Read Konyak Naga KAHTAMYENGHAN 31 Bible Online

KAHTAMYENGHAN 31 - Konyak Naga bible

KAHTAMYENGHAN 31

¹Sha-a Laban hayimlanne hüke ngaopu Jacob-e jai, “Teman üpa jingne ngohshihpu khongküm Jacob-e yahteki. I jing moth khongkümpuwa teman üpa mepu hei ngaipu ngoh nang.”

²Hüyange shaaji Laban-a üwangye kih-e yejepe Ite ye-i-yeshepu shingpei.

³Hüwante Youngwanpawe Jacobte i, “Nangpa kahtok te, hüyange nang jat hei li tangte leih-e yetüoh hüyange Tao nang phei ngohlak.”

⁴Tüokhei Jacob-e ümeken me I mantooplan ngoh, tüoken kah me Rachel hei Leah ni hüolak jingne ngaolan shon.

⁵Hüyange lye imnite i, “Taowe nangpa sheta üwangpu kih ü-yekaote yeme she taowe ngenang; hüpoi üpa Kahwang ü-phei ngohnang.

⁶Taowe ü-wong khongkümpuwe nangpa shaoshan she, nangni moiniye shingnang.

⁷Tüoyangpoi nangpawe tao lowetam, hüyange ü-nanmee pen me jeilei. Hüpoi Kahwange lye üte ümeng linglak mepu tük.

⁸Hangkih tingme Iye tushangpu mantoop lanna nang nanmee ne menglak she i, hüwante mantoop khongkümpu tushange puh. Hüyange aope nyanhepulanna nang nanmee ne menglak she lye i, mantoop ükhong khongkümpuwe nyanheye puh.

⁹Hüke Kahwange nangpa yinmoklan yahpuwe üte pha.

¹⁰“Üha pahpu nyih hipak me taowe mang ja mang, hüyange üha pahne tampu younponglanna, nyanhepu, tushangpu, hüyange kamme shongpulan taowe nge.

¹¹Hüyange mangme Kahwang shongmokpawe ü-phei ngaowe i, ‘Jacob,’ hüyange taowe i, ‘Tao tüome ngohnang!’

¹²Hüyange lye i, ‘Nang mük wemme leitüoh; yinmok ükhong me ompu youn üpong khongkümpu nyanheye, tushange, hüyange kamme shonge hangjingne Taowe Labanne nangte jonpu üshei ngeteki.

¹³Tao Bethel Kahwang, ümpu nyoi me nange yongpu long me olive minnga shokke tam, ümeken me hüyange üte jiengpu ja yah. Sha-a nang mamshe yayongtüoh, hüyange tüopa kahtok mepu nang puh jing kahtok te leih-e yetüoh.’ ”

¹⁴Hüwante Rachel hei Leah niye Ite i, “Üpa nok me toman meitam yejema-a mothlei lak ngohlak a?

¹⁵lye tomante yinpa kih-e yejon a? Hangjingne lye toman yüotam, hüyange toman yüopu ngin lye jon-e küm.

¹⁶Kahwange toman üpa mepu yahteipu moth khongküm pu-a toman jing hüyange toman hayimlan jing; tüokhei sha-a Kahwange nangte hangheyin ngaowe tam, tüopa lingtüoh.”

¹⁷Tüokhei Jacob, yayongne tüm, I ha hüyange shekonyulan udh tok me shot ne tam;

¹⁸hüyange lye yoiye tamme angpu yinmok khongkümpu, hüyange lye yopu moth khongkümpu, hanghepa lye Mesopotamia me yowe ang, tümyange I shaote kemne tamme Ipa Isaac tang te Kanan kahtok ngoine yayong.

¹⁹Aope Laban, I nyee min khüplak jingne taiteiye ngoh; hüwante Rachel-e Ipa jing peshüo kahwang kuh.

²⁰Hüyange Jacob lowe taine tümpu Labante shingne yetam.

²¹Tüokhei I me nangpu üshei phei I yayong; Euphrates kaiye I yayonge tai, hüyange Gilead phaotang kahmük yete I sheta mee yange tai.

