Read Konyak Naga KAHTAMYENGHAN 28 Bible Online

KAHTAMYENGHAN 28 - Konyak Naga bible

KAHTAMYENGHAN 28

¹Hüwante Isaac-e Jacob te nyik, hüyange I moiman tam, hüyange henge i, “Nange Kananlan yo mepu sheko ne tahyah.

²Nangnyu üpa Bethuel nokte Mesopotamia te yayonge taitüoh; hüyange tüomepu nangnyu Ijei Laban hayim yo mepu sheko ja yahtüoh.

³Ütahpa Kahwange nang nok ne mengpute moiman tüoh, hüyange nangte hayimlan üngang phatam shih. Tüo kaiye nanga jatlan maapu üpa ne mengtüoh!

⁴Abraham te lye moiman yangpu kih-e, lye nang hüyange nang huhayimlante moiman shih. Hüyange nange tüopa kahtok, ümeken me nang nyoi yangki hüyange, Kahwange hanghepa Abrahamte pha, tüopa mothlei yahtüoh!”

⁵Hüke Isaac-e Jacob yanne tei; hüyange lye Jacob hei Esau ni ünyu Rebekah Ijei Aramelan Bethuel üha Laban tangte Mesopotamia te tei.

⁶Sha-a Isaac-e Jacob te moiman pha hüyange Paddan-aram mepu I sheko ne yahne shon she Esauwe shinge pei; hüyange Ite moiman phayange Isaac-e hüke, “Nange Kananlan sheko yo mepu sheko ne yeyahlak,” she ipu lye jai.

⁷Jacob-e Inyu hei Ipalan ngao jai hüyange Paddan-aram te tai she lye nge ok.

⁸Tüokhei aope Esauwe Kananlan shekowe Ipa Isaac mongmei ne yetam she nge,

⁹Ishmael tangte Esau tai hüyange yoi sheko üwang ne yahpu ngoh yangpu tokte, Abraham üha Ishmael üha Nebaioth ünao Mahalath yoi sheko ne yah.

¹⁰Jacob Beersheba mepu yayonge Haran yete tai.

¹¹Wanghe nyip wante I nyoijing jate pei ngoi, hüyange tüoya tüome lak; Tüopa nyoi me ngohpu longja lye yahyange I shang jeyange tüome shilak jingne lam.

¹²Hüyange lye mang ja mang, hüyange leitüoh, shai ja kahtok mepu wang ngoiye jan, hüyange leitüoh Kahwang shongmokpalan tüopa me tata ongong she nge!

¹³Hüyange leitüoh, Youngwanpawe tüopa tang me yongyange i, “Tao Youngwanpa nangpa Abraham hüyange Isaac Kahwang; hanghe kahtok me nang lamyange ngohnang tüopa-a Taowe nangte hüyange nanghu nangha lante yahpha ning.

¹⁴Nanghu nanghalan-a kahtoknyu pheih shinne ngailak, hüyange nang wanghe nyipjing, ongjing, apye, hüyange heye ngoiye jalunne tailak; hüyange nang hüyange nanghu nanghalan kaiye kahtoknyu nokphong khongkümpu moimanlak.

¹⁵Leitüoh, tao nang phei ngohnang, hüyange, nang üpukente tailakei Taowe yinlak, hüyange nang ni she tüopa kahtok te woi yelak; hangjingne Taowe nang phei ngaopu manling manling, Taowe nang yetüohlak.”

¹⁶Hüyange Jacob I shipu mepu lao hüyange i, “Üting me Youngwanpa tüome ngohnang; hüyange taowe tüopa yeshingpe ngoh!”

¹⁷Hüyange I nyam hüyange i, “Hatüo nyoi-a hangke nyamlakpa! Hatüowa ülao yeje Kahwang nok, hüyange hatüowa wangdang taten.”

¹⁸Ünenap shonge Jacob shinlüo, I shang jeyange ngohpu long yah, hüyange teihtüolak jingne tüopa-a yongne tam. Tüophei me Kahwangte phünne phawe tüopa tangme olive minnga yeitam.

¹⁹Hüyange lye tüopa kahtok te Bethel she minne tam. Hüpoi tüopa chingnyu min üwangne Luz ngoh yangki.

²⁰Jacob-e Kahwang phei jiengpu ja yah; “Tao yintaipu lamme nange nang ü-phei jamme ngohyange hüyange tao yinne tamma-a, hüyange üte hahying hei inkheklan phama-a,

²¹hüyange tao üpa nokte yinpu okke leih yema-a, hüma-a nanga ü-Kahwang ne menglak.

²²Tüopa teih tüopu long hanghepa taowe yongne tam tüopa nyoi-a nangte yoppe khümpu nyoi ne menglak, hüyange nange üte phapu üshei mepu taowe nangte penphong mepu ja nangte phalak.”