Read Konyak Naga KAHTAMYENGHAN 32 Bible Online

KAHTAMYENGHAN 32 - Konyak Naga bible

KAHTAMYENGHAN 32

¹Jacob yoi lamme taiwante, Kahwang shongmokpalan ütam I phei hüo.

²Aope lye iman nge, lye i, “Hatüowa Kahwangpa pümtep!” Tüokhei lye tüopa nyoite Mahanaim she nyik.

³Hüyange Jacob-e I shaote Ijei Esau tangte, Edom kahtok Seir yekaote shong shonpalan shon.

⁴lye imante hüke ngaolak jingne nyüoweleiye tam; “Tao Jacob, nang ngao jaiye shaoshanpawe, ü-nokpupa Esaute jaine tamnang, hüke tao Laban phei nyoiye ngoh, hüyange tenyih hei leih yelak ne shonne ngohyangki.

⁵Hüyange üme mahu, gadolan, nyee hei younlan hüyange rhalan she ngohnang; hüyange taowe ü-nokpu phei ngaolak hüyange hüke taowe nang sheshao me shüpshe tüowe okkülak, she shonnang.”

⁶Hüyange shong shonpalan Jacob tangte leihye-e ngaowe i, “Toman-e nangjei Esau tangte ngoi, hüyange leihu, I phei kahta gho peli nangyange nang phei hüolak jingne peküki.”

⁷Hüwante Jacob yeonge mokh hüyange nyamme mongshang. Tüokhei lye I phei ngohpu kahtalan hüyange nyee ükhong, youn, mahu, hüyange udhlan üphong ni ne tam.

⁸lye hüke teih, “Esau peiye üwangpa ükhong te shümme mahne tamküma-a, ülaopa ükhong towe ngohpuwa yinpu oklak.”

⁹Hüyange Jacob-e yop, “O üpu Abraham Kahwang, hüyange üpa Isaac Kahwang, üte jaipha! Youngwanpa, nange üte i, ü-kahtok te, ü-jat ü-li tangte leih yetüoh, hüyange üjingne shemin lamphe meiye tailak jingne nange linge tamlak she i.

¹⁰Nange nang shao shanpa te shüpshe hüyange ngaotingpa hüopu üshei yo me üjoihaja nehoi üjingne yewang. Taowe Jordan kaiwante hango yenang, hüpoi shengshaoh ja hei ngoh, hüyangpoi tenyihpa-a tüopa ükhong ni phei tao leih-e yenang.

¹¹Üjei Esau yak mepu tao yinpha she taowe nangte yoppe tongnang. Tao nyam nangki tomante shümyange shekolan hei nahalan nehoi omme toman khongküm mah tamne peipu jingne nyamnang ki.

¹²Nange üte shemin lamphe meiye tailak hüyange aowe-o ine ye-okpu yengching nah mepu pheih shinne maawe ü-huhayimlan phalak she janyangki.”

¹³Tüokhei tüoya I tüome püm, hüyange Iphei hangheyin ngoh tüolan mepu Ijei Esau jingne Iye hünghao tüm.

¹⁴Youn pi gho ni hüyange pong da, nyee üpi gho ni hüyange üpong da,

¹⁵iman ühalan-o omme düamyeng yingpu udh delüm, mahu ünyu deli hüyange mahu üpong pen, gado üpi da hüyange üpong pen.

¹⁶lye tüolan-a yoi yoi jat ükhongne tam, hüyange ükhong jaja me shaoshanpalan jaja te woine tam. lye imante i. “Ü sheshao te üwangne kemtüoh, hüyange ükhong hei ükhong nipa me nyoijing ngaiye angtüoh.”

¹⁷Üwangpa shaoshanpa te lye ngaowe i, “Aope üjei Esauwe nang phei hüoyange nangte, ‘Nang nokpupa-a ao shi? Hüyange nang hang taiki? Hüyange nang sheshao me ngohpu tüolan-a ao jing? she tonglakei,’

¹⁸hüwante nange itüoh, ‘Tüolan-a nang rhapa Jacob jing; lye tüolan-a yoi nokpupa Esaute peiye tampu hünghao: Jacob I-o toman tokphei me ngohnang.’”

¹⁹lye hüke muh ni shepupate, lüm shepupate, hüyange yinmok ükhong woipu üsheite ngaowe i: “Numan-e Esau phei hüowante hüke hei moilanne itüoh.

²⁰Numan-e, ‘üting üja, nang shaoshanpa Jacob-a toman tokphei me ngohnang,’ she iyah.” Hangjingne Jacob-e teih, “Taowe ü-sheshao me taipu hünghaowe I mongshih ngaipu toloimei ne ok, hüyange tüophei me taowe I sheta ngelak; aoweshing lye tao yahpu okkülak.”

²¹Tüokhei lye hünghaolan-a I shaote taine tam, hüyange I pa-a tüoya pümtep me ngoh.

²²Tüoya muh Jacob lüoyange, yoi sheko ni, hüyange phongphenyu ni, hüyange I halan penme ja woiyange Jabbok yengyin yengtienjing kaiye tai.

²³lye iman woiyange yengyin kaiye shon, hüyange hüke I me nangpu khongkümpu shon.

²⁴Jacob I shaha lakke ngoh. Hüwante kahta ja pei, hüyange wangngaipu te yüowe I phei seata.

²⁵Aope kahtapawe Jacob yenao oklak ne nge, lye Jacob yungte hep; hüyange Jacob yung faine tam.

²⁶Hüwante kahtawe i, “Tao taishih ning, hangjingne wang ngaiküki.” Hüpoi Jacob-e jan-e i, “Nange üte moiman yepha küma-a taowe nang taine yetamlak.”

²⁷Kahtawe tong, “Nangte hangke minpu?” Iye jan, “Jacob.”

²⁸Hüwante kahta-e i, “Nang min shaaji Jacob she yenyiklak, hangjingne nange Kahwang hüyange kahta phei toktei, hüyange okteki; tüokhei nang min-a Israel she nyiklak.”

²⁹Tüophei me Jacob-e Ite tonge i, “Chingmei lam linge nang te hangke minpu üte ipha.” Hüpoi lye janne i, “Nange hangne ü-min shinghupu?” Tüophei me lye Jacobte moiman tam.

³⁰Jacob-e i, “Taowe Kahwang sheta me teihüowe ngeteki, hüyange tao üyin memuh ngohnang.” Tüokhei lye tüopa nyoite Peniel she min.

³¹Peniel tüohyange Jacob taipu phei jam jamshe wanghe ong, hüyange yungfaipu jingne I fai faishe kem.

³²Tüokhei tenyih ngoiye Israel huhayimlanne yungkeng (üpong) ühak (mei) yehah. Hangjingne tüopa yung ühak pongme Jacob te shette tam.