Read Konyak Naga KAHTAMYENGHAN 24 Bible Online

KAHTAMYENGHAN 24 - Konyak Naga bible

KAHTAMYENGHAN 24

¹Sha-a Abraham yeonge wupa ne mengteiye ngoh, hüyange ülam lili me Youngwanpawe Abraham moiman tam.

²Hüyange Inok me shaoshanpa she- lwngmeipu, ao lye nangpu üshei tangme nokpu ne menge ang, Ite Abraham-e i, “Nang yak ü-yungkeng nipa me pittüoh hüyange jieng tüoh.

³Kahtok hüyange wangdang Youngwanpa min me, hatüo mepu Kanan kahtalan yo mepu üha jingne sheko yele lak she nangte taowe jiengpu yahne tamhu nang.

⁴Hüpoi tao ümeken me puh tüopa kahmük te nang leih yetüoh, hüyange ü-jat ü-li yo mepu üha Isaac jingne sheko ja yamtüoh.”

⁵Hüpoi shaoshanpawe Ite i, “Naoyhawe ü-phei woi-e tüopa kahtok te yepei hu ne ok, hüke ngaima-a, taowe nangha hanghe kahtok mepu nang pei, tüoye temuh nishe woiye teilak a?”

⁶Abraham-e jan-e i, “Nange ü-ha nishe tüoyekao te shonne üyetamlak jingne kentingyah!

⁷Youngwanpa, wangdang Kahwang aowe tao üpa nok mepu hüyange tao puhpu nyoi mepu woipei, hüyange aowe ü-phei ngao, hüyange aowe üte jiengjeppe i, ‘Nang huhayimlan te Taowe tüopa kahtok phalakei;’ lye yoi wangdang shongmokpa nang shaote shonlak, hüyange nange tüomepu üha jingne sheko tüolak.

⁸Hüpoi naoyhawe nang pheite woilak yemongma-a, hüwante nange üte jiengjeppu jeng hango ümeng yengoh lak. Hüpoi jaja kihpu yatuhshao ngaiyapoi nange ü-ha tüokente leih üyetamlak yang.”

⁹Tüokhei shaoshanpawe yoi yak Abraham yungkeng nipa me pitte tamyange I nokpuwe hanghe tong tüopa linglak jingne jiengpu yah.

¹⁰Tüokhei shaoshanpawe yoi nokpupa udh pen yahyange, hüyange yoi nokpupa mepu hünghao üshei yahyange Mesopotamia apyekao ümeken me Nahor nyoi, tüopa chingnyu te tai.

¹¹Aope I ngoiya peih, chingnyu ünahye mepu yengnung me lye udhlan yatuh shünge shotne tam. Hatüowa shekolan yenglaipu ünpong hipak ne ngoh yangki.

¹²lye yoppe i, “Youngwanpa, ü-nokpu Abraham Kahwang, tenyih üte okpu yahkei hüyange ü-nokpupa Abrahamte nange janpu angpha.

¹³Tao hatüo ken yengnung me yonge ngohnang; hüyange chingnyu mepu naoyhalan hatüo nyoite yengshüo ne laikülak.

¹⁴Hüwante hatüo hüke ngaine tamtüoh, aohipa naoyha te taowe ‘yeng yinglak jingne nang yengtük chingmei lamlinge no-khu’ she ilakei hüyange aohinyuwe ‘yingtüoh, hüyange taowe nang udh te-o yingpha ning’ she, ilakei, tüopa-a nange nang rhapa Isaac jingne lepu ne mengpha. Hükih-e ngaipha ma-a, tüokaiye nange ü-nokpute janpu angteki she taowe shinglak.”

¹⁵Iye yoppu mansho pe, Rebekah, ao Abraham ünao Nahor shekonyu Milcah üha Bethuelwe puh, yengtük phaktang me paiyange pei ngoi.

¹⁶Naoyhanyuwa yeonge naoyha meipu hüyange jaoshepu netan ao phei-o manhüopu naoyha ja ne ngoh; hüyange yhawe yengnung te yuwe, yoi yengtük maawe shaowe ngai.

¹⁷Hüwante shaoshanpawe yha phei hüolak jingne phette wenne i, “Chingmei lamlinge nang yengtük mepu yeng üjingha üte yingtam khu.”

¹⁸Yhawe i, “Yingtüoh, üyongpa,” hüyange yhawe mam-e, yha yengtük phaktang mepu yakme nowe taiyange Ite yinge tam.

¹⁹Aope lye yinge sho, yhawe i, “Taowe nang udhlan jingne-o, iman-e yinge mansho mansho yeng shaoküning.”

²⁰Tüokhei yhawe mam-e, yoi yengtük mepu aksheng me yeng yeiyange, yengnung te nishe phette ye-e I udhlan khongkümpu jingne yeng shao.

²¹Kahtapawe I yintaipu yin ünna Youngwanpawe moimanne tampu jeyapu she, ngao yengaipe yhate lei.

