Read Konyak Naga KAHTAMYENGHAN 39 Bible Online

KAHTAMYENGHAN 39 - Konyak Naga bible

KAHTAMYENGHAN 39

¹Sha-a Joseph-a Egypt te yahtai, hüyange Pharaoh phang me ngohpu yompa üshangpa Egypt kahta Potiphar-e Ishmael lan mepu shak.

²Youngwanpa-a Joseph phei ngoh, hüyange I-a toi okpu kahta ne meng; I-a Itepu nokpu Egyptlan nok me ngoh.

³Itepu nokpuwe Youngwanpa-a Joseph phei ngohnang she nge, hüyange I yak-e lingpu üshei me Youngwanpawe moiman tam.

⁴Potipharwe Ite yeonge monghah, tüokhei yoi shaoshanpa ne linge tam; tüokhei Iye I-a yoi noksa hüyange Ime nangpu shemin lamphe tepu yakjongpa ne linge tam.

⁵Aope nyih me wange I nok hüyange Ime nangpu, üshei tangme Joseph yakjongpa ne mengtam, tüome peiye Joseph jingne Youngwanpawe Egyptlan nok me moiman; hüyange inok hüyange kah me, hanghe ngoh üshei tangme Youngwanpa moimanngoh.

⁶Tüokhei I me nangpu üshei Potipharwe Joseph yak me paowe tükne tam; hüyange hahyinglak tokte kaiye, Joseph yak me ngohpu toinan jingne nokpuwe hangte-o mongshange yeteih. Sha-a Joseph-a pümta wange hüyange naoshe meiye ngoh.

⁷Tüone menge I nokpu shekonyuwe Joseph waowe lei hüyange hüke i, “Ü-phei shihah.”

⁸Hüpoi lye yemong hüyange nokpunyu te i, “Leitüoh, tüopa nokme hanghe toinyu nanha ü-phei ngoh nang ü-nokpuwe yeshing, lye yoi toinyu nanha khongkümpu tangme tao yakjongpa ne ang.

⁹Tüopa nok me wanglam lamlak jingne Ime ngohpu shinne üme wong ngoh nang; hüpoi üte yephapuwa nang hei ngoh nang. Hüma-a hangke taowe tüopa nushakpu üyong jonne Kahwangpa phei tüi-e hangke ünu omlak?”

¹⁰Hüke yhawe nyih jeih she Joseph phei ngaoyapoi, lye yha phei shinleng te onglak hüyange yha phei shilak yemong.

¹¹Hüpoi nyih japu hipak me aope Joseph yoi toishao linglak jingne noksate ong; hüwante nokme ngohpu shaoshanpalan ao-o noksa me yenangpe ngoh.

¹²Yhawe Joseph phakshaoh ülao (inkhek) me tükyange, “Kei, ü-phei shinleng te onghah,” she i. Hüpoi Joseph yoi phakshaoh yha yak me tüohyange, nokshaote phette yu.

¹³Hüyange aope Joseph-e yha yak me I phakshaoh tüoyange noksa mepu phette tai, she nge ok,

¹⁴yhawe yoi noksa shaoshanpalan nyik-e jemyange i, “Hatüote leitüoh! Tüopa Hebrew ü-netanpawe nokte yahpeipuwe temante yaoleye tamnang. I ü-tüpte ong hüyange üte kange jonne ngang, hüpoi taowe okpu shinne üngwün.

¹⁵Hüpoi aope taowe üngwünpu hüyange waopu lye jai, lye yoi phakshaoh ü-phei tüohyange, nokshao te phette tai.”

¹⁶Joseph tepu nokpupa manpei manpei yhawe I jing phakshaoh yha phei ang.

¹⁷Hüyange yhawe Ite tüopa ngao ja muh hüke i, “Nange yahpeipu tüopa Hebrew rhapawe ü-tüpte onge üte naoyamyangki.

¹⁸Hüpoi aope taowe waowe üngwün, ü-phin me I phakshaoh ange tüohyange I nokshaote phette tai.”

¹⁹Aope I tepu nokpupawe yoi shekonyu mepu ngao “Nang shaoshanpawe üte hüke jonne pai” she ipu jai, I mongshihpu loishe ngai.

²⁰Hüyange Joseph nokpupawe I pho, hüyange ümeken me ahngpawe phopalan angnang, tüopa küpnok me I ang. I tüoken küpnok me ngoh.

²¹Hüpoi Youngwanpa Joseph phei ngoh, hüyange Ite shüpshe, hüyange küpnok yompate kenne tam.

²²Hüyange küpnok yompawe küpnok me ngohpu phopalan khongkümpu Joseph yak me angtüoh; hüyange iman-e tüome hangheyin ling, tüo lili me Joseph woipa ne linge tampu ngoh yangki.

²³Tüone menge Joseph yak me hanghe ngoh, tüowa küpnok yompawe hangte-o yelei, hangjingne I phei Youngwanpa ngoh; hüyange lye lingpu üshei me Youngwanpawe okpu ngene tam.