Read Konyak Naga KAHTAMYENGHAN 3 Bible Online

KAHTAMYENGHAN 3 - Konyak Naga bible

KAHTAMYENGHAN 3

¹Sha-a Youngwanpa Kahwange linge ngaipu phao yinmok üshei phei, pu sheteipupa ne ngoh yangki. Iye shekonyu te i, “Üting me pesha me ngohpu pee hanghe mepu-o tah hah she Kahwange i a?”

²Hüyange shekonyuwe pu te i, “Pesha me ngohpu pelick toman-e hahpu oklak,

³hüpoi hanghepa pee pesha hotan me ngohnang, tüopa pelick tah hah hüyange tahjon, numan-e jonma-a numan lilak, she Kahwange i.”

⁴Hüpoi puwe shekonyu te i, “Nang yelilak.

⁵Hangjingne aope numan-e tüopa hahlakeih, numan mük eplak, hüyange Kahwang kih-e, ümeng ümei shingkülak, she Kahwange shingnang.”

⁶Tüokhei aope shekonyuwe tüopa pee-a hahhu jakke, hüyange müklei me lahnyik lakpa ne, hüyange konnange tamlak ne wao-e nge; yhawe tüopa pelick khaiye ütam hah; hüyange yha-e netanpa te-o ütam pha hüyange lye hah.

⁷Tüophei me imni moini mük ep, hüyange imni pümkeng me ngohnang she shinge pei, tüokhei imni-e phukyak yah-e shingyange imni pümte büang.

⁸Hüyange ünpong hipak ja me pesha me Youngwanpa Kahwang kempu wüng iman-e jai, hüwante kahta hüyange I shekonyu iman nying nyingke Youngwanpa Kahwang ngoikülak te nyam me pesha mepu pee yo me lowe ngoh.

⁹Hüpoi Youngwanpa Kahwange kahta te nyik-e i, “Nanga üpu?”

¹⁰Hüyange lye i, “Taowe pesha me nang ngaowüng jai, hüyange tao nyam, hangjingne taowa pümkeng me; hüyange ü-nying nyingke lopu weih.”

¹¹Hüwante Kahwange i, “Nang pümkeng me ngoh nang she aowe nang te ipu? Taowe nangte hanghe pee mepu tah hah she i, hatüo nange hahpu a?”

¹²Kahtawe jan, “Aohi sheko nange ü-phei ngohlak jingne pha, yhawe tüopa pee mepu ülick üte pha, hüyange taowe hah.”

¹³Hüwante Youngwanpa Kahwange shekonyu te i, “Nange hatüowa hanghe lingpu?” Shekonyuwe i, “Puwe lowelam ne tam, hüyange taowe hah.”

¹⁴Youngwanpa Kahwange pu te i, “Nange hatüo lingyangpu khei, ching yinmok üshei hüyange phao yinmok üshei phei shetahpu phoiwümpu nang te shahlak; seanyu phei nang kahtok te shitte kemlak hüyange nang jin kümme kahmak hahlak.

¹⁵Taowe nang hüyange shekonyu nipa me hüyange nang lila hei yha lila nipa me wepa ne menge anglak; yha üli-e nang shang paitam phalak hüyange nange yha üli ya-ong te jot tamlak.”

¹⁶Shekonyu te lye i, “Taowe nang nao ngohwante shangshih ünyei ngaitamlak; nang shaoshiye nao wangngai ngelak. Hüke ngohyange-o nange nang netanpa yahhuwe laknyikpu ngohlak, hüyange I nang tangme nokpu ne menglak.”

¹⁷Hüyange Adam te lye i, “Hangjing ne nange nenok shekonyu ngao jaiye nang niye tüopa-a tah hah she Taowe nang nite ngaokeng phapu pee mepu hahpu jingne, nang jingne kahtoknyu me phoiwümpu shah nang, nang jin kümme towe nyaiye hahlak tüolak.

¹⁸Phümhuh hüyange amjo nangte ngaitam phalak, hüyange nange phao me ngaipu phümha hahlak.

¹⁹Nang leih-e kahtok ne manmeng manmeng, nang sheta me wanglüm ngaiye hahlak tüolak; hangjing ne nang kahtok mepu yah-e ngai; nang kahtok ngoh nang, hüyange nishe kahtok ne menge mahlak.”

²⁰Adam-e yoi shekonyu min Eve she nyik; hangjing ne yha kahtanyuha üshei ünyu.

²¹Hüyange Youngwanpa Kahwange Adam hüyange Inok shekonyu jingne meisho inkhek lingyange imante innetam.

²²Hüyange Youngwanpa Kahwange i, “Leitüoh, kahta-a teman yo me ja leye, ümeng ümei shing teki; aowe shing, lye yoi yakke üyin pee mepu khai hahyange jinte üyin ngohlak.”

²³Tüokhei Youngwanpa Kahwange hanghe kahtok mepu I yah ngai, tüopa kahtok shao tamlak jingne I Eden pesha mepu taine tam.

²⁴Hüke lye kahta-a jange tei, hüyange Eden pesha heong yeme Cherubim, hüyange üshei ye me lüppe okpu müktishiwa yang ja üyin pee lam yomlak jingne ang.