Read Konyak Naga KAHTAMYENGHAN 17 Bible Online

KAHTAMYENGHAN 17 - Konyak Naga bible

KAHTAMYENGHAN 17

¹Aope Abram nyupuh wangpeng detu me tu ngoi, Youngwanpa Abram tangte ngai hüyange Ite i, “Taowa Ütahpa Kahwang, ü-sheshao me kemtüoh, hüyange nang ünu ye-ompe ngohtüoh.

²Taowe ü-jiengjeppu nang phei yahlak hüyange nangte huhayimlan üngang phalak.”

³Hüwante Abram-e yoi sheta khuh-e tayange khüm; hüyange Kahwange I phei ngaowe i,

⁴“Leitüoh, Taowe nang phei tüopa jiengjeppu yahnang: hüyange nanga jatlan maapu pajeiyong ne menglak, Taowe jannang.

⁵Shaaji nangmin Abram she yenyiklak, hüpoi nang min Abraham she nyiklak; hangjingne jatlan maapu pajeiyong ne Taowe nang menge tamteki.

⁶Taowe nangte huhayimlan üngang phalak hüyange nang mepu Taowe jatlan ngaine tamlak hüyange Ahngpalan nang mepu ngailak.

⁷“Taowa nang jingne, hüyange nang phei me nanghu nanghalan jingne Kahwang ne ngohlak, Tao hei nang hüyange nang phei me nanghu nanghalan nipa me jin üshei me üküm yenangpu jiengjeppu ngoh lak jingne, Taowe ü-jiengjeppu anglak.

⁸Hüyange Taowe nangte, hüyange nang tokphei me nanghuhalan te, nang kemyangpu kahtok, Kanan kahtok khongkümpu, jinte numan jingne menglak ne yah pha ning, hüyange Tao iman Kahwang ne menglak.”

⁹Hüyange Kahwange Abraham te i, “Nang jingne, nang hüyange nang phei me nanghuhalan jin üshei me ü-jiengjeppu anglak yang.

¹⁰Hatüowa ü-jiengjeppu, hanghepa Tao hei nang, hüyange nang phei me nanghu nangha nipa me numan-e anglak: Numan yo me netan mei khongkümpu üsho khüplak.

¹¹Sha-a me peiye numan jing jupeng üsho khüplak; hüyange tüopawe temanpa me jiengjeppu yepinlakpa ne ngohlak.

¹²Numan yo me puh phei me nyih tet ngoipu, üsho khüptüoh. Numan jin üshei me netan lili nenok me puhpune jeyah, hengching mepu nginne shakpu, nang mepu üli ne yejeyapoi, üsho khüptüoh.

¹³Rhalan nenok me puhpaipu ne jeyah, hengjing mepu shak-e peipu ne jeyah, jupeng üsho khüplak wongpong. Hüyange Ü-jiengjeppu nang mei me üküm yenangpu jiengjeppu ne ngohlak.

¹⁴Shoyekhüppu netan ütam, aowe yoi sho üju meime yekhüppe ngohlakei, tüopa kahta yoi kahta ükhong mepu jange winlak; lye ü-jiengjeppu mengteki.”

¹⁵Hüyange Kahwange Abraham te i, “Shaaji nenok nyuyong te nange Sarai she yenyiklak; sha-a me peiye yha min Sarah she nyiklak.

¹⁶Taowe yhate moimanlak, tüotokte yha kaiye nangte netanha puh ne tamlak. Taowe yha moiman tamlak hüyange yha kaiye jat lilan nowe inlak, jat Ahngpalan yha kaiye pei ne tamlak.”

¹⁷Tüophei me Abraham sheta khuh-e ta hüyange nyi-e ngai hüyange yoi nying nyingke hüke i, “Kahta ja nyupuh wangpeng gho ngoi te phei te yoiha puhtam phalak a? Wangpeng detu ngoite phei piyong Sarah-e moipaipu oklak a?”

¹⁸Hüyange Abraham-e Kahwang te tong, Nang moiman me üha ne Ishmael hei angne tampha.

¹⁹Hüpoi Kahwange i, “Yeje, nenok shekonyu Sarah-e nangte netan moija paitamlak, hüyange nange I min Isaac she nyiklak; hüyange I phei me I huhalan jingne üküm yenangpu jiengjeppu ngohlak jingne Taowe I phei jiengjeppu linglak.

²⁰Hüyange Ishmael jeng, nange yoppe dopu Taowe jaiteki; leitüoh, Taowe I moiman tamteki, hüyange Taowe I ülick lickke tamteki, hüyange I meiyange jalunne tamlak, I-a ahngpalan pen me ni üpa ne menglak, hüyange Taowe I huhayimlanna jat üyongne menge tamlak.

²¹Hüyangpoi Isaac aohipa Sarah-e ngaiwang hakih tingme puhlakei, I phei Taowe jiengjeppu yahlak.”

²²Aope Kahwange Abraham phei ngaopu shoyapeih, Abraham mepu Kahwang onge mah.

²³Hüyange tüonyih muh Abraham-e yoiha Ishmael hüyange Inok me puhpu üshei, hüyange I nginne shakpu üshei, Abraham nok me ngohpu kahta yo mepu netan khongkümpu woiye peiye, Kahwange Ite ipu kih-e, iman mei me jupeng üsho khüppe tam.

²⁴Abraham yoi shokhüp wante nyupuh wangpeng detu me tu lwngmei ne ngohyangki.

²⁵Hüyange I ha Ishmael-a nyupuh wangpeng pen me lüm me ngoh yangki.

²⁶Tüonyih muh Abraham hüyange Iha Ishmael jamme shokhüp yangki.

²⁷Hüyange Inok me ngohpu netan üshei, I nok me puhpu hei kahheng mepu ngin phawe shakpu moilan, I phei shokhüp.