Read Konyak Naga KAHTAMYENGHAN 21 Bible Online

KAHTAMYENGHAN 21 - Konyak Naga bible

KAHTAMYENGHAN 21

¹Iye ngaoyangpu kih-e Youngwanpa Sarah dangte pei, hüyange Iye janyangpu kih-e Youngwanpawe Sarahte ling.

²Hüyange yha püm yekengpe ngai, hüyange Abrahamte Kahwange Ite ngaopu hipak me I wutei-e netanha puhtam.

³Abraham-e Ite Sarah kaiye puhtampu nahate Isaac she min,

⁴hüyange aope Isaac nyih tet ngoi yapeih, Ite Kahwange ngaowe tampu kih-e Abraham-e Ite shokhüppe tam.

⁵Aope Ite Isaac puhtam yapeih, Abraham wangpeng gho ja lwngmei ne mengteiye ngoh yangki.

⁶Sarah-e i, “Kahwange üte mongmei hüyange nyipu peitam nang. Aoyinne tüopa jeng jailakei moilan-e ü-phei nyilak.”

⁷Hüyange yhawe jam i, “Sarahwe naha tamlak she Abraham te aowe ine no? Hünyi I wu te phei te taowe netanha ja puh tamnang.”

⁸Hüyange naha-a jong, hüyange düam hah pu lak; hüyange Isaac-e düam hahpu lakpu nyih me Abraham-e mo üyong ja tümme uhying yangki.

⁹Hüpoi nyih japu hipak me Egypt sheko Hagar üha Ishmael, yhawe aohipa Abraham te puhtam, Sarah üha Isaac phei wonne ngoh.

¹⁰Sarah-e tüopa ngeyange Abraham te i, “Tüopa rhanyu hüyange yha üha ni jange teitüoh. Tüopa sheko ühate, ü-ha Isaac-e tüolak nang jing mothlei meitam hango yepha tamlak.”

¹¹Tüokaiye Abraham yeonge mongshangne tam, hangjingne Ishmael-o I ha ne muh ngoh.

¹²Hüpoi Kahwange Abraham te i, “Naha jeng me hüyange nang rhanyu jeng me nang mong shange tah ngoh. Sarah-e nangte hangke i, hüke ling tüoh. Hangjingne Taowe nangte janpu nang huhayim lanna Isaac kaiye nange tüolak.

¹³Hüyange Taowe rhanyu üha kaiye-o hayimlan üngang phalak, tüokaiye iman-o jat ja ne menglak. Hangjingne I-o nangha muh.”

¹⁴Ünenap sheshong she Abraham-e Hagar te hahying ütam hüyange meisho nyekhok ja me yeng maawe tüm-e pha. Iye naha-a yha tok me puhne tamyange taine tam. Yha yayong hüyange Beersheba phaonyu jongme wa-e kem.

¹⁵Aope meisho nyekhok mepu yeng khongküm kümme yüoyapeih, yhawe naha-a phümtümp phang ja me ange tüoh;

¹⁶hüyange weanglah-han yüojing shin-e (yejema-a phak denga nanjing) jaiye taiye shot, yhawe yoi nying nying te i, “Üha lipu te taowe leiye ngohne yenün oklak yang.” Aope yha tüoken me I phei janhüowe shot, naha-a üngwünne shap.

¹⁷Kahwange naha shappu jai, hüyange Kahwang shongmokpawe wangdang mepu Hagar te ngaowe i, “Nang hangte shangpu, Hagar? Tahnyam, hangjingne Kahwange naha shappu jaiteki.

¹⁸Yongtüoh wen-e naha loi yah-e nang yak me paiyah, hangjingne taowe I-a jatnyu ne ling tamlak.”

¹⁹Hüyange Kahwange yha mük eppetam, hüyange yhawe yeng ngohpu yengnungja nge; hüyange yha wenne meisho nyekhok maawe yeng shao hüyange naha te yingnetam.

²⁰Hüyange Kahwang naha phei ngoh, hüyange naha jong; Iya wanwüng nyoi me jong hüyange Iya wenglah kepmanpa ne meng.

²¹Iya Paran wanwüng nyoi me nyoi, hüyange Inyu-e I sheko ne Egypt mepu yah pei.

²²Tüopa nyih hipak me yoi nyahpong woipa Phikol woiyange Abimelech pei hüyange Abraham te i, “Nange lingpu toi üshei me nang phei Kahwang ngoh nang.

²³Tüokhei sha-a Kahwang sheshao me nange üte, ühayimlan te, yejema-a ü-huhayimlan te lowelamme yelinglak she jiengpu ja yahtüoh. Taowe nangte meimawe jonyangki, tüokhei üte, hüyange ümeken me nang nyoinang tüopa kahmükte-o meimawe jonlak she nange-o jantüoh.”

²⁴Abraham-e i, “Taowe jannang.”

²⁵Aope Abraham-e Abimelech shaoshanpalan-e yengnung nyieye yahpu jeng yemeipe ngao,

²⁶Abimelech-e i, “Hatüo ao lingpu, taowe yeshing; nange-o üte tüopa jeng ye-i, hüyange taowe tüopa ngao jaipu tenyih üwangpa ngohnang.”

²⁷Tüophei me Abraham-e nyee hei mahu ütam yah peiye Abimelech te pha, hüyange imniye teijanpu yah.

²⁸Hüyange Abraham-e yoi nyee ükhong mepu nyeeha nyit yanne khatte ang.

²⁹Hüyange Abimelech-e Abraham te tong, “Tüolan nyeeyhalan nyit, nange leye angpu tüote leppu hanghe shi?”

³⁰Hüyange Abraham-e janne i, “Taowe tüopa yengnungshao she, üte saki phalak jingne, tüolan nyeeha nyit nange ü-yak mepu yah tepha.”

³¹Tüokhei tüopa nyoite Beersheba she nyik, hangjingne tüoken me imni moiniye jiengpu yah.

³²Beersheba me iman-e tüopa teijanpu yahyang phei me, Abimelech hei Phikol ni Philistiate leih ye.

³³Tüophei me Abraham-e Beersheba me tamarisk pee dei, hüyange üküm yenangpu Kahwang, Youngwanpa te yoppe khüm.

³⁴Hüyange Philistia me Abraham hipak laowe nyoi.