Abram-e tüolan üshei yahpei hüyange iman ni ni ne tang, tüolan tangkhüwlan jatang me ja ang; hüpoi Iye awhalanpa-a yetang.

¹¹Hüyange aope meihahpu awhalan mangtang me peiyapeih, Abram-e iman jange tei.

¹²Aope wanghe nyipyapeih, Abram shin nyaiye shiye ta, hüyange nyam nyam shepu wangnyak üyong I tangte pei.

¹³Tüophei me Youngwanpawe Abram te i, “Hatüo mei mei-e shingyah, nanghuhayimlan iman kahmük ne üjepu me yinpa ne ngohlak, hüyange iman-a tüoken me sha-angpalan ne ngohlak, hüyange iman-a wangpeng gho peli ngoi-e shaoshi ne tamlak.

¹⁴Hüpoi iman-e shaoshanpu jat tang me Taowe ngaophünpu peitamlak, hüyange tüophei me iman yeonge hakke lwngpu phei ngailak.

¹⁵Nangpa-a, nang puyimlan tangte chingmei me tailak; nanga lwngmei ne menge mangmulak.

¹⁶Hüyange iman-a tüokente jin peli shepupa me leih yelak; hangjingne Amoritelan nuweshakpu üne-o manküm.”

¹⁷Aope wanghe nyip hüyange wangnyak-e pei, leitüoh, mokhshe vünkhuh ngaiye loongpu vünloong ja hüyange loongpu vüntük ja yinmoklan tangyange khünglenge angpu nipa me linne tai.

¹⁸Tüopa nyih me Youngwanpawe Abram phei jiengjeppu ja yah-e i, “Nanghu nanghalan te Taowe tüopa kahmük phanang. Egypt Yengyin mepu yengyin üyong, Euphrates yengyin ngoiye,

¹⁹Kenlan, Kenizlan, Kadmonlan,

²⁰Hitlan, Perizzlan, Rephaimlan,

²¹Amorlan, Kananlan, Girgashlan, hüyange Jebuslan, iman kahmük khongkümpu omme Taowe phateki.”