²²Aope udhlanne yeng yinge sho, kahtapawe shekel tangkhüw tokyangpu hon naju yahpuwe yha nateang me künne tam, hüyange yha yak me hon wentong ni shekel pen tokyangphei lange tam.

²³Iye i, “Nanga ao nok naoyha shi? üte itehu! Nangpa nok me toman jingne ngoilak nyoi ngohlak jeya?”

²⁴Yhawe Ite janne i, “Taowa Milcah hei Nahor nok üha Bethuel nok naoyha.”

²⁵Üne-o yhawe Ite i, “Toman nok me tahjan hei phümyak wangman-e ngoh nang, hüyange numan ngoi oklak nyoi ngoh nang.”

²⁶Hüwante kahtapawe yoi yatuh shüng hüyange Youngwanpa te yoppe khüm.

²⁷Hüyange lye i, “Youngwanpa, ü-nokpu Abraham Kahwang minyong tüoh; aowe ü-nokpupa te yoi janpu ngaotingpa me ange tam. Youngwanpawe ü-nokpupa jeihei naolan nok lam yete tingkhakke tao woipei ne tam.”

²⁸Naoyhanyu yoi nyu nokte phette ye hüyange pungao khongkümpu iye tam.

²⁹Sha-a Rebekah I jei ja min Laban ngoh; hüyange ümeken me Abraham shaoshanpalan ngoh tüoye te lailak jingne I nokshao te phette yu.

³⁰Aope lye yoinao nateang me naju hüyange yak me wentong langyange nge, hüyange aope Iye Inao Rebekah ngao, “Kahtapawe hüke üte ngao,” she ipu jai, hüwante I tüopa kahta tangte lai; hüyange leitüoh, I udh phei yengnung ü-o me yongyange ngoh yangki.

³¹Iye i, “Kei, nang Youngwanpawe moimanpupa; hangne nang ünah yeme yongyange ngohpu? Hangjingne taowe numan ngoilak nok hüyange udhlan jingne nyoi temteki.”

³²Tüokhei kahtapa noksate ong, hüyange Laban-e udh me ngohpu hangkilan ngeh yah, hüyange imante tahjan hei phümha pha. Tüophei me I pheipulan-e iman ya tuhlak jingne Iye yeng peiye tam.

³³Aope hahyinglak jingne tümme yüoya peih, kahtawe iyangki, “Taowe hanghe ilakne ngoh, manngao pute taowe hango minhah.” Hüwante Iye i, “ngao kei.”

³⁴Tüokhei Iye i, “Taowa Abraham shaoshanpa.

³⁵Youngwanpawe ü-nokpupa yeonge yonge moiman teki, hüyange I hakpane menge tamteki. Hüyange Iye Ite nyee ükhong hei youn, mahu ükhong, hüyange hon hei khüm, hüyange rhapa hei rhanyulan, hüyange udh hei gadolan pha.

³⁶Hüyange Sarah, ü-nokpu shekonyuwe, ü-nokpupa te yha wunyu ne mengte phei te, netan nahaja puh-e tam; hüyange Iye Ite yoi me nangpu üshei phateki.

³⁷Ü-nokpupawe I ngaokeng jaiye linglak jingne üte jienge i, ‘Nange ü-ha jingne Kananlan sheko yo mepu, aoyin yo me tao ngoh nang, sheko ne tahyah tam;

³⁸hüpoi nanga üpa nok hüyange ü-jat hei li tangte taiye, ü-ha jingne sheko yahtüoh.’

³⁹Hüwante taowe ü-nokpupate iyangki, ‘Shekonyuwe ü-phei te yewoihulak ne ngohma-a hangke ilak?’

⁴⁰Hüpoi Iye üte i, ‘Youngwanpa ao sheshao me tao kemnang, Iye yoi wangdang shongmokpa nang phei shonne nang lamnyu me okke tampha lak. Nange ü-ha jingne ü-kahtok mepu, hüyange üpa kahtok mepu sheko woiye peilak.

⁴¹Nange jiengpu mepu ümengne yemeng lakne nang jingne ülam ja hei ngoh nang; üpheipulan tangte nang taiyang phei te, iman-e lan küma-a, hüma-a jiengyangpu jingne nang me ümeng yenanglak.’

⁴²“Tenyih tao yengnung te pei, hüyange i, ‘O Youngwanpa, ü-nokpu Abraham Kahwang, nange sha-a tao yintaipu moimantam pha.

⁴³Tao hatüo me, yengnung nah me yongyange ngohnang; aope naoyha ja yeng te lailakei, “Nang yengtük mepu yeng yinglak jingne üte chingmei lamlinge yahkhu,” she taowe yha te tonglak;

⁴⁴aope yhawe phalak jingne monge, “Nange yingtüoh, hüyange taowe nang udh jingne-o yeng shao phaning,” she ima-a, tüopa-a Youngwanpawe ü-nokpu ü-ha jingne lepu ne mengtam shih.’

