Read Konyak Naga KAHTAMYENGHAN 30 Bible Online

KAHTAMYENGHAN 30 - Konyak Naga bible

KAHTAMYENGHAN 30

¹Hüpoi Rachel-e Jacobte naha ja nehoi yepuh tam. Tüokhei yhawe yoi nyate müktak; hüyange yhawe Jacobte i, “Üte naha yahkei, hüke yejema-a tao lilakei!”

²Jacob, Rachel te mongshih ngai; hüyange lye i, “Nang mepu naonyoi tükke anglak Kahwang nanleiye tao ngohnang kü a?”

³Hüwante yhawe i, “Hatüo me ü-phongphenyu Bilhah ngoh nang; yha phei shi tüoh; hümme nakshih yhawe üjingne naha puhtam lak. Tüo kih-e yha kaiye tao-o hayimlan tüopu oklak.”

⁴Hüyange yhawe yoi phongphe nyu Bilhah shekone menglak jingne Ite pha; hüyange Jacob-e yha phei shi.

⁵Hüyange Bilhah püm yekengpe ngai, hüyange Jacobte netan ja puhtam.

⁶Tüophei me Rachel-e i, “Kahwange ü-ngao phün, hüyange lye üne-o taowe yoppu jaiye, üte netan ja pha.” Tüokhei yhawe I min Dan she nyik.

⁷Rachel phongphe nyu Bilhah nishe püm yekengpe ngai, Jacobte ni she netan ja puh tam.

⁸Hüwante Rachel-e i, “Ünya phei yeonge yonge toktei yangki, hüyange taowe ok;” tüokhei yhawe I min Naphtali she nyik.

⁹Aope Leah-e shaaji yha nao puhpu lakteki she shinge pei, yhawe yoi phongphe nyu Zilpah yahpuwe Jacobte sheko ne pha.

¹⁰Hüwante Leah phongphenyu Zilphawe Jacobte netan ja puhtam.

¹¹Hüyange Leah-e i, “Ü-shao meiteki!” Hüyange yhawe Ite Gad she min.

¹²Leah phongphenyu Zilpahwe ni shepupa netan naha puhtam.

¹³Hüyange Leahwe i, “Tao hangshin mongmeipu nyu! Hangjingne shekolanne üte mongmei nyu she nyiklak,” hüyange yhawe I min Asher she nyik.

¹⁴Wheat tah yahpu ju me Reuben kahte ta, hüyange moipe tüowe, Inyu Leah tangte tüolan yah-e ong. Hüwante Rachel-e Leah te i, “Chingmei linge nangha jing moipe ütam üte yahkei.”

¹⁵Hüpoi Leah-e yha te i, “Nange ü-netanpa yah taipuwe yewangpu a? Nange ü-ha jing moipe-o yahhu pu a?” Rachel-e i, “Meiteki nangha jing moipe nanlei, nang teya Jacob phei shipu oklak.”

¹⁶Aope ün ngoi, Jacob kah mepu ong, hüwante Leah I pongte yuwe tanne ngoh yange i, “Teya nang ü-tangte peiye shikei, hangjingne ütingme taowe nangha jing moipe nang jingne ümee phayangki,” hüyange tüoya I yha phei shi.

¹⁷Kahwange Leah te jai, hüyange püm yekengpe ngai, hüyange Jacob te nga shepupa netan naha puhtam.

¹⁸Hüyange Leah i, “Kahwange üte ü-nanmee phateki, hangjingne ü-netanpate taowe ü-phongphenyu pha”; hüyange yhawe I min Issakhar she min.

¹⁹Leah üne-o püm yekengpe ngaiye, Jacobte netan wok shepupa puhtam.

²⁰Hüwante Leahwe i, “Kahwange üte hünghao ümei phateki, sha-a ü-netanpa-e üte wangshüm phei anglak, hangjingne taowe Ite hayim wok shepupa puhtam”; hüyange yhawe I min Zebulun she nyik.

²¹Phei me yhawe sheko ja puhtam, yha min Dinah she nyik.

²²Tüophei me Kahwange Rachel teih tüo; hüyange Kahwange yhawe yoppu jai, hüyange yha naonyoi eptam.

²³Yha püm yekengpe ngaiye netan ja puh; hüyange yhawe i, “Kahwange üte netan naha ja phapu kaiye phoiwümpu yahtei teki.

²⁴Hüyange yhawe I min Joseph she nyik; hüyange i, Youngwanpawe üne-o netan ja üte moiman pha.”

