Read Konyak Naga KAHTAMYENGHAN 16 Bible Online

KAHTAMYENGHAN 16 - Konyak Naga bible

KAHTAMYENGHAN 16

¹Sha-a Sarai, Abram shekonyuwe Ite ha puh moi yepaitam. Hüpoi yha tepu rhanyu ja, Egypt sheko Hagar she minpu ngoh;

²Sarai-e Abram te i, “Leitüoh, sha-a taowe naha puhlak mepu Youngwanpawe tienteki; ü-rhanyu phei nang shitüoh; aowe shingpu, yha kaiye taowe hayim tüone ok.” Hüyange Abram-e Sarai ngao me yah.

³Tüokhei Abram Kanan kahtok me wangpeng pen ngoh phei me, Sarai, Abram shekonyuwe yoi rhanyu Egypt yhala Hagar, woipeiye, netanpa Abram shekone menglak jingne pha.

⁴Abram-e Hagar phei mei, hüyange yha püm yekengpe ngai; hüyange aope yhawe yoi püm yekengpe ngaiteki she shing, yhawe yoi nokpunyute yanao lei.

⁵Tüophei me Sarai-e Abram te i, “Hagarwe üte yanao-e lingpuwa nange püohpu jingne ngoh nang. Taowe ü-rhanyu nang jakuh me pha, hüyange aope yhawe yha püm yekengpe ngohnang she nge, yha mükshao me üte yanao-e ngai. Youngwanpawe tümnipa me ngao phünne tam tüoh!”

⁶Abram-e jan, “Nang rhanyu-a nang yak me ngohnang, nange yhate hanghepa shemeilak kih teih tüo kih-e jonyah.” Tüophei me Sarai-e Hagarte yemeipe kon hüyange yha mepu Hagar phet-e tai.

⁷Youngwanpa shongmokpawe wanwüng jeng, Shur te taipu lam nah shaoha ja me Hagar tüo.

⁸Hüyange lye tong, “Sarai rhanyu Hagar, nang ü-mepu peipu, hüyange üpükente tailak shi?” “Taowa ü-nokpunyu Sarai shaomepu phet-e taipunyu weih” she yhawe jan.

⁹Youngwanpa shongmokpawe yhate i, “Nang nokpunyu tangte leih-e yetüoh, hüyange yha shaoshan tüoh.”

¹⁰Tüophei me Iye yha te üne-o i, “Taowe nanghu nangha maawe jalun tamlak, tüome jamloi ngaipu jingne ipu yekümpe ngohlak.”

¹¹Youngwanpa shongmokpawe yha te i, “Leitüoh, nang püm yekengpe ngohnang, hüyange nange netan moija pailak; hüyange nange I min lshmael she nyik tüoh, hangjingne Youngwanpawe nang shange wennekapu jaiteki.

¹²Hüpoi nangha-a kahta yo me phao gado kih-e ngohlak; I yak kahta üshei phei wepa ne ngohlak, hüyange kahta lili yak I phei wepa ne menglak. Hüyange I yoi jeiheinaolan üshei phei-o wepa ne ngohlak.”

¹³Tüokhei Hagarwe tong, “Taowe ütingpa me Kahwang ngepu a, hüyange tüopa jeng ilak jingne ngohlak a?” Tüokhei aowe yha phei ngao tüopa Youngwanpa te yhawe “Kahwang Aowe Nge-oknang.” she nyik.

¹⁴Tüokhei tüopa yengnung te Beer-lahai-roi she nyik; hatüowa Kadesh hei Bered nipa me ngohnang.

¹⁵Tüokhei, Hagarwe Abramte netan moija paitam; hüyange Abram-e Hagarwe puhtampu yoiha te Ishmael she nyik.

¹⁶Hüyange aope Hagarwe Abramte lshmael puhtam, Abram nyupuh wangpeng detet me wok ngoh yangki.