⁴⁵“Taowe ü-mongjang me yoppu manshope ngohwante, Rebekah yoi phaktang me yengtük paiyange pei, hüyange yha yengshaolak jingne yengnung te yu. Taowe yha te i, ‘Chingmei lamlinge üte yinge tamkhu.’

⁴⁶Hüyange yhawe mam mamshe yoi phaktang mepu yengtük nowe yahyange i, ‘Yingtüoh, hüyange taowe nang udh te-o yingtam phaning.’ Tüokhei taowe ying, hüyange yhawe udh te-o yinge tam.

⁴⁷Hüyange taowe yha te tonge i, ‘Nanga ao nok naoyha shi?’ Hüyange yhawe janne i, ‘Nahor üha Bethuel nok naoyha, ao Milcah I shekonyuwe puh.’ Tüokhei taowe yha nateang me naju juwe tam, hüyange yha yaksea me wentong lange tam.

⁴⁸Taowe yatuh shüng hüyange Youngwanpate yoppe khüm. Ü-nokpu Abraham Kahwang Youngwanpa te taowe minyong, aowe tingkhakke ü-nokpu jat hei li tang te tao woipei, ümeken me taowe ü-nokpupa üha jingne Inok yhamei tüone tam.

⁴⁹Sha-a numan-e ü-nokpute kenne hüyange ütingpa me jonhuma-a, üte itam pha; hüyange üne-o ütingpa me minjan she iyapoi üte itam pha; tao yakjah yete yejema-a yaknya yete lüplak.”

⁵⁰Hüwante Laban hei Bethuel niye janne i, “Hatüowa Youngwanpa mepu peipu ne mengtepuwe toman-e nangte ye-i oklak yang.

⁵¹Leitüoh, Rebekah nang sheshao me ngohnang, yha woi teiyah, hüyange Youngwanpawe ipu kih-e yha nang nokpu ü-ha shekonyu ne mengtam tüoh.”

⁵²Aope Abraham shaoshanpawe iman ngao jai, I yoi nying nyingke khuhta hüyange Youngwanpate yop khüm.

⁵³Hüyange shaoshanpawe khüm, hon, hüyange oleng ok ngaiye Rebekah te pha. Hüyange Iye yha üjeite hüyange yha ünyu te-o pheeiwanpu hünghaolan pha.

⁵⁴Tüophei me Abraham shaoshanpa hüyange I phei ngohpu kahtalan-e hahying yange tüoya-a tüome püm. Aope iman napning shinlüo yapeih, Iye i, “Tao ü-nokpupa tangte yeshih ning.”

⁵⁵Hüpoi Rebekah I jei hei I nyu niye i, “Yhameinyuwa nyih ütenja, hüke nyih pen nehoi, toman phei ngohne tamtüoh, tüophei me yha taipu oklak.”

⁵⁶Hüpoi Iye imante i, “Toman tük-e tah-ang pha. Hangjingne Youngwanpawe tao yinkempu moiman tamteki; tao ü-nokpu tangte leih yeshih ning.”

⁵⁷Iman-e jan, “Toman-e yhameinyu nyik-e yhawe hangke monglakei tongkü ning.”

⁵⁸Tüokhei iman-e Rebekah te nyik hüyange tong, “Nang tüopa kahta phei taihu ya?” Yhawe jan-e i, “Tao tailak.”

⁵⁹Tüokhei iman-e iman ünao Rebekah, hüyange yha shaoshannyu, hüyange Abraham shaoshanpa hei I kahtalan shonne tei.

⁶⁰Hüyange iman-e Rebekah te moiman phawe tüolan ngao i: “Yhamei, nang haja tokte haja pen ünyu ne mengtüoh! “Nanghu nanghalan-e iman wepalan jing chingnyulan naone tam tüoh!”

⁶¹Tüophei me Rebekah hei naoyhalan tümme sho, hüyange udh me shotyange Abraham shaoshanpa phei te woi tai. Hüyange shaoshanpawe Rebekah woiyange yoi lamnyu yete tai.

⁶²Sha-a Isaac Beer-lahai-roi yekao mepu pei; hüyange Kanan heyekao me ngoh.

⁶³Isaac kah yekaote ünshao me kemkem she ngai, hüyange leishihshao me udhlan yepu nge.

⁶⁴Aope Rebekah-e mük wemme lei hüyange Isaac nge, yha udh toktang mepu mamshe yu;

⁶⁵hüyange yhawe Abraham shaoshanpa te tong, “Teman phei hüone kahko me kempu kahta-a ao shi?” Hüwante shaoshanpawe i, “Hatüowa ü-nokpu.” Hüwante Rebekah-e yoi sheta lümpu inkhekke shanglüm.

⁶⁶Hüwante shaoshanpawe Isaacte Iye lingyangpu üshei iye tam.

⁶⁷Tüophei me Isaac-e yoi nyu Sarah nyenokte yha woi pei, hüyange Rebekah yoi sheko ne meng. Isaac-e Rebekah te ken, tüokaiye Inyu liphei me I mong toloimeipu ok.