Read Konyak Naga KAHTAMYENGHAN 35 Bible Online

KAHTAMYENGHAN 35 - Konyak Naga bible

KAHTAMYENGHAN 35

¹Kahwange Jacob te i, “Bethel te yayonge taitüoh, hüyange tüoken me chingnyoi tüoh. Tüoken me Tao, Kahwang aohipa nangjei Esau sheshao mepu nang phette taiwante nang tangte ngaiyangki, tüopate wümjong ja lingtüoh.”

²Tüokhei Jacob-e yoi noksalan hüyange I phei ngohpu khongkümpu te i, “Numan yo me ngohpu mihjat kahwanglan phei yantüoh, numan nying nyingke jao shayah, hüyange inkhek jeilei yah.

³Teman tüo mepu yayonghah hüyange Bethel te tailak, ümeken me taowe Kahwang aowe tao shaoshi wante üte jam pong hüyange aohipa ümeken te tao tailakei tüoken üshei me ü-phei ngoh, Ite taowe wümjong ja linge tamlak.”

⁴Tüokhei iman-e Jacob te iman yak me ngohpu mih jat kahwanglan üshei hüyange iman na me ngohpu naju shaiye pha. Hüyange Jacob-e tüolan-a Shekhem ü-o me ngohpu longkhampee phang me muwe tüoh.

⁵Aope Jacob hüyange I hayimlan yayonglak jingne ükong wang, neikonne ngohpu chingshao kahtalan khongkümpu te Kahwang mepu nyampu üyong ja peine tam, hüyange chingshao kahtalan-e imante jange yewoi.

⁶Jacob yoi kahtalan khongkümpu phei Kanan kahtok me ngohpu Luz, hanghepa te shaawan Bethel she nyik tüote peingoi.

⁷Hüyange Iye tüome khümjing ja lingyange, tüopa kahmükte El-bethel she nyik; hangjingne Iye Ijei mepu phette taiwante tüoken me Kahwang I phei ütahte ngai.

⁸Hüyange Rebekah te paonyu Deborah li, hüyange yha Bethel heye phang me ngohpu longkham pejüng me mu. Tüokhei tüopa te “Shappe yoongpu Longkhampee” she min.

⁹Aope Jacob Mesopotamia mepu leihye, Kahwange nishe I tangte ngai, hüyange Ite moiman tam.

¹⁰Kahwange Ite i, “Nang minna Jacob she ngohyangki; hüpoi sha-a me peiye nangte-a Israel she minnang. Tüokhei Kahwange I min Israel she nyik.

¹¹Hüyange hayimlan maawe ngaitüoh; jatlan nang mepu jalunlak, hüyange nanga ahnglan pajeiyong ne menglak.

¹²Taowe hanghepa kahmük Abraham hüyange Isaac nite pha, nangte phanang, hüyange taowe hatüowa üne-o nang phei me nangjing huhayim lante phalak.”

¹³Tüophei me Kahwang I phei ngao ngohpu taimah.

¹⁴Jacob-e I phei Kahwange ngaopu nyoi me teihtüolak jingne long shongnyu ja yonge ang; hüyange tüopa tangme Iye wuwüngti hei olive minnga shokke jaowe tam.

¹⁵Tüokhei Jacob-e tüopa nyoite Bethel she min.

¹⁶Jacob hüyange Inok noksawe Bethel tüoh, hüyange aope iman üne-o Ephrath ngoine ütenja nanjing ngohwante, nao wangngai ngelak jingne Rachel te hipak ngoipei, hüyange yha yeonge shaoshi.

¹⁷Aope yhate dak ongpu loishe yemeipe tayapeih, naopainyuwe yhate i, “Rachel, nyamme tahteih; hatüowa üne-o naoshe ja ngaiküki.”

¹⁸Hüpoi yha nyai-e ta hüyange nahate Benoni she min pha-e tüohyange yha lüomah; hüpoi Ipawe nao min-a Benjamin she nyik.

¹⁹Aope Rachel li hüyange Ephrath te taipu lamnah me yha mang mu.

²⁰Hüyange Jacob-e yha mangjong ken me teihtüopu longja yonge tam; hüyange tenyih ngoiye tüopa-a Rachel mangjong long she ngoh nang.

²¹Jacob yelakpe yayonge tai, hüyange Eder daonok jayekao me yoi lakjing nok ling.

²²Aope Jacob (Israel) tüopa kahtok me nyoi ngoh yapeih, Bilhah, Ipa phongphe nyulan yo me ja phei Reubenne toimeng ling. Jacob-e tüopa jeng jai, hüyange yeonge mongshih ngai. Sha-a Jacob-e Iha pen me ni-a hüke tüoyangki.

²³Leah kaiye puhtampulan: Reuben (Jacob-e üwangne puhpu ha) Simeon, Levi, Judah, Issakhar, hüyange Zebulun.

²⁴Rachel hayimlan, Joseph hei Benjamin.

²⁵Rachel shaoshannyu Bilhah hayim: Dan hei Naphtali.

²⁶Leah shaoshannyu Zilpah hayim: Gad hei Asher. Tüolan-a Jacob hayim, aoyin Mesopotamia kahmük me Ite puhtam.

²⁷Hüyange Jacob, Ipa Isaac tangte Hebron ü-o me ümeken me Abraham hei Isaac nyoingoh, tüoken Mamre te tai.

²⁸Sha-a Isaac nyupuh wangpeng gho ja phei me detet ngoh yangki.

²⁹Hüyange puyong wupa ne menge li; hüyange Iha Esau hei Jacob niye I mang mu.