Read Konyak Naga KAHTAMYENGHAN 19 Bible Online

KAHTAMYENGHAN 19 - Konyak Naga bible

KAHTAMYENGHAN 19

¹Ünpong me wangdang shongmokpa ni Sodom te pei, Lot-a chingnyu peten me shotte ngoh. lye imni ngepu phei jamshe I yong hüyange imni phei hüone wen, hüyange imni sheshao me lye khuh-e ta-e khüm;

²hüyange i, “Üyonglan, numan te paowe tüklak jingne tao tüome ngohnang. Chingmei lamlinge tenok me ngoikei. Numan-e yatuh yakpho yange teya-a pümkei. Napning numan shonge laowe numan tailak lamte taipu okkülak.” Hüpoi imniye jan-e i, “Min, tomni teya-a chingyangko me pümlak.”

³Hüpoi Iye yelakpe kang, tüokhei, imni Inok te ong; hüyange Iye hahying tüm-e do-yenyütpu an ling hüyange iman-e hah.

⁴Hüpoi yinpalan shinleng te manongpe ngohwante, Sodom kahtalanne nokte neikon. Chingnyu mepu kahtalan lwngmei hei nahalan khongkümpu jemyangki.

⁵Iman-e Lot te nyik-e tong, “Teya nenok te peipu kahtalan-a üpu? Toman tangte iman yüokei, toman-e iman phei toimeng linglakeih.”

⁶Lot nokshao te iman tangte yu, hüyange I tokphei me taküp küp.

⁷lye imante i, “Jeihei naolan, hükihpu nushakpu toi tah ling kei.

⁸Leihuyah, netan phei manpangpu tenok naoyha ni ngohnang. Imni numan tangte yah yüophaning, numan-e hangke linghuyapeih lingyah, hüpoi tüolan kahta te hango tahling; hangjingne iman-a ü-yüoshüm phang me lolak jingne peinang.”

⁹Hüpoi iman-e jan i, “Toman lam tahpang, nanga yinpa kahta, tomante tienma-a toman-e imante jonlak phei shemeng she nangte jonlak.” Tüophei me iman-e Lot te shunge yenetam hüyange taküp menge onglak jingne shunge pei.

¹⁰Hüpoi noksa me ngohpu kahta ni nokshao te yu. Lot shuwe noksa te inne tam, hüyange taküp küp.

¹¹Tüophei me iman-e kahtalan khongkümpu te mük müone tam-e shet, tüo kaiye iman-e tafün shong yetüope pong.

¹²Hüwante kahta niye Lotte i, “Nang phei tüo me nang pheipulan ütam, nanghalan, yhalalan, mata-tong ninglan, yejema-a chingnyu me nang pheipu ütam ngohma-a, tüomepu iman yanne tamtüoh;

¹³hangjingne toman-e tüopa nyoi mahtamlak; tüomepu kahtalan-e püohpinne wenkapu Youngwanpawe jaiteki, tüokhei tüopa mahtamlak jingne toman shon yangki.”

¹⁴Hüwante Iha ni yahne ngohpu nyemthepa ni tangte Lot wen, hüyange i, “Mamtüoh hüyange tüomepu yayong tüoh; Youngwanpawe tüopa chingnyu mahtamlak yang.” Hüpoi Iye wonnang she iman-e teih.

¹⁵Aope wangngai, hüwante wangdang shongmokpalan-e Lot te i, “Mamtüoh!” “Nenok sheko hei nangha ni yahyah hüyange yayong tüoh; hüke yetaima-a tüopa chingnyu phei jamshe numan-o mahlak.”

¹⁶Aope Lot nüngneiye ngohyapeih; Youngwanpawe shüpshe-e teihpu jingne, kahta ni-e I shekonyu hüyange Iha naoyha ni yak me shu-e tei-e pephang te lai tüoh.

¹⁷Iman yah-e yüoyang phei me, imni yo me sheja-e i, “Numan üyin jingne phettüoh; tokphei te eih tahlei, kahjee ümeken me-o tahlak, kahtang yete phettüoh, hüke yetaima-a numan om mahlak.”

