Read Konyak Naga KAHTAMYENGHAN 27 Bible Online

KAHTAMYENGHAN 27 - Konyak Naga bible

KAHTAMYENGHAN 27

¹Aope Isaac wupa ne meng, hüyange I mük pomme hango ye-nge, lye yoiha jeiyongpa Esaute nyik-e Ite i, “Ü-ha!” Hüyange lye jan, “Tao tüome ngoh nangki.”

²Isaac-e i, “Leitüoh, tao wuteki, hüyange tao mamshe li ne ok.

³Sha-a hüma-a, nang wenglah hüyange lahhankhok yahyange phaote taiye üjingne mei toi yekei.

⁴Hüyange taowe lenglakpakih, yeiong shepu hahying tümyange ü-tangte yah-e peikei; taowe hatüo hahyange nangte tao lishao me ükümpa moiman yahpha ning.”

⁵Aope Isaac-e yoiha Esau phei ngao, Rebekahwe jaiye ngoh yangki. Tüokhei, mei toiyange yelak jingne Esau taitephei me,

⁶Rebekahwe yoiha Jacob te i, “Nangjei Esaute nangpawe ngaopu taowe hüke jaiki,

⁷‘Üte phao mei yah-e peiye üjingne jute meipu hahying tümtüoh; taowe hatüo hahyange tao lishao me nangte moiman yahpha ning.’

⁸Tüokhei, ü-ha, taowe nangte ngaopu kih-e ü-ngao jaitüoh.

⁹Sha-a youn ükhong yote wenne tüomepu shenütpu younha ni üte yah peikei; hüyange taowe tüo yahpuwe nangpawe hahhupu kih, I jute meipu hahying I jingne tümshih ning.

¹⁰Hümme nange Ite tüopa hahlak jingne yahwenlak, hüyange I lishao me lye nangte yoi moiman yah phalak.”

¹¹Hüyangpoi Jacob-e yoinyu Rebekah te i, “Leitüoh, üjei Esauwa püm-min nyimpu kahta, hüpoi taowa üsho nyiele-e ngohnang.

¹²Aoweshingpu üpawe üte pomme leikülak, hüyange I sheshao me taowe lowe lampu ne menglak; hüyange taowe ü-nying nyingte moiman nanleiye phoiwümpu kih shonlak.”

¹³Inyuwe Ite i, “Üha, nangte phoiwümpuwa üte shahne tamtüoh, nange ü-ngao hei jaikei, hüyange taiye ü-tangte youn hei yah peikei.”

¹⁴Tüokhei I taiye tüolan phowe Inyu tangte yahpei; hüyange Inyuwe Ipawe hah hupukih, jute meipu hahying ne tüm.

¹⁵Tüophei me Rebekahwe yoiha jeiyongpa Esau jing, nokme angwapu inkhek shemeipupa yahpuwe, yoiha naolipa Jacob te o tüm-e tam;

¹⁶hüyange I yak hei üng me younha sho nyeih-e tam;

¹⁷hüyange yhawe tümpu shemeipu hoi hei an, yoiha Jacob yak me pha.

¹⁸Tüophei me Jacob yoipa tangte wenne i, “Opa!” Hüyange Ipa-e jan, “Tao tüome ngohnang, ü-ha! Nanga aohipa shi?”

¹⁹Jacob-e Ipate jan-e i, “Taowa nangha jeiyongpa Esau. Nange, üte ipu kih-e taowe lingyangki; sha-a chingmei lam linge lüokei, hüyange taowe yah-e peipu hahying hahkei hüyange üte nang moiman phakei.”

²⁰Hüpoi Isaac-e Ihate i, “Nange hatüo hangke iye mamme tüopu, üha?” Iye jan, “Hangjingne Youngwanpa nang Kahwange ütoi me okpu ngene tam.”

²¹Hüwante Isaac-e Jacobte i, “Owe winkhu, taowe nanga ütingme üha Esau jeya she ne jon lei hu ning.”

²²Tüokhei Jacob yoipa Isaac shongte owe wen, Ipawe Ite jonnyao hüyange hüke i, “Ngaowünga Jacob ngaowüng kih, hüpoi yakyin-a Esau yakyin kih pongnangki.”

²³Hüyange Iye Jacob yeshing okpe pong, hangjingne I yak-a Ijei Esau yak kih-e ümin phei ngoh. Shaaji Isaac-e moiman pha eipe jam nishe hüke tong.

²⁴“Nanga ütingme üha Esau a?” “Üm” she Jacob-e jan.

²⁵Isaac-e i, “Üha, mei-a ü-shongte yah wenkei. Taowe tüopa hah phei me taowe nangte moiman yah phaning.” Jacob-e tüopa I shongte yahwen, hüyange Iye yinglak jingne wuwüngti-o peiye tam.

²⁶Hüwante Ipawe Ite i, “Üha, ü-shongte owe wenkei hüyange üte omhüp pha.”

