Read Konyak Naga KAHTAMYENGHAN 4 Bible Online

KAHTAMYENGHAN 4 - Konyak Naga bible

KAHTAMYENGHAN 4

¹Tüophei me Adam yoi shekonyu Eve phei mei, hüyange yha püm yekengpe ngai. Yhawe Kain puh, hüyange i, “Youngwanpawe jampu kaiye taowe Kain tüoteki.” Tüokhei yhawe Ite Kain she min.

²Tüophei me yha-e Inao Abel puh. Sha-a Abel nyeeyompa ne hüyange Kain-a kahhampa ne meng.

³Hüyange hipak ngoiwante Kain ne kahtok me lickpu Youngwanpa tangte dopu yahpei.

⁴Abelwe-o I jing nyee ükhong me üwangne puhpu lan hüyange tüolan yo mepu, üyao pheipulan yah-e pei. Abel hüyange lye dopu te Youngwanpa monghah.

⁵Hüpoi Kain hüyange lye dopu te Youngwanpa mong yehah. Tüokhei Kain-a mongshih ngai, hüyange I sheta meng.

⁶Tüojingne Youngwanpawe Kain te i, “Hangne nang mongshih, hüyange sheta mengpu?

⁷Nange khakshupu lingshih ma-a, yeyah hah shepu a? Hüpoi nange yeshupe lingpu ne mengma-a, nang tafün shongme ünuwe ümme tannang; hatüowe nang tangte onghu nang; hüpoi nange hatüo tükke oklak wongpong.”

⁸Tüophei me Kain ne Inao Abel te i, “Kah yete tümni taihah.” Hüyange aope imni kah me ngoh, Inao Abel phei tüi-e Kain yong, hüyange I toi.

⁹Hüwante Youngwanpawe Kain te i, “Nang nao Abel üpu?” lye janne i, “Taowe yeshing, Tao ü-nao yompa a?”

¹⁰Hüwante Youngwanpawe i, “Nange hang lingpu? Nang nao iy-e kahtok mepu üte üngwün nang.

¹¹Hüyange sha-a hanghepa kahtok-e nang yak mepu nang nao iy yahlak jingne ju ka, tüopa kahtok mepu nangte phoiwümpu angtam nang;

¹²Nange kahtok hamme ülick ngaine lingyapoi sha-a me peiye kahtok-e yoi mepu nangte hango yengai tamlak; kahtoknyu me nang ching taipa hüyange wa-e kempa ja ne menglak.”

¹³Hüyange Kain-e Youngwanpa te i, “Hatüowa üjingne yenün oklak shaoshi üyong yang.

¹⁴Leitüoh, nange tenyih tao tüopa nyoi mepu jange teinang; hüyange nang sheta mepu tao büange tamnang; hüyange kahtoknyu me tao chingtaipa ja hüyange wa-e kempa ne menglak; hüyange aowe tao ngelakei lye tao toikülak.”

¹⁵Hüpoi Youngwanpawe Ite i, “Hüke yeje! Aohipawe Kain toilakei, Ite nyit me phuh hahlak.” Hüyange ütamme I ngeye toi külak yang she Youngwanpawe Kainte minsang ja angetam.

¹⁶Hüyange Kain Youngwanpa sheshao mepu yanne tai hüyange Eden heong Nod kahtok me ngoh.

¹⁷Kain ne I sheko phei mei, hüyange yha püm yekengpe ngai hüyange Enokh puh; hüyange Iye chingnyu ja ling, hüyange hatüote Iha min me Enokh she nyik.

¹⁸Hüyange Enokh me Irad puh; hüyange Irad-a Mehujael üpa; hüyange Mehujael-a Methushael üpa; hüyange Methushael-a Lamekh üpa.

¹⁹Lamekh me sheko ni ngoh; ja min Adah, hüyange ülaonyu min Zillah.

²⁰Adahwe Jabal puh; I-a nyenok me ngohpu hüyange ching yinmok tampalan pajeiyong ne meng.

²¹Hüyange Inao min Jubal, I kongki hüyange viwo jonpalan pajeiyong ne meng.

²²Zillahwe Tubal-Kain puh; aowe shakphan yan hüyange yanne yaopu ngouyang yaopa ne meng; hüyange Tubal-Kain ünao naoyha Naamah ne ngoh.

²³Lamekh-e Inok shekonyu ni te i: “Adah hei Zillah, üte jaiyah; Numan Lamekh shekolan, taowe hanghe i, jaitüoh; hangjingne üte mako satepuwe taowe kahta ja, hüyange üte yaklepu jingne naoshe ja taowe toiyangki.

²⁴Kain te phuh nyit me hahma-a, ütingme Lamekh te denyit me nyit me phuh shümlak.”

²⁵Hüyange Adam-e yoi shekonyu phei üne-o mei hüyange yhawe moija pai, hüyange I min Seth she nyik, hangjingne yhawe i, “Kain ne toiyangpu Abel nanlei üte Kahwange üli ülao ja pha.”

²⁶Hüyange Seth te-o netan nahaja puh-e tam; hüyange lye I min Enosh she nyik. Tüo hipak me kahtalanne Youngwanpa min nyikne ükong wang.