Read Konyak Naga KAHTAMYENGHAN 22 Bible Online

KAHTAMYENGHAN 22 - Konyak Naga bible

KAHTAMYENGHAN 22

¹Tüolan phei me, Kahwange Abraham te tok; hüyange lye i, “Abraham!” Hüyange Iye jan, “Tao tüome ngoh nang!”

²Kahwange i, “Nang ha, Isaac ja shingha ngohpu, aote nange kennang, I woiyange Moriah kahtok te taitüoh, hüyange tüoken me Taowe nangte kahtüo ja hüopha peih, tüoken me I-a üte jakke dotüoh.”

³Tüokhei ünenap Abraham shonge laowe jakke dolak jingne han ütam tatte tümyange; yoi jing gado me tümme tam, hüyange I phei shaoshanpa naoshe ni hüyange yoiha Isaac woi; hüyange Kahwange Ite ngaowe tampu nyoijingja te tai.

⁴Nyih lüm shepupa me Abraham-e yoi mük wemme leiwante kahmük-a üjai me nge.

⁵Hüwante Abraham-e yoi naoshe ni te i, “Numan gado phei tüome tanne ngohkei; otüo kente tao hei naha tomni taishih ning hüyange khümyange nishe numan tangte leih-e yeküning.”

⁶Hüyange Abraham-e jakke dopu me jaklak han yah-e yoiha Isaac te paine tam, hüyange Iye yoi yak me jakke wanglak jingne vün oun phei yang ja yah. Tüophei me imni moini jamshe tai.

⁷Isaac-e Ipa Abrahamte tong, “Opa!” Hüyange Ipa jan, “Üha, tao tüome ngoh nang!” Isaac-e i, “Taowe vün hei hanpa-a ngenang; hüpoi jakke dolak jingne nyee üha üpu?”

⁸Abraham-e janne i, “Ü-ha, Kahwang lye muh yoi jingne jakke dolak nyeeha ja yah phalak.” Tüokhei imni moini jam jamshe muh kemme tai.

⁹Aope Kahwange Ite ipu nyoite iman pei, Abraham-e tüoken me wümjong ling, hüyange tüopa tangme han üyin shinne ang; Iye yoiha Isaac shayange jakke dolak wümjong han tangme ang.

¹⁰Tüophei me Abraham-e yoi yak-e yoiha tangtoilak jingne yang no.

¹¹Hüpoi Youngwanpa shongmokpawe wangdang mepu Ite nyik-e i, “Abraham, Abraham!” Hüyange lye jan, “Tao tüome ngoh nang.”

¹²Iye i, “Naha te nang yak tah yu, hüyange Ite hango tahling; hangjingne, nange nangha, nangha ja shingha ngohpu ü-mepu yetükpu khei, shaapa-a nange Kahwang te nyamnang she taowe shing teki.”

¹³Abraham-e ngan lei wante, I tokphei me nyeepong ja phümtümp me I üwong wahyange nge; Abraham wenne nyeeponga yahyange jakke dolak jingne tüopa-a yoiha nanleiye toi.

¹⁴Tüokhei Abraham-e tüopa nyoite “Youngwanpawe yahphalak” she nyik. Hüyange tenyih te ngoiye kahtalan-e “Youngwanpa kahtüo me lye yahphalak,” she inang.

¹⁵Hüyange Youngwanpa shongmokpawe Abraham te nishe wangdang mepu nyik,

¹⁶hüyange i, “Youngwanpawe inang, nange toishao hatüo lingpu jingne hüyange nangha ja shingha ngohpu, yetün pukhei, Taowe ü-min me jieng yangki.

¹⁷Taowe ü-moiman me nang moiman-e tamlak, hüyange jalunpu me Taowe nanghu nanghalan wangdang shanhalan kih jalun tamlak, hüyange yengching nah me ngohpu pheihkek shinne ngailak Taowe jannang. Nanghu nanghalan-e iman wepalan naolak.

¹⁸Taowe nang huhayimlante moiman tampu kih-e imante-o moiman tampha she jatlan üsheiye üte tonglak. Tüolan khongkümpuwa nange ü-ngaokenglan jaiye jonpu jingne ngohlak.”

¹⁹Tüokhei ABRAHAM yoi shaoshanpalan tangte leih-e ye, hüyange iman jamshe yayonge Beersheba te tai, hüyange Abraham Beersheba me chingnyoi.

²⁰Tüolan üshei linyang phei me Abraham te tüo ngao i, “Leitüoh, nang nao Nahor me-o Milcah-e nahalan puh tamteki;

²¹Uz üwangne puhpupa, hüyange I nao Buz, hüyange Aram üpa Kemuel;

²²Khesed, Hazo, Pildash, Jidlaph, hüyange Bethuel.”

²³Bethuel-e Rebekah puh; tüolan kahta tet Milcah-e Abraham ünao Nahor te puh-e tam.

²⁴Hüyange I jing phongphe nyu aohi min Reumah, lye-o Tebah, Gaham, Tahash, hüyange Maacah she puhtam.