²²Nyihlüm linte phei me Jacob tai mahteki she Labante i.

²³Hüwante lye yoi jeihei naolan I phei woiyange, Jacob tokphei te nyih nyit lamte jange tai; hüyange lye I Gilead kahtang me kemyüo.

²⁴Hüpoi Kahwange Aramlan Laban tangte yaning mangme ngaiye Ite i, “Nange Jacobte ümei jeyah ümeng jeyah yengaolak nang nying nyingke kenting yah.”

²⁵Sha-a Jacob-e Gilead kahtang me yoi nyenok weyange ngohwante Labanne-o I pheipulan phei Gilead kahtang me nyenok we.

²⁶Hüyange Labanne Jacobte i, “Nange hangne üte lowe tampu, hüyange wehok me phopu shekolan kih-e hangne ü-yhalalan phowe teipu?

²⁷Hangjing ne nange üte yengaope ü-mepu lowe lüowe taipu? Nang üte ngaoshihma-a, taowe nanga hoongli mongonge, hüyange kongki wüng phei nyam hei pheam konge lünge teine tamhah shepu!

²⁸Nange üte ü-hulan hei ü-yhalalan te omhüp-e yan ngao ine nehoi yetam. Nange lingpu tüowa üngapa toishao ne mengnang!

²⁹Nangte yemeipe linglak üme wong-ngohnang; hüpoi nangpa Kahwange minya üte ngaowe i, ‘Nange Jacobte ümei jeyah ümeng jeyah yengaolak jingne nang nying nyingke kenting yah.’

³⁰Nang shaaji jamloi nokte yehupu jingne taipu she taowe shing nang. Hüpoi hangne nange tenok jing peshüo kahwanglan kuh ei?”

³¹Jacob-e Labante janne i, “Hangjingne nange nanghalan ü-mepu kange nyieye yahkülak yang she taowe nyamme teih.

³²Hüpoi ütam yak me nange nangjing peshüo kahwanglan tüoma-a, I-a üyin me ngoh ne yetamlak. Hatüo me saki ne toman kahtalan ngohyange nang jing hangheyin ngohkülakei nang nying nyingke leiyah, hüyange hatüowa nange yayah.” Rachel-e Laban jing kahwanglan kuh yah she Jacob-e yeshing.

³³Tüokhei Laban Jacob nyenokte yamlak jingne ong, hüyange Leah nyenokte, hüyange phongphenyu lan nyenokte ong; hüpoi lye yoijing kahwanglan yetüo. Tüophei me I Leah nyenok mepu ngaiye Rachel nyenokte ong.

³⁴Sha-a Rachel-e kahwanglanna yahpuwe udh shotjing phang me ang, hüyange tüolan tangme shot. Hüyange Labanne nyenok khongkümpute pomme lei hüpoi tüolan-a yetüo.

³⁵Hüyange Rachel-e yoipate i, “Tao ü-nokpupa sheshao me yongne ye-okpute nang mong tahmeng; hangjingne lekeng lep iye ngaipu sheko wanglam üme ngaipu jingne ngohnang.” Hüke Iye yam, hüpoi yoijing noksa kahwanglan yetüo.

³⁶Hüwante Jacob mongshih ngai, hüyange Labante mongshih-e ngao; Jacob-e Labante i, “Taowe hanghe ümeng lingpu? Nange ü-tok pheite lahnyikke janglak ne taowe hanghe ngaokeng mengpu?”

³⁷Sha-a nange ütoinan khongkümpute pomme leiyangki, nange nenok toinan üshei mepu hanghe tüo ei? Tüopa-a hatüome ü-kahtalan hei nang kahtalan sheshao me angtüoh; hüyange iman-e tümnipa me ngao phünlak.

³⁸Tao nang phei wangpeng da ngoh yangki; nang jing nyee ünyuwe hüyange youn ünyuwe ühalan yewangpe yepuhtam; hüyange nang nyee ükhong mepu nyee üpong taowe yehahtam.

