Read Konyak Naga KAHTAMYENGHAN 34 Bible Online

KAHTAMYENGHAN 34 - Konyak Naga bible

KAHTAMYENGHAN 34

¹Nyih ja, Jacob hei Leah ni üha yhala Dinah, iman ngohpu yenghoi mepu Kanan shekolan phei waone tai.

²Aope tüopa yenghoi Hivite ahngpa Hamor üha Shekhem-e yha nge, Iye yha te lük pho hüyange kange toimeng ling.

³Hüyange lye Jacob üha sheko-ha Dinah te yeonge nyak kenne teih, hüyange yhate yohkah.

⁴Tüokhei Shekhem-e Ipa Hamorte hüke i, “Tüopa naoyha ü-sheko ne peitam pha.”

⁵Sha-a Jacob-e I sheko-ha Dinah-a Shekhem-e nu-shak-e tamteki she jai, hüpoi Iha netanha lan-a inok tampu yinmoklan phei kah me ngoh, tüokhei iman manongpu mongme Jacob-e ngao yengaipe nün-e tan.

⁶Shekhem üpa Hamor-a Jacob tangte I phei ngaolak jingne pei.

⁷Hüke muh Jacob hayimlan-o kah mepu ün ong. Aope iman-e tüopa jeng jai, iman mokh-e yashan hüyange mongshih ngai; hüyange Jacob ühate kange toimeng lingpu kaiye Israel kahtalan te wüotüo shehai ne tampu ne ngohyangki.

⁸Hüpoi Hamorwe iman phei ngaowe i, “Üha Shekhem nenok naoyha te nyak kenne mahteki. Chingmei lamlinge yha-a I phei nokne mengne tamkei.

⁹Toman phei matatongningpu ngohlak; numan yhalalan tomante yahkei, hüyange numan jingne toman yhalalan yayah.

¹⁰Tüophei me numan-o toman kahmük tüome toman phei nyoipu oklak; numan-e ümeken me nyoihu tüoken me, pheeileih-e, hüyange toinyu nanha tüowe numan-e mongpupa kih nyoipu oklak.”

¹¹Hüyange Shekhem-e Dinah üpa üjeilante ngaowe i, “Numan sheshao me tao shüpshe tüone tampha, hüyange numan-e hangheyin üte ilakei, hatüo taowe numante phalak.

¹²Sheko jingne yhamee hüyange hünghao numan-e mongpu kih yupha, hüyange numan-e üte hangke ilakei taowe jailak; naoyhanyu hei nyemnya ne menglak jingne üte yahkei.”

¹³Shekhem-e iman ü-nao Dinahte wüotüone tamyangpu jingne, Jacob hayimlanne Shekhem hei Ipa Hamor nite lowelampu yeme janne ye.

¹⁴Iman-e imni te i, “Toman ünao sho yekhüppu kahtate phalak-a toman-e ye-oklak; hangjingne hatüowa toman jingne wüolakpa.

¹⁵Hüpake lingküme hei toman-e mongne ok, hüke numan toman kih-e mengne, numan netan khongkümpu üshokhüp tüoh;

¹⁶tüome nakshih toman-e mata ne menglak jingne monglak. Numan yo me toman chingnyoilak hüyange numan phei jat ja ne menge ngohlak.

¹⁷Hüpoi toman-e ngaopute numan-e yemong hüyange shoyekhüp küma-a, toman-e yha yahlak hüyange yayonge tailak.”

¹⁸Tüopake teingaowe tümpuwa Hamor hei Iha Shekhem niye meijange teih-e pei;

¹⁹hüyange hanghepa juteih phayangki tüopa linglak mepu naoshepawe shonne yengoh; hangjingne lye Jacob üha te loishe ken. I nok noksa kahtalan üshei yo me I ütahpa ne ngoh yangki.

²⁰Tüokhei Hamor hei Iha Shekhem ni iman chingnyu peten pongme chingjempu nyoite pei hüyange yoi chingshao kahtalan phei ngao:

²¹“Hatüo kahtalan toman phei teishinge meiye ngohnang; teman phei teman kahtok me chingmei me kemme yonge hüke iman minnyoiyah. Kahtok-a iman jingne wangmanne ngohnang. Teman-e iman jing yhalalan yah hah hüyange teman yhalalan-o imante hüke nok ne menge tamhah.

²²Hüyangpoi iman shokhüppu kih-e temane-o teman netanlan khongkümpuwe shokhüp küm-e hei hatüo kahtalanna teman kahta ne hüyange teman phei chingnyoiye ngohlak jingne monglak she inang.

²³Iman jing yinmok ükhong hüyange iman jingne ngohshihpu shemin lamphe khongküm teman jingne yemenglak a? Tüokhei iman-o teman phei jam-e nyoi oklak jingne teman-e monghah.”

²⁴Chingnyu mepu nyupuh kahtalan khongkümpuwe Hamor hei Shekhem niye hanghe juteih pha tüote monge yah, hüyange netanlan khongkümpu chingnyu peten kaiye ongpulan üshei shokhüp.

²⁵Nyih lüm shepupa me, iman maa üne-o manmeipe ngoh wante, Jacob hayim Dinah Ijei Simeon hei Levi ni, yoi yanglow jonyange lowe chingte onge netan khongkümpu toi.

²⁶Iman-e Hamor hei Iha Shekhem ni-o omme toi; tüophei me Shekhem nok mepu Dinah woiyange taimah.

²⁷Toilang yang phei me Jacob hayim ülaolan ngaiye iman ünao wüotüone tamyangpu phuh hahpu ne chingnyu mepu shemin lamphe panne yahtai.

²⁸Iman-e imanjing nyee ükhong hei mahu ükhong hüyange gado ükhong chingnyu me ngohpu hei kah hei phao me ngohpu khongkümpu yahtai.

²⁹Iman-e toinyu nanha khongkümpu yah, shekolan hei nahalan khongkümpu phowe yahyange nok me ngohpu shemin lamphe kiyange tai.

³⁰Hüwante Jacob-e Simeon hei Levi nite i, “Numan-e ü-tang me shangshih yah peitam nangki. Sha-a Kananlan, Perizzlan, hüyange kahmük me ngohpu moilanne üte nulak. Ü-phei kahtalan meiyange yenang, iman khongkümpu ü-phei tüi-e ja ne shüppe shayange üte shümme peima-a, teman noksalan nopu mahtam phalak.”

³¹Hüpoi iman-e jan-e i, “Toman-e toman ünaowa phwngngam nyu kih-e jonne yetamlak.”