Read Konyak Naga KAHTAMYENGHAN 26 Bible Online

KAHTAMYENGHAN 26 - Konyak Naga bible

KAHTAMYENGHAN 26

¹Sha-a tüopa kahtok me, Abraham hipak me üwangpa ngaiyang pu tokte seanyao yenglepu üne-o ngai. Hüyange Isaac Philistia ahngpa Abimelech tangte Gerarte tai.

²Youngwanpa Isaac tangte ngaiye i, “Egypt kahtokte tah tai; Taowe hanghe kahtok me ngohlak jingne nangte i tüoken me ngoh tüoh.

³Tüopa kahtok me nyoitüoh hüyange Tao nang phei ngohlak hüyange nangte moiman tamlak. Taowe tüolan yikeng mong khongkümpu nangte hüyange nang huhayimlante phalak. Taowe nangpa Abraham phei jiengyangpu ütahte ngai tamlak.

⁴Taowe nanghunanghalan wangdang shanhalan kih-e maawe jaluntamlak; hüyange nanghu nanghate tüopa kahtok khongkümpu Taowe phalak. Taowe nanghu-nanghalante moimanpu kih-e imante-o moiman pha she jatlan üsheiye üte tonglak.

⁵Taowe nangte moimanlak, hangjingne Abraham-e ü-ngao jai hüyange ü-ngaokeng hei ngaokhüm jonyangki.”

⁶Tüokhei Isaac Gerar me nyoi.

⁷Aope tüome ngohpu kahtalan-e Ite I shekonyu jeng tong, Iye i, “yha-a ü-nao üja.” Iye yha-a “ü sheko” she lye ilakte nyam-e teih, hangjingne ima-a yha yeonge naoyha mei-e ngoh, tüokhei Rebekah yahlak jingne tüome ngohpu kahtalan-e toi phalak te I yeonge nyam.

⁸Aope Isaac tüoken me hipak lüo-e ngoh, Philistia ahngpa Abimelech-e yoi tawo mepu leiye tai, hüyange Isaac hei Rebekah ni teimeipu nge.

⁹Tüokhei Abimelech-e Isaac te nyik hüyange i, “Leihuyah, yha-a nang shekonyu!” Hüma-a nange hang ne “Yha-a ü-nao she ipu?” Hüyange Isaac-e Ite i, “Hangjingne yha-a ü-sheko she ima-a tao toikülak she taowe teih.”

¹⁰Abimelech-e i, “Nange tomante hanghe linge tampu?” “Ü-kahtalan yo me shejawe nenok shekonyu phei oloh-e shipu ok hah shepu, hüyange nange tomante ümeng pha hah shepu!”

¹¹Tüokhei Abimelech-e kahta üsheite kentingne tam-e i, “Aoyinne tüopa kahta yejema-a Inok shekonyu te yemeipe jonlakei, I üting me li ne tamlak.”

¹²Hüyange Isaac-e tüopa kahtok me ülidei, hüyange tüopa wangpeng me Iye deiyangpu phei gho tokte nyeiye Iye ülick yah, hangjingne Youngwanpawe I moimantam.

¹³I hak, hüyange yelakpe küp om-e moth ma-e ngohpu kahta ne meng.

¹⁴I jing nyee ükhong, hüyange mahu ükhong, hüyange shaoshanpalan üngang ngohpu ngeye Philistia lanne Ite yeonge müktak.

¹⁵Hüyange Abraham shaoshanpalan-e Abraham üyin me ngohwante shaopu yengnung üshei, Philistia lan-e kahtok-e ma-e phünge tam.

¹⁶Tüophei me Abimelech-e Isaac te i, “Toman kahtok mepu taitüoh; hangjingne toman phei shenyei she nang wongnange ngaiteki.”

¹⁷Tüokhei Isaac tüopa nyoi mepu yayonge tai, hüyange Gerar kahjee me nyoi.

¹⁸Hüyange Isaac-e Ipa Abraham hipak me shaopu yengnung nishe shao, hangjingne Abraham li phei me Philistia lanne tüolan phünge tam; hüyange lye yoipawe nyikpu min kih-e muh tüolan yengnung te min.

¹⁹Hüpoi aope kahjee me Isaac jing shaoshanpalan-e yengnung shao, hüyange yeng tüo;

²⁰Gerar nyeeyompalan-e Isaac nyeeyompalan phei tee ngai hüyange i, “Tüopa yeng-a toman jing üja.” Tüokhei Isaac-e tüopa yengnung te “Teepu” she minne tam.

²¹Tüophei me Isaac shaoshanpalan-e ülao yengnung ja shao, hüyange tüopa jingne-o teengai. Tüokhei Iye tüopa min “We ne mengpu” she min.

²²Hüyange tüopa mepu yanne taiye ülao yengnung ja shao, hüyange tüopa jingne iman-e mop ngaipu hango yenang, tüokhei lye tüopa te “Bumei” she min-e tam. Hüyange lye i, “Hangjingne shaapa-a Youngwanpawe tüopa kahtok me ngohlak jingne temante bumei phanang. Teman tüoken me jalunne ngohlak.”

²³Isaac yayong hüyange Beersheba te tai.

²⁴Tüoya I shong te Youngwanpa ngai hüyange i, “Taowa nangpa Abraham Kahwang; nyamme tahngoh; tao nang phei ngohnang. Taowe nang te moiman tamlak hüyange huhayimlan üngang nangte phalak. Ü-shaoshanpa Abraham te Taowe janyangpu jingne moiman tamlak.”

²⁵Tüoken me Isaac-e wümjong ja ling, hüyange Youngwanpa te yop khüm. Tüophei me lye tüoken me yoi nyenok we. Hüyange tüoken me I shaoshanpa lan-e ülao yengnung ja shao.

²⁶Hüwante Abimelech Gerar mepu Ite jampongpa Ahuzzath hei I yoi nyahpong woipa Phikol, yahyange Isaac tangte tai.

²⁷Tüokhei Isaac-e tonge i. “Numan-e üte nu hüyange numan mepu tao yanne teiyang phei te hangne ü-tangte peipu?”

²⁸Iman-e jan, “Sha-a toman-e shingteki hüke nang phei Youngwanpa ngohnang, hüyange teman pa me lahnyik mongkopu teimongpu ja anglak yang she toman-e teihnangki. Teman pa me teijanpu ja linghah;

²⁹Hüke toman-e nangte shaoshi ne yetampu kih-e, hüyange toman-e nangte ümei tokte kaiye hang ümengo yelingpu kih-e, hüyange nang chingmei me yanne teipu kih-e nange toman shaoshi ne yetamlak she nange-o janne tamhu nangki. Youngwanpawe nang te moimanteki she shaapa-a meimei-e shingteki.”

³⁰Tüophei me Isaac-e iman jingne mo ja tüm, hüyange iman-e hah hüyange ying.

³¹Ünenap iman shonge lüowe jaja phei teijiengpu yah, hüyange Isaac-e iman lünge tei, hüyange iman I mepu chingmei me yan.

³²Hüyange tüonyih muh Isaac shaoshanpalan peiye, iman-e shaopu yengnung jeng Ite i, iman-e i, “Toman-e yeng tüoteki.”

³³lye tüopa yengnung te “Shibah ” she min. Tüojing üne tüopa chingnyute tenyih ngoiye Beersheba she nyiknang.

³⁴Aope Esau wangpeng deli lwngmei ne meng, lye Hitlan naoyha ni ngoiye yah. Beeri üha Judith, hüyange Elon üha Basemath;

³⁵hüyange iman-e Isaac hei Rebekah ni üyin jingne khah-e linge tam.