Read Konyak Naga KAHTAMYENGHAN 23 Bible Online

KAHTAMYENGHAN 23 - Konyak Naga bible

KAHTAMYENGHAN 23

¹Sarah nyupuh wangpeng gho ja phei me da me nyit ngoiye jin laowe ngoh.

²Hüyange yha Kanan kahtok Hebron me li. Hüyange Abraham-e yha lipu jingne shappe yoonge mangshap.

³Abraham-e lipunyu tüopa nyoi me tüoh, hüyange yayonge tai-e Hit hayimlante i,

⁴“Tao numan phei yinpa ja hüyange jam-e ngoh peipu kahta; taowe ü-lipu nyu ü-sheshao me mu oklak ne numan mepu mang mulak nyoi ja yüowe tamkhu.”

⁵Hitlan-e Abraham te janne i,

⁶“Tomante jaipha, üyongpa. Toman-e nanga wongnangpu ahngha ja she leinang. Toman jing mangkoksa nyoi shemeipupa me nang lipu nyu-a mu tüoh; nange nang lipu nyu yemu oklakne toman aowe-o yoi mangjong nang mepu tükke ye-anglak.”

⁷Hüwante Abraham yong hüyange kahmük kahta Hitlante khuh ta-e khüm.

⁸Iye i, “Numan-e üte hatüo me ü-sheko mu ne tamhu küma-a, chingmei lamlinge Zohar üha Ephronte tongkei, hümme nakshih, I jingne mengpu Machpelah longsa Iye üte phakülak; hatüo-a I jing kah yashong me ngohnang.

⁹Numan ngohwante ümee khakwange Iye hatüo-a üte mangmu nyoine phapu oklak.”

¹⁰Sha-a Ephron-a Hitlan yo me shot-e ngoh, hüyange Hitlan Ephron-e Hitlan aoyin chingnyu peten mongte ongyapeih, tüolan üshei ngao jaiyange Abrahamte jan,

¹¹“Yeje, üyongpa, üte jaipha; taowe nangte kah phanang, hüyange taowe nangte hatüo me ngohpu longsa-o om-e ü-kahta tüolan sheshao me phanang, nang manga mutüoh.”

¹²Abraham-e Hitlan sheshao me khuhtawe khüm;

¹³hüyange kahta lili-e jailak jingne Ephron phei ngaowe i, “Taowe nangte tonghu nang, chingmei lam linge jaikei. Kah-a taowe khongküm shaklakei; taowe phapu ümee yahtepha, hüyange taowe ü-sheko tüoken me mu ning.”

¹⁴Ephron-e Abrahamte janne i,

¹⁵“Üyongpa, üte jaikei, kahmük-a khüm ngin ükhüw gho peli hei shangnang ja, tümni pa me hatüowa hanghe? Tüoken me nenok mang mu tüoh.”

¹⁶Abraham-e Ephron ngao me yah; hüyange Abraham-e Iye Hitlan sheshao me ngaiye ipu khüm ngin ükhüw gho peli, pheeinyu leihpalan-e jonpu khak wangpu toklak me tokke Ephron te pha.

¹⁷Tüokhei Ephron moth ne ngohpu kahtok, hanghepa Machpelah me Mamre heong ye me ngoh, Abraham jingne meng. Tüopa me kah, tüopa nyoi me ngohpu longsa, hüyange kah me ngohpu pee khongkümpu, Inok moth yikengpong te linpu omme ngoh yangki.

¹⁸Hitlan aoyin tüopa jempu me omme chingnyu peten me ngoh, khongkümpuwe hatüowa Abraham jing moth she shinge yah.

¹⁹Tüophei me, Abraham-e Mamre heong ye me ngohpu Machpelah longsa Kanan kahtok me yoi shekonyu Sarah mang mu.

²⁰Tüokhei Hitlan jingne ngoh yangpu kah, hüyange tüopa me ngohpu longsa, Abraham jing mang mulak kahtok moth ne menge mah.