¹⁸Hüpoi Lotte imante i, “Üyongpalan, hüke yeje,

¹⁹nange üte monghahpu üyong hüoyangki, hüyange shüpshe hüowe ü-üyin yin-e tam; hüpoi taowa kahtanglan yete phet-e yetai oklak yang; hangjingne mahshümpu-e ükem yüowe, tao likülakyang.

²⁰Leitehu, tüome phet ngoi okjangpu bangching (jila) ja, hüyange tüowa chingha ja, Taowa tüopate phet shihning, hatüowa yeonge shoi-e üno? Hümme nakshih ü-üyin-a yinlak.”

²¹Iye Ite i, “Leitüoh, taowe tüopa jengme-o nanga yahteki, hüke hanghepa bangching jeng nange i hatüowa taowe mah ne yetamlak.

²²Mamtüoh! Hangjingne nang tüokente manpei manpei taowe hango yeling oklak.” Tüokhei tüopa chinghate Zoar she nyik.

²³Lot, Zoar ngoiwante wanghe ongteiye ngoh yangki.

²⁴Hüwante mokhshe Youngwanpawe Sodom hei Gomorrah te wang mepu vün oun hei vün wai keine tam,

²⁵hüyange kahjee nopu, tüo me ngohpu üyinlan khongkümpu hüyange nyiempu phümha-wengyong üshei vün-e hahshu.

²⁶Hüpoi Lot shekonyuwe tokphei te, lüppe lei, hüyange yha hüm shongnyu ne menge mah.

²⁷Ünenap shomme ümeken nyoi me Youngwanpa phei I yong yangki, tüopa nyoi ngoilak jingne Abraham mam-e tai.

²⁸Hüyange lye Sodom hei Gomorrah te hüyange kahjee nopute üshei yete leiye tai, hüyange leihu, tüopa kahtok mepu vünkhuh-a vünjhomnyu vünkhuh kih-e nyeih ong.

²⁹Hüpoi aope Kahwange kahjee nyoi mepu chingnyulan mahne tam, Kahwange Abraham teih-e tüowe Iye Lot ngohpu chingnyulan mahtam wante, mahlakpa yo mepu Lot teine tam.

³⁰Sha-a Lot Zoar mepu onge kahtang me ngoh, hüyange I ha sheko ni I phei tai; hangjingne lye Zoar me ngohlak jingne nyam; hüyange I phei I ha ni jamme longsa phang me ngoh.

³¹Nyih ja nyayongnyuwe I naote i, “Teman üpa-a shaaji wuteki, hüyange kahtoknyu wanglam kih-e teman phei shilak netan hatüo wankon me ao-o yenang.

³²Kei tümni-e teman üpate wuwüngti-e jok ne tamhah, hüyange tümni I phei shiyange I mepu noksa üli anghah.”

³³Hüyange tüoya imni-e iman üpate wuwüngti yingne tam, hüyange nyayongnyu onge yoipa phei shi. Hüpoi I jamloi jokpu jingne yha aope shi hüyange aope lao Iye yeshing.

³⁴Üne nyih nyayongnyuwe naolinyu te i, “Leitüoh, minya tao üpa phei shi; teman-e üpa mepu üli anglak jingne teya-o Ite jokne tamhah, hüyange nang onge I phei shitüoh; hümme tümni moini-e tümni üpa kaiye hayim tüolak.”

³⁵Tüokhei tüoya-o imniye iman üpa te jokne tam, hüyange naolinyu onge I phei shi; üne-o I jokteiye ngohpu jingne yha aope shi hüyange aope lao lye yeshing.

³⁶Tüokhei, Lot hayim moini imni üpa kaiye püm yekengpe ngai.

³⁷Hüyange nya-yongnyuwe netan naha ja puh, hüyange I min Moab she nyik. I-a tenyih ngoiye Moablan pajeiyong ngohnang.

³⁸Naolinyuwe-o netan nahaja puh, hüyange I min Benammi she nyik. I-a tenyih ngoiye ngohpu Ammonlan hayim pajeiyong ngohnang.