Read Konyak Naga KAHTAMYENGHAN 33 Bible Online

KAHTAMYENGHAN 33 - Konyak Naga bible

KAHTAMYENGHAN 33

¹Jacob-e nganne leiwante, kahtalan gho peli phei Esau peipu nge. Tüokhei lye yoi halan Leah hei Rachel hüyange phongphe nyulan yo me tam.

²lye phongphe nyu hüyange iman hayimlan sheshao yeme üwangne, tüophei me Leah hüyange yha hayim, hüyange Rachel hei Joseph üshei phei ükümpa ne ang.

³Hüyange I iman shao yete wen, hüyange Ijei shongte owe peiwante lye yoi nying nyingke nyit me kahtok te khuh tawe khüm.

⁴Hüpoi Esauwe I phei hüolak jingne phette wen, hüyange Ite üngme künyange, omhüp; hüyange imni moini shap.

⁵Aope Esauwe I mük wemme lei hüyange shekolan hei nahalan nge, lye i, “Nangphei ngohpu tüolan-a aoyin shi?” Jacob-e janne i, “Üyongpa, nang shaoshanpate Kahwange shüpsheye phapu hayimlan üja.”

⁶Tüophei me phongphe nyulan yoi hayimlan phei kem pei hüyange khuhtawe khüm;

⁷hüke muh Leah hei yha hayimlan kem pei, hüyange ükümpa me Joseph hei Rachel kem pei hüyange khuhtawe khüm.

⁸Esauwe tong, “Taowe hüoyangpu ükhong tüolan lili-a hanghe te leppu?” Jacob-e janne i, “Hatüowa nang mepu shüpshe tüolak nanjing ne shon shihpu!”

⁹Hüpoi Esauwe i, “Ünao, ü-meo wangmanne ngoh nangki; nang me ngohpuwa nangjingne muh angtüoh.”

¹⁰Jacob-e janne i, “Tah, taowe nangte yoppe tongnang; taowe sha-a nang sheshao me shüpshe tüopu ne mengma-a, ü-hünghao ü-yak mepu yahtepha. Hangjingne ü-jingne-a nang sheta ngepuwa Kahwang sheta ngepu shinne ngohnang; sha-a nange tao monghah-e yahteki.

¹¹Chingmei lamlinge ü-hünghao hanghepa nang tangte yah peinang, yahtepha she taowe nangte yoppe tongnang; hangjingne Kahwange üte shüpshe jontepuwe, ü-wongpong üshei üte phawe ngohnang.” lye manyah manyah Jacob-e kang; hüke lye Ite yoppedopu jingne lye yah.

¹²Tüophei me Esauwe i, “Teman yayongne tümhah; hüyange tao nang shaote kemkü ning.”

¹³Hüpoi Jacob-e janne i, “Ü-nokpupawe shingnang, nahalan wong yenang, hüyange ü-phei ngohpu nyee ükhong hei mahu ükhong iman düamyeng hüppu ühalan jingne taowe teihne ngainang; hüyange iman nyih ja jingne nehoi kange kemne tamma-a yoi yoi ükhong ngohpu khongkümpu likülak.

¹⁴Ü-nokpupa, nang shaoshanpa mepu üwangne kemkei; hüyange tao monglaowe ü-phei ngohpu tampu yinmoklan-e kempu phei shuwe, hüyange nahalan-e kempu phei shuwe, woiyange taowe ü-nokpupa tangte Edom kahtang manngoi manngoi peiküning.”

¹⁵Tüokhei Esauwe i, “Hüma-a taowe sha-a ü-phei ngohpalan ütam nang phei tüohpha ning;” Hüpoi Jacob-e janne i, “Hatüowa wongpongne min ngai ja, nang shüpshe tüolak te hei taowe lenge teihnang.”

¹⁶Tüokhei Esau tüonyih-a Edom yete taipu lamnyute leih-e ye.

¹⁷Hüpoi Jacob Succoth yete tai; ümeken me Iye yoi jingne nok ja we hüyange lye tampu yinmoklan jingne panha ja we; tüojing ne tüopa ching min Succoth she nyik.

¹⁸Mesopotamia mepu I leih yewante ütuh ümeng yehüope Kanan kahtok Shekhem chingnyute Jacob ngoi; hüyange chingnyu ü-o mepu kah ja me yoi pümtep ling.

¹⁹Iye tüopa kah-a Shekhem üpa Hamor huhayimlan mepu khüm ngin ükhüw gho ja phayange shak.

²⁰Tüoken me lye wümjong ja linge ngai, hüyange tüopate El-Elohe-Israel she min.