Read Konyak Naga KAHTAMYENGHAN 20 Bible Online

KAHTAMYENGHAN 20 - Konyak Naga bible

KAHTAMYENGHAN 20

¹Tüo mepu Abraham Negeb wankon yete yayong, hüyange Kadesh hei Shur nipa me nyoi, tüophei me ütenja I Gerar me ngoh;

²hüyange Abraham-e yoi shekonyu Sarah jeng hüke i, “Yha-a ü-nao.” Tüokhei Gerar ahngpa Abimelech-e shon tei-e Sarah yah.

³Hüpoi yaning shinmang me Abimelech tangte Kahwang ngai hüyange hüke i, “Nanga lilak, hangjingne nange yahpeipu sheko-a nok ne mengte phei nyuyong ngohnang.”

⁴Hüpoi Abimelech-a yha shongte manwen, hüyange lye i, “Youngwanpa, nange hango yepaohpu kahta mahne tamlak a?

⁵Iye yoi nyingnyingke, ‘Yha-a ü-nao üja,’ she üte ye-i a? Hüyange yha-e yoi nyingnyingke, ‘I-a üjei’ she i. Ü-mongjang jaoshepu phei hüyange ü-yak ümeng yenangpu phei taowe hatüo lingyangki.”

⁶Tüophei me Kahwange Ite shinmang me ngao, “Eihja, nange nang mongjang jaoshapuphei hatüo ling she Taowe shingnang, hüyange nange ü-phei tüi-e ünu omlak mepu tük-e angpuwa Tao; tüokhei nange yhate jon ne Taowe yetam.

⁷Sha-a tüokhei, sheko-a yoi netanpa dangte leih ye ne tamtüoh, hangjingne Iya hipa ja ngohnang, hüyange Iye nangjingne yop tamkülak, hüyange nang üyin ngohlak. Hüpoi nange yha leih ye ne yetam ma-a, nang hei nang kahtalan üshei ütingme lilak she shingyah.”

⁸Tüokhei Abimelech shom me lüowe yoi shaoshanpalan üshei nyik jem, hüyange ngaipu üshei iman te i; hüwante iman yeonge nyam.

⁹Tüophei me Abimelech-e Abraham te nyik, hüyange Ite hüke i, “Nange toman te hanghe lingpu? Taowe hanghe lam me nang phei tüi-e ünu ompu jingne nange tao hei ü-ahngching te mahlakpa üyong yah peipu? Nange üte yelinghah shepu toi lingpu yang.”

¹⁰Abimelech-e Abraham te i, “Nange hatüowa hanghe teihyange lingpu?”.

¹¹Abraham-e jan, “Taowe teih, ütingme Kahwang te nyampu tüopa kahtok me ao-o yenang: hüyange ü-sheko jengme iman-e tao toikülak!

¹²Tüo tokte yha-a ütingme ü-nao ngohnang, yha-a ü-pa üha, hüpoi ü-nyuwe puhpu ne yeje, hüyange yha-a ü-sheko ne meng.

¹³Tüokhei aope Kahwange tao üpa nok mepu wa-e taine tam yapeih, yha te taowe i, ‘Kahta lili te taowe nangjei she ipu kaiye nange üte hangshin monghah nange hüopu oklak.’”

¹⁴Hüwante Abimelech-e Abraham te Sarah leih pha, hüyange tüophei jam-e lye Ite nyee, mahu, hüyange rhalan-o pha.

¹⁵Iye Abraham te i, “Ü-kahmük nopu hatüo me ngoh nang; nang ümeken me ngoh hu tüoken me nyoitüoh.”

¹⁶Iye Sarah te i, “Aoyin nang phei ngoh, tüolan khongkümpu sheshao me nang me ümeng yenang ja she hüowe; nange püohpinpu hango yelingja she moilanne shinglak jingne taowe nangjei te khüm ngin khüw haja ja phanang.”

¹⁷Tüophei me Abraham-e Kahwang te yop, hüyange Kahwange Abimelech hüyange I nok shekonyu hüyange I rhanyulan meiye tam; tüokaiye iman-e ha puh moi pai.

¹⁸Hangjingne Abraham shekonyu Sarah jingne Kahwange Abimelech nok mepu naonyoi üshei tükke angyangki.