Read Konyak Naga KAHTAMYENGHAN 18 Bible Online

KAHTAMYENGHAN 18 - Konyak Naga bible

KAHTAMYENGHAN 18

¹Aope Abraham nyihning wanglüm ju me I nyenok tafün shongme shot-e ngoh, Youngwanpa Mamre longkhampee yome I tangte ngai.

²Hüyange lye nganne lei, hüyange leitüoh, kahta lüm I sheshao me yonge nge. Aope lye iman nge, I nyenok tafün shong mepu iman phei hüolak jingne phette wenne, kahtok ngoiye khuh-e ta.

³lye i, “Üyonglan, tao numan sheshao me monghahlakpa ne nge okma-a, nang shaoshanpa mepu linne tahtai.

⁴Sha-a yeng üjingha yah peitam küning, hüyange numan ya tuhyange, peshüm phang me numan toloi meikei.

⁵Hüwante taowe hahying üjingha yah peiküning, hüyange numan toloi meitüoh, tüophei me nakshih numan yayong tüoh; hangjingne numan-e numan shaoshanpa tangte pei.” Iman-e i, “Meiteki nange hangke i hüke lingtüoh.”

⁶Tüokhei Abraham nyenok te mam-e Sarah tangte ong, hüyange i, “Shemeipupa ankhoih taksheng lüm yah-e tümtüoh, hüyange hatüo nyütyange an lingne mamtüoh.”

⁷Hüyange Abraham mahu ükhong yote phette wen, hüyange mahu üha shenüt pupa ja yah-e ye-e namnopalan te pha; hüyange iman-e hatüo mam-e namno.

⁸Tüophei me lye an yao, hüyange düamyeng, hüyange mahu üha mei lye tüm ne tam-e angpu tüolan hahying yahwenne iman sheshao me angtam; hüyange tüoken peshüm phang me lye imante namnowe uhying, hüyange iman-e hah.

⁹Iman-e Ite tong, “Nenok sheko Sarah ümeken me ngoh nangki?” Hüyange lye i, “Yha nyenok me ngoh nang.”

¹⁰Youngwanpawe i, “Ngaiwang hakih tingme Tao leih yekülak; hüyange nenok sheko Sarah-e netan moija pailak.” Hüyange Sarah-a nyenok tafün shong I tokphei me jaiye ngoh.

¹¹Sha-a Abraham hei Sarah ni yeonge wuteiye ngoh, hüyange Sarah-a lekeng ünu taipu lakteiye ngoh.

¹²Tüokhei Sarah yoi mongjang me nyiye teih yange i, “Tao yeonge wunyu ne mengte pheite hüyange ü-netanpa-o wupa ne mengte pheite, taowe lahnyikke mongmei tüolak a?”

¹³Hüwante Youngwanpawe Abraham te tong, “Tao wunyu ne mengte phei te ütingme taowe naha puhlak a she hangne Sarah-e nyipu shi?”

¹⁴Youngwanpa jingne jamloi wanpu toilam ja nehoi ngohnang kü a? Taowe ngaoyangpu kih-e, aope ngaiwang hakih ting ngoilakei, Tao nang tangte leih-e yekülak, hüyange Sarah-e netan naha ja puhlak.

¹⁵Sarah yeong nyam hüyange ngaoleih hüke i, “Tao yenye ja.” Hüpoi Iye i, “Nang üting me nyiküja.”

¹⁶Tüophei me kahtalan tüoken mepu yayonge tai, hüyange Sodom yekaote lei tai hüyange Abraham-e iman lünge tüoh.

¹⁷Hüyange Youngwanpawe yoi nying nying te i, “Taowe hanghe linglak ne ngoh Abraham te lowe anglak a!

¹⁸I-a wong nangpu hüyange jat üyongne menglak, hüyange I kaiye jatlan üshei moiman tamlak.

¹⁹lye yoi halante hüyange yoi huhayimlan te ü-ngao jailak jingne, hüyange hanghe khakshupu hüyange ütingpa ngoh linglak ngao phawe tamlak jingne Taowe I leyangki. Iman-e khakshuwe lingma-a, Taowe I jingne janyangpu khongkümpu Ite linge tamlak.”

²⁰Tüophei me Youngwanpawe i, “Sodom hüyange Gomorrah püohpinpu wüng loishe jainang hüyange iman-e ompu ünu-a mongshanglak ne ngohnang.

²¹Iman-e püohpin yangpu Taowe jaihümpuwa üting jeya shinglak Tao lailak.”

²²Tüophei me kahta ni-a yayong hüyange Sodom yekaote tai, hüpoi Youngwanpa-a Abraham phei ngoh.

²³Hüyange Abraham Youngwanpa shong te owe wen, hüyange i, “Nange hang ümengo yenangpupa ünu ümenglan phei mah ne tamlak a?

²⁴Chingnyu me khakshupu kahta denga ngohma-a, nange tüome ngohpu khakshupu kahta denga jingne chingnyuwa tükke ye-angpe mahtamlak a?

²⁵Hüke linglak nang mepu yeonge jaiye ngohkülak; ünu ümengpa kahta khakshupulan phei mahma-a khakshupulan ünu ümeng kih-e ngailak! Hatüokih linglak nang mepuwa yeonge jaiye ngohnang! Kahtoknyu khongküm ngao phünpawe ngaoting yejonkülak a?”

²⁶Youngwanpawe janne i. “Sodom me Taowe khakshupu kahtalan denga tüoma-a, iman ngohpu jingne chingnyu nopu Taowe tükke anglak.”

²⁷Abraham-e üne-o ngao: “Young-wanpa, Taowe yelakpe nang phei wongnange ngaopu jingne chingmei lamlinge üte ümeng winpha. Taowa kahta ja hei hüyange hang ilak-o wongpong yenang.

²⁸Hüpoi aoweshingpu denga nanleiye khakshupu kahtalan deli me nga ngoh ne ok; kahta nga-e yewangpu jingne nange chingnyu khongkümpuwa mah ne tamlak a?” Youngwanpawe janne i, “Taowe tüome khakshupu kahtalan deli me nga tüoküma-a, chingnyuwa mah ne yetamlak.”

²⁹Abraham-e üne-o ngao: “Aoweshingpu, tüome deli hei ngoh ne ok.” Iye jan-e i, “Tüome deli ngohma-a, Taowe tüopa-a mah ne yetamlak.”

³⁰Abraham-e i, “Youngwanpa, chingmei lam linge üte mongshih tah ngai pha, hüpoi taowe üne-o ngaolakei. Iman delüm hei ngohma-a hangke ilak?” Iye i, “Taowe delüm nehoi tüoma-a Taowe mah ne yetamlak.”

³¹Abraham-e i, “Youngwanpa, taowe yelakpe nang phei wongnange ngaopu jingne chingmei lamlinge üte ümeng winpha. Leppu ja me da shaha tüoma-a?” Iye i, “Taowe da nehoi tüoma-a Taowe chingnyuwa mah ne yetamlak.”

³²Abraham-e i, “Youngwanpa, chingmei lamlinge mongshih tah ngaikei, hüyange shaaji taowe ja me hei ngao lakei. Iman pen hei tüoküma-a hangke ilak?” Iye i, “Iman pen nehoi ngohma-a Taowe tüopa-a mah ne yetamlak.”

³³Abraham phei ngaowe sho yangphei me Youngwanpa taiye mah, hüyange Abraham-o nokte leihye.