²⁵Aope Rachel-e Joseph puh, Jacob-e Labante i, “Tao ü-nyoi hüyange yoi kahtokte tailak jingne tao shonpha.

²⁶Üte ü-sheko hüyange ühalan aoyin jingne taowe nang shaoshan iman yahkei, hüyange tao taine tampha; hangjingne taowe nang hangke shaoshan, nange shingnang.”

²⁷Hüpoi Laban-e Ite i, “Nange mongma-a jaikhu, phonglai hitleipu kaiye taowe hatüo shingteki, hüke Youngwanpawe nang kaiye üte moimanteki;

²⁸nang nanmeelan itüoh, hüyange tüopa taowe nangte yahpha ning.”

²⁹Jacob-e janne i, “Taowe nang hangke shaoshan, hüyange nangjing noksa yinmoklan hangke ü-phei ngoh, hatüo nang nying nyingke shing nang.

³⁰Hangjingne tao manpeipe nang me ngohpu lanna üjingha hei ngohyangki; hüyange hatüo üngang jalunteki; hüyange tao ümpeyekao te lüp, Youngwanpawe nang moiman tam; hüpoi sha-a taowe tenok noksa jingne-a aope linglak?”

³¹Hüyange Labanne tong, “Taowe nangte hanghe phalak?” Jacob-e janne i, “Nange üte hango tahpha kei; taowe phapu juteih te nange mongma-a, taowe nishe nang jing nyee ükhong yomme tampha ning.”

³²Tao tenyih nang jing nyee ükhong üshei linne taishih ning, hüyange tushangpu hei nyanheye nangpu üshei hüyange nyee yo me ünyak khongküm, hüyange youn yo me tushangpu hei nyanhepu üshei tamme ngai phaning; “hüyange tüolan-a üjing nanmee ne menglak.

³³Tao ngaotingpa phei ngoh yang pune mengma-a, phei me nange yamme leiwante oloh-e shinge oklak. Aope nange ü-nanmee jingne tokke leine peilakeih, youn ütam nyanhepu, yejema-a tushang pu yejema-a, nyee ütam ünyak üjepu ngohma-a, tüolan-a kuhyahpu yang she nange shinglak.”

³⁴Labanne jan, “Meiteki! Nange hangke ngao hüke tümniye linglak.”

³⁵Hüpoi tüonyih Labanne nyanhepu yejema-a tushangpu youn ponglan, hüyange youn pi hangshin me nyanhepu hei tushang pu ngoh, yejema-a iman me üheng ngoh tüolan-a khatte ang. Üne-o lye nyee ünyaklan khongkümpu yah ngai, hüyange tüolante paowe tüklak jingne Iye yoi ha angetam;

³⁶I Jacob mepu tüolan nyee ükhong woiyange nyih lüm lamte yanne tai. Towe ngohpu Laban nyee ükhong te Jacob-e paowe tükke yomme ngoh.

³⁷Tüophei me Jacob-e poplar pee, almond hüyange plane pee ühüng üqui mepu shengshaoh yahyange tüopa üsho khokke üheng ngaiye nyanne heye ngaiye ling.

³⁸Hüyange lye pesho khokpu shengshaoh nyeelan yengying jing, yengnung te nyeelan yeng yingne peipu sheshaote shüp. lye tüolan tüome tüoh hangjingne nyee ükhong yengying ne peiwante iman won hüyange üha pah.

³⁹Tüokhei aope pequilan sheshao me üha pah, hüyange iman kamshongpu, üngkampu, hüyange tushangpu omme ngai.

⁴⁰Jacob-e nyee ükhonga younlan phei yoi yoi ne ang, hüyange lye nyee ükhong sheta Laban yinmok ükhong me ngohpu tushangpu, hei ümon ngohpu yekaote lüppe ang. Hükih-e linge lye yoi nyee ükhonga jalunne tam, hüyange Laban jing phei yoi yoi ne yanne ang.

⁴¹Aope nütpu yinmok üpilan-e üli yahlak hipak ngoiyahpeih, Jacob-e shengshaoh iman sheshao me yengte shüp, tüokaiye iman-e shengshaoh shongme üli yahne tam.

⁴²Hüpoi lye shejenthpu yinmoklan sheshao me shengshaoh lanna ye-ang tam. Shonne yengohpe Laban yinmoklanna jienpu ngai, hüyange Jacob jinga nütpu ngai.

⁴³Hüke, linge Jacob yeongpu moth ngohpa ne meng. I me mantoop rhalan, udh hei gado üngang ngoh yangki.