²⁷Jacob Ipa shongte wen hüyange omhüp wante Ipa-e Jacob inkhetlante üpe pelei, tüophei me Iye Ihate moiman pha-e hüke i, “Leitüoh, ü-ha üpe ümei-a, Youngwanpawe moimanpu phao üpe kih-e!

²⁸Kahwange nangte wangdang mepu nyai pha shih, hüyange nangjing kah me, üyao ngai tamshih! Iye nangte ülick hüyange wuwüngti wangmanne pha shih!

²⁹Jatlan-a nang shaoshanpa ne mengshih, hüyange kahtalanne nangte ümme khüm shih. Nang pheipulan üshei tangme nange wanglam lamshih, hüyange nangnyu hayim lanne nang sheshao me ümme khümne tamshih. Aoyinne nangte phoiwüm imante phoiwüm shih, hüyange aoyinne nangte moiman imante moimantam shih!”

³⁰Aope Isaac-e Jacob te moiman pha-e shoyapeih, Jacob Ipa shong mepu nyampu phei jünge tai, hüwante phao mei toi ne tai-e ngohpu Ijei Esau Ipa shongte ngoi pei.

³¹lye-o ju te meipu hahying tümyange Ipa tangte yah-e pei; hüyange Iye yoipate nyik-e i, “Opa, lüokei, nange üte moiman tamlak jingne taowe tümme peipu mei hahkei.”

³²Ipa Isaac-e Ite i, “Nanga ao shi?” Iye jan, “Taowa nangha, nangha jeiyongpa, Esau.”

³³Hüwante Isaac yemeipe nin-ta hüyange tonge i, “Hüma-a aowe mei toiyange ü-tangte pei peih no? Taowe hatüo hah sho hahki hüyange Ite nang peishao me moiman pha tam yangki, hüyange hatüowa I jingne ütingpa moiman ne mengkülak.”

³⁴Aope Esauwe Ipa ngao jai, I yeonge üngwünne khah-e shap, hüyange Ipate i, “O Opa, üte-o nang mepu moiman yahkei!”

³⁵Hüyangpoi Isaac-e i, “Nang naowe lowelamme peiye nang moiman yah taiteki.”

³⁶Esauwe i, “I min ütingpa me Jacob yenyik a? Iye hatüo nishepupa üte lowe tam nang. Iye ü-nyupuh mothlei yah-e tai, hüyange sha-a ü-moiman yahtaiteki.” Tüophei me Iye tong, “Nange üjingne moiman ja nehoi towe ye-angpu a?”

³⁷Isaac-e Esaute janne i, “Leitüoh, taowe I nang nokpu ne menge tamyangki, hüyange I jeihei naolan üshei I rha ne menglak taowe Ite phayangki: hüyange tah hei wuwüngti taowe Ite pha yangki. Sha-a pa-a nang jingne taowe linglak hango yenang, üha!”

³⁸Esauwe Ipate yelakpe yoppe tonge i, “Opa, hüpoi nang me moiman ja nehoi ngohma-a! Opa, üte moiman pha, tao üja, O opa.” Hüyange Esauwe ngao ngaiye shapne wang.

³⁹Hüwante Ipa Isaac-e Ite janne i, “Leitüoh, nang jingne wang mepu nyai yenang lak; Nang jingne üyao pheipu kah yenanglak.

⁴⁰Nang yanglow-e nang üyin ngohlak; Hüpoi nange nang nao shaoshan lak; Tüoyangpoi, aope nange hokkeweye yonglakei, Iye tükke ye-okpe I mepu nang taipu oklak.”

⁴¹Sha-a Ipawe Jacob moiman tampu jingne Esauwe Jacob te nu: hüyange Esauwe yoi mongjang me i, “Üpa lipu jingne shappe yoonglak hipak owe peinang; hüwante taowe ü-nao Jacob toilak.”

⁴²Hüyangpoi aope Esauwe tümpu Rebekahwe jai, yhawe Jacob te nyik-e peiye i, “Leitüoh, nangjei Esauwe nang toilak tümyange I nying nyingke ümok hümnangpu.

⁴³Tüokhei ü-ha, taowe hanghe ilakei tüopa lingtüoh. Mamshe yayonge üjei Laban tangte Haran kahtokte taitüoh.

⁴⁴Hüyange nangjei mongshih ngaipu manmei manmei I phei hipak üten ja ngoh tüoh.

⁴⁵Nangjei nangte mongshihpu mepu manlak manlak, hüyange nange Ite konpu lye manpe manpe ngoh tüoh; ümok hümphei me nyik ne shonne taowe nang tüomepu woiye yelak. Hangne nangni moini nyih ja me jamshe mahne tamlak?”

⁴⁶Rebekah-e Isaac te i, “Taowa Hittite shekolan te hainangki; hüyange Jacob-o tüolan Hit naoyhalan yo mepu ja sheko ne yahma-a, ü-üyin jingne hang meipu ngailak?”