Read Konyak Naga KAHTAMYENGHAN 25 Bible Online

KAHTAMYENGHAN 25 - Konyak Naga bible

KAHTAMYENGHAN 25

¹Abraham-e sheko ülao yah, hüyange yha min Keturah.

²Hüyange yhawe Ite Zimran, Jokshan, Medan, Midian, Ishabak, hüyange Shuah puh tam.

³Jokshan mepu Sheba, hei Dedan jalun. Hüyange Dedan hayimlan Asshurim, Letushmim, hüyange Leummim ne ngoh.

⁴Hüyange Midian halan Ephah, Epher, Hanoch, Abida, hüyange Eldaah ngoh yangki. Tüolan khongkümpu-o Keturah hayimlan.

⁵Abraham-e yoi me nangpu üshei Isaac te tüoh.

⁶Hüyangpoi I üyin me ngohpu hipak me ülao shekolan-e puhtampu hayimlante-o moth hünghao pha; tüophei me tüolan hayim Isaac mepu yanne heongye kahmükte shonne teiyangki.

⁷Abraham nyupuh wangpeng gho ja phei me denyit me nga ngoh yangki.

⁸Hüyange Abraham-e yoi yaha phawe nyupuh wangpeng wange ngoiyang phei me I li; puyong kahta, wangpeng shaaji ngoiteiye I yoi pheipulan phei om.

⁹Isaac hei Ishmael, I ha niye I-a Hitlan Zohar üha Ephron kahtok me ngohpu Machpelah longsa me mu; hatüowa Mamre shaome ngoh nang.

¹⁰Hitlan mepu Abraham-e shakpu kah; tüoken me Abraham yoi shekonyu Sarah phei mu.

¹¹Abraham liphei me Iha Isaac te Kahwange yeonge moimantam hüyange Isaac Beer-lahai-roi me nyoi yangki.

¹²Egypt sheko Hagar, Sarah rhanyuwe Abraham te puhtampu Abraham üha Ishmael jin hatüo;

¹³Hatüolan-a Ishmael hayim ja phei me ja she: Nebaioth, Ishmael mepu üwangpa ha; tüophei me Kedar, Adbeel, Mibsam,

¹⁴Mishma, Dumah, Massa,

¹⁵Hadad, Tema, Jetur, Naphish, hüyange Kedemah.

¹⁶Iman-a jat pen me ni tepu pajeiyong lanne meng; hüyange iman minna yoi chingshao hüyange iman ngoipu nyoijing lante minne tam.

¹⁷Hatüowa Ishmael üyin jin, wangpeng ghoja phei me delüm me nyit laowe ngohyangki; Iye yoi ükümpa lüohe hüyange li, hüyange Iphei pulan phei om.

¹⁸Ishmael huhayimlan Assyriate taipu lam Egypt heongye me, Havilah hei Shur nipa yikeng pongme nyoi. Abraham huhayim ülaolan phei iman yoi yoi ne yanne nyoi.

¹⁹Hatüolan-a Abraham üha Isaac pungao: Abraham, mepu Isaac puh;

²⁰hüyange Isaac wangpeng deli lwngmei ne ngoh wante Iye, Mesopotamia mepu Aramelan Bethuel üha, Laban ünao Rebekah sheko ne yah.

²¹Rebekah me moi yepai hayim yenangpu jingne, yha jingne Isaac-e Youngwanpate yop. Iye yoppute Youngwanpawe jan, hüyange Rebekah püm yekengpe ngai.

²²Yhawe nipet puhlak ne ngoh, hüyange iman wangngai ngeshao memuh, yha sea me imni jawe japhei teihok. Hüwante yhawe i, “Hükih-e üte hanghe ülam jakih-e ngaipu shi?” Tüokhei janpu yahlak jingne Youngwanpa te tongne yha tai.

²³Youngwanpawe yha te i, “Nang nao nyoi me jatnyu ni ngohnang; Nange kahta ükhong ni hokke wepu phei puhlak. Sheja-a japa phei wong shenang she ngohlak. Jeiyongpawe naolipa shao shanlak.”

²⁴Moipailak jingne yha te hipak ngoi, hüyange yhawe naoshe nipet puh.

²⁵Üwangne ngaipupa taakke, püm khongküm pume ümin maayange puh; tüokhei iman-e I min Esau she nyik.

²⁶Tüophei me ni shepupa ngai, hüyange Esau ya-ong me I yakke monge tükyange ngaiyangki; tüokhei Ite Jacob she min. Aope iman puh, Isaac nyupuh wangpeng dewok ngoiteiye ngoh yangki.

²⁷Aope naha ni-a jong; Esauwa meitoipa ütahpa ne, phao hah-e kempute lengpu üyin ne meng; hüpoi Jacobpa-a innenyaiye nokme ngohpu kahta ne meng.

²⁸Isaac-e Esaute ken, hangjingne lye toipu mei hahpu Iye leng; hüpoi Rebekah-e Jacobte ken.

²⁹Nyih japu hipak me Jacob pheang hoi yange ngoh, hüwante Esau phao mepu meikep ne taipu nyaowe le teiye ye.

³⁰Hüyange Esauwe Jacob te i, “Üte tüopa taakpu pheang hoi chingmei lam linge uhtamkhu; hangjingne tao nyaowe le teki.” (Tüokhei I minna Edom).

³¹Jacob-e janne i. “Nange üte nang jeiyongpa nyupuh mothlei üte phaküma-a, taowe nangte tüopa phalak.”

³²Esauwe i, “Leitüoh, tao li ne oteiye ngoh nang; hüyange tao nyupuh mothlei üte hanghe ne menglak?”

³³Jacob-e janne i, “Ü-sheshao me üwangne jieng tüoh.” Hüyange Iye Ite jiengjeppe yoi nyupuh mothlei Jacobte yüo.

³⁴Tüophei me Jacob-e Ite hahying hüyange pheang hoi tümme pha. Hüyange Iye hah yingyange yoi lamte yayonge tai. Hüke Esauwe yoi jeiyongpa nyupuh mothlei te paowe tükpuwa halan ne meng.