Read Konyak Naga KAHTAMYENGHAN 29 Bible Online

KAHTAMYENGHAN 29 - Konyak Naga bible

KAHTAMYENGHAN 29

¹Tüophei me Jacob yelakpe yoi lamme kemme tai, hüyange wanghe ongjing mepu kahtalan kahtok te pei.

²Hüyange lye nganne leiwante, kahjee me yengnung ja, hüyange tüome nyee-ükhong lüm tüopa ü-o me lamyange ngoh. Hangjingne tüopa yengnung mepu iman-e nyee ükhong te yeng yingne tam. Hüyange yengnung üshapong mepu longa yeonge khaowe ngoh.

³Hüyange aope tüome nyee ükhong khongkümpu jem, nyee yompalan-e longa yengnung mepu nowe yahyange, nyeelante yeng yingne tam-e, longa nishe yoi ngohpu yengnung üsha pongme ang.

⁴Jacob-e nyee yompalante i, “Üjei hei naolan, numan ü-mepu peipu?” Iman-e jan, “Toman Haran mepu.”

⁵Iye tong, “Numan-e Nahor üha Laban shingya?” Iman-e jan, “Toman-e I shingnang.”

⁶Iye iman phei ngaowe i, “I meiye ngohya?” Iman-e i, “Meiye ngohnang ja, hüyange leitüoh, Iha naoyhanyu Rachel nyeelan phei peiküpu!”

⁷Iye i, “Leitüoh, sha-a nyih ning ne ngohnang, yinmoklan ünjemlak hipak manngoi; Nyeehalante yeng yingyange heei uh ne muh yahtei tüoh.”

⁸Hüpoi iman-e i, “Nyeehalan khongkümpu jamshe manjem manjem, hüyange yengnung mepu long nowe winyange nyeelante yeng manying manying toman-e ye-oklak.”

⁹Aope iman phei I yelakpe ngaowe ngoh, yhawe yomme ngohpu Ipa nyeelan phei Rachel peingoi.

¹⁰Aope Jacob-e Inyu Ijei Laban üha Rachel, Iküo nok nyeekhong phei nge, Jacob iman shongte wenne yengnung üsha mepu long nowe winne, Iküo Laban nyee ükhongte yeng yingne tam.

¹¹Hüyange Jacob-e Rachel te omhüp, hüyange mongmei puwe ngao ngaiye shap.

¹²Jacob-e Rachel te i, “Taowa nangpa pheipu Rebekah üha.” Hüwante yhawe phette wenne Ipate i.

¹³Aope Labanne yoi nao üha jeng ngaolan jai, Iye I pongte phette yuwe I me kenyange omhüp, hüyange lye yoi nokte woi in. Jacob-e Labante ngaolan khongkümpu i.

¹⁴Hüyange Labanne Ite i, “Ütingme nang ü-jat ü-li!” Hüyange Jacob I phei lekeng ja nyippe nyoi.

¹⁵Hüwante Laban-e Jacobte i, “Nang üpheipu kheima she, nange jajang jawe ü-shaoshanlak a? Nange nanmee ne hanghe yahhu nangki?”

¹⁶Sha-a Laban üha naoyha ni ngoh; nyayongnyu min Leah, hüyange naolinyu min Rachel.

¹⁷Leah mük lahnyik lakpane ngoh, hüpoi Rachel naoyha meiye hüyange yahhukei-e ngoh.

¹⁸Jacob-e Rachel te ken, tüokhei Iye i, “Nange üte Rachel pha ne ima-a Taowe wangpeng nyit nang shao shanlakei.”

¹⁹Laban-e janne i, “Taowe yha eihate phaleima nangte phapupa shemei; ü-phei ngoh tüoh.”

²⁰Tüokhei Jacob-e Rachel jingne wangpeng nyit shaoshan; tüoyangpoi I jingne tüopa hipak-a nyih üten ja linpu kih hei ling, hangjingne ima-a lye yhate yeonge ken.

²¹Tüophei me Jacob-e Labante i, “Ü-sheko üte yahkei, hangjingne tao yha tangte peilak nyih ngoiteki.”

²²Tüokhei Labanne tüome ngohpu kahta khongkümpu jemne tamyange naoyha poipu mo hah.

²³Hüpoi tüoya Rachel nanleiye Leah Jacob tangte peine tam, hüyange Jacob yhaphei shi.

²⁴(Hüyange Labanne yoiha Leahte shaoshannyu ne yoi rhanyu Zilpah pha.)

²⁵Hüyange napning leiwante nakshih, hatüowa Leah ne ngoh; hüyange Jacob-e Labante i, “Nange üte jonpu hatüowa hanghe shi? Taowe nang phei Rachel jingne shao yeshan a? Hangne nange üte lowelampu?”

²⁶Laban-e janne i, “Nyayongnyu shaome naolinyu phawe teilak toman kahtok me wanglam yenang ja.

²⁷Tüopa naoyha yahpu hat üshao ngoine tamtüoh, hüyange toman-e nangte Rachel yahpha ning; hanghepa jingne nange üne-o ü-phei wangpeng nyit shaoshan lak.”

²⁸Jacob-e hüke monge tüopa hat sho ne tam; hüyange Labanne yoiha Rachel Jacob shekonyu ne Ite pha.

²⁹(Hüyange Labanne yoiha Rachel te shaoshannyu ne yoi rhanyu Bilhah pha.)

³⁰Tüokhei Jacob-e Rachel phei shi hüyange Iye Leah phei-a Rachel te ünyei ken, hüyange lye üne-o wangpeng nyit Laban shaoshan.

³¹Aope Leah phei-a Rachel te shekenpu Youngwanpawe nge Iye yha naonyoi eppe tam; hüpoi Rachel heelangne menge tam.

³²Hüyange Leah püm yekengpe ngai, hüyange yhawe netan moija pai, hüyange yhawe Ite Reuben she min. Hangjingne yhawe i, “Youngwanpawe ü-shaoshi pute lei; sha-a pa-a ü-netanpawe üte kenkülak.”

³³Yha üne-o nishe püm yekengpe ngai, hüyange netan moija pai; hüyange yhawe i, “Hangjingne üte nuteki she Youngwanpawe jai, lye üte hatüo netan naha-o phateki.” Hüyange yhawe I min Simeon she nyik.

³⁴Üne-o yha püm yekengpe ngai, hüyange netanha ja puh; hüyange i, “Shaapa-a ü-netanpawe üte ünyei kenkülak, hangjingne taowe Ite netan naha lüm puhtam teki.” Tüokhei I min Levi she nyik.

³⁵Hüyange üne-o yha püm yekengpe ngaiye, netan ja puh, hüyange yhawe i, “Tenyihpa-a taowe Youngwanpa min yongnang;” tüokhei yhawe I min Judah she nyik; tüophei me yhawe nao puhpu lak.