³⁹Hangkih tingme phao yinmok lan-e nyee ja toilakei, taowe hipak lep iye mahtepu jingne shümme ye. Hatüowa taowe püohpu ne yejeja she ilak jingne taowe tüolan-a nang tangte yah yepei. Wangnyak me jeyah wangngai me jeyah kuhpalanne mahtampu jingne nange üte shümme yene tam.

⁴⁰Hüke nyihninga wanglümpuwe, yaninga wangshümpuwe tao shaoshiye ngoh; hüyange tao phayange ngoh.

⁴¹Hükih-e wangpeng da mongme tao nang phei ngoh. Taowe wangpeng pen me peli nangha ni yahlak jingne nang shaoshan; hüyange wangpeng wok nenok mantoop jingne shaoshan. Hüke ngohyapoi nange ü-nanmee pen me jeileitam.

⁴²Üpa Kahwang, Abraham Kahwang, hüyange Isaac-e nyamlepu ü-phei yengoh shihma-a, ütingme nange taowa shaa-o pümkeng me yanne teiyange ngoh hah shepu! Hüpoi Kahwange ü-shaoshipu hüyange ngange toi lingyangpu nge, hüyange minya nangte teeyangki.

⁴³Hüwante Laban-e janne Jacobte i, “Tüolan naoyhalan-a ü-hayim, imanjing hayimlan-a üjing, hüyange tüolan mantoop üjing. Ine ima-a tüome nange ngepu khongkümpuwa üjingne mengshihpu. Tüoyangpoi shaaji taowe ü-yhalalan hei iman hayimlan tükke angne ye-ok!

⁴⁴Sha-a peikei, teman-e nang hei tao nipa me jiengjeppu linghah, hüyange hatüowa temanpa-me saki ne menglak.”

⁴⁵Tüokhei Jacob-e longja yah hüyange shongja ne yonge tam.

⁴⁶Hüyange Jacob-e yoi kahtalante long shaijem-e tüolan-a phonge anglak jingne i, tüophei me iman-e phonge angpu longnyu shongme nük hah.

⁴⁷Tüopate Laban-e Jegar Sahadutha she nyik; hüpoi Jacob-e tüopate Galeed she nyik.

⁴⁸Laban-e Jacob te i, “Tüopa phonge angpu longnyulan-a tümni moinite teihtüo tampu ja ne menglak.” Tüokhei tüopa nyoite Galeed she nyik.

⁴⁹Laban-e i, “Aope teman jawe jamepu teiyanne ngohlakei, Youngwanpawe lei angpha.” Tüokhei tüopa nyoite üne-o Mizpah she nyik.

⁵⁰“Nange ühalante yemeipe jonpaima-a, yejema-a ü-halan tüohyange ülao shekolan yahma-a, tüopa jeng taowe yeshingpe ngohyapoi, teih tüoyah, teman pa me Kahwange lei ngohnang.”

⁵¹Tüophei me Laban-e Jacobte i, “Teman pa me taowe phonge angpu longnyulan-a hatüo me, hüyange teihtüowe ngohlak longa hatüo me.

⁵²Tüopa long phonge angpu hei teihtüowe yonge tampu long moiniye teihtamlak ngohnang. Taowe aope-o tüopa phonge angpu kaiye nangte shümlak jingne yepeilak, hüyange nango üte shümlak jingne tüopa phonge angpu hei teihtüone angpu kaiye aope-o yepeilak.

⁵³Abraham Kahwang hüyange Nahor Kahwange teman pa me ngao phünlak.” Tüophei me Ipa Isaac-e yoppe khümpu Kahwang min me Jacob-e tüopa teijanpu anglak jingne shangnyak mongkowe jiengpu yah.

⁵⁴Iye yinmoklan toi, hüyange toidopu ja ne Iye kahtang me dopu pha, hüyange Iye yoi kahtalante hahyinglak jingne nyik. Iman-e hahying yang phei me, iman kahtang me püm.

⁵⁵Ünenap shomme Laban shinlüowe yoi hulan hei yoi hayimlan te omhüp-e imante moiman pha; tüophei me Laban yayonge yoi nokte leihyemah.