Read Konyak Naga KAHTAMYENGHAN 2 Bible Online

KAHTAMYENGHAN 2 - Konyak Naga bible

KAHTAMYENGHAN 2

¹Hüke wang hei kahtoknyu hüyange iman ükhong üshei shoyangki.

²Hüyange nyit shepupa nyih me Kahwange Iye lingpu toisho; hüyange nyit shepupa nyih me Kahwange Iye linge ngaipu üshei jingne nyoi.

³Hüyange Kahwange nyih nyit shepupa te moiman tam; hüyange tüopa-a üjao nyih mei ja ne itte ang, hangjingne tüopa me Iye toi üshei ngaine tamme linge sho, hüyange Iye toloimei.

⁴Hüyange hükih-e wangphanga linge ngai. Aope Youngwanpa Kahwange wangphang linge ngaiya peih,

⁵kahtoknyu me peei hei pee yenang, hüyange phümha weangyong ülick manngai; hangjingne Youngwanpa Kahwange kahtoknyu me üne-o wai mankei tam, hüyange kahtok hamlak jingne kahta ja nehoi yenang;

⁶hüpoi kahtok üphang mepu lümpem ngaiye kahtok-a team ne tam.

⁷Tüophei me Youngwanpa Kahwange kahtok-e kahta yaowe ngai, hüyange I nateang me üyin lüo yowe tam, hüyange kahta-a üyin nyuha ja ne meng.

⁸Tüophei me Youngwanpa Kahwange heong ye me pesha ja, Eden me ling; hüyange tüome Iye yoiye linge ngaipu kahta tüoh.

⁹Hüyange Youngwanpa Kahwange shemei yaomapu pee ülam lili jongne tam hüyange ülick ümei ngaine tam. Pesha hotan me üyin phapu pee-o nyim ne tam, hüyange ümengpa hei ümei shingpu pee-o Iye nyim ne tam.

¹⁰Yengyin ja pesha team-e yünlak jingne Eden mepu ngai; hüyange tüopa mepu tamme yengyin peli ne meng.

¹¹Üwangpa min Pishon; hatüopawe hon ngohpu Havilah kahtok khongkümpu te neikonne yün nang;

¹²hüyange tüopa kahtok mepuwa meipu hon; hüyange tüome üpe meipu dellium hüyange onyx toinyu long ngohnang.

¹³Ni shepupa yengyin min Gihon; hatüowe Cush kahtok khongküm pute neikonne yünnang.

¹⁴Hüyange lüm shepupa yengyin minna Tigris, Assyria heong ye me yünnang. Hüyange peli shepupa yengyin-a Euphrates.

¹⁵Youngwanpa Kahwange kahta-a woiye peiye Iye Eden pesha hamlak hüyange yomlak jingne tüoh.

¹⁶Hüyange Youngwanpa Kahwange kahta te ngao phawe i, “Pesha pee lili mepu nange hüke hahpu oklak;

¹⁷hüpoi ümeng ümei shingpu pee mepu nange tah hah; hangjingne nange aope nyih tüopa mepu hahlakei nang lilak.”

¹⁸Tüophei me Youngwanpa Kahwange i, “Kahta I shaha ngohlak yemei; Ite jamponglak jingne I phei shupu ja linglakei.”

¹⁹Hüyange Youngwanpa Kahwange kahtok mepu kümp oun ütam yahyange phao yinmok üshei hüyange wang awha üshei linge ngaiyange Iye hanghe min me nyiklakei she kahta tangte woiye pei; hüyange kahtawe üyin yinmok te hanghe nyik, hatüo iman min ne meng.

²⁰Hüyange kahtawe nokme tampu yinmok üshei te, hüyange wang awha üshei te, hüyange phao yinmok üshei te min pha; hüpoi kahtapa jingne Ite teijamlak wange ngoipu ja nehoi yetüo.

²¹Tüophei me Youngwanpa Kahwange lipukih-e shilakpa kahta me ngaine tam, hüyange I shiye mah; hüyange shiye ngohwante I mepu hempa waan ja yahyange tüopa meeme mei phei büangne tam.

²²Hüyange hempa leakwaan, hanghepa Youngwanpa Kahwange kahta mepu yah, tüopawe Iye sheko ja yaowe ngai, hüyange yha kahta tangte woipei.

²³Hüwante kahtawe i, “Üküm ne hatüowa ü-waan mepu waan, hüyange ü-mei mepu mei; Yhate sheko she nyiklak hangjingne yha kahta mepu yah ngai.”

²⁴Tüojing ne kahtawe yoi nyu hei pa tüohyange yoi shekonyu phei ja ne mengnang; hüyange imni mei ja nehei menglak.

²⁵Hüyange kahta hei I sheko moini pümkeng me ngoh, hüyangpoi teiwüopu yenangpe ngoh.