Read Konyak Naga KAHTAMYENGHAN 41 Bible Online

KAHTAMYENGHAN 41 - Konyak Naga bible

KAHTAMYENGHAN 41

¹Tüo phei me wangpeng ni linyang phei me Egypt ahngpa I Nile Yengyin nah me yongyange mang;

²hüyange leitüoh, Nile yeng mepu shüpshepapu hüyange nütpu mahu nyit ngaiye phümha yo me hüng hah-e ngoh.

³Tüophei me ülao mahu nyit, nunu shepu hüyange jienpu, iman pheite Nile mepu ngai, hüyange ülaolan phei jamme Nile yengnah me yong.

⁴Hüyange nunushepu, jienpu mahu lanne shüpshepapu shenütpu mahu nyit-a hahtai. Hüwante ahngpa shinyang.

⁵I üne-o shi-e ye, hüyange ülao mang ja mang. Hüke, tahpe ja me tahlick üjüoh üjüoh ümei nyit ngai.

⁶Hüyange leihu, tüopa phei me, phantephei hüyange wanghe ongjing wangyange phanne tamyang phei tahpe nyit ngai.

⁷Hüyange tüolan üphanlanne üjüoh üjüoh ümei nyit-a hah-e lünge tai. Tüophei me ahngpa shinyang hüyange leihu, hatüowa yaning shinmang ne ngoh.

⁸Tüokhei napning I yaha me toloi yemei ok; hüyange Egypt kahtok me ngohpu yepahipa, hüyange shinge manpalan nyiklak jingne lye shonne tei. Iye imante I mangyangpu iye tam. Hüpoi naoshe jawe nehoi Ite tüolan Iye tampu yenang.

⁹Hüwante wanjonpa üshangpawe ahngpa te i, “Taowe püoh pienyangpu yang she tenyih taowe teih peinang.

¹⁰Hipak ja me hahying lingpa ütahpa tom nite Ahngpa mongshih ngai, hüyange tomni-a yompa ütahpa nok küpnok me phowe ang.

¹¹Yajame muh tomni moiniye mang japong mang, hüyange mang me-a leppu yoi yoi ne ngoh yangki.

¹²Hüyange yompa woipa shaoshanpa, Hebrewlan naoshe ja tomni phei ngoh; tomni-e Ite yoi yoi mang iwante, Iye tomni mang yoi yoi phei shupu lüppe i.

¹³Hüyange Iye tomnite hangke lüppe i, hüke ütingme ngaiyangki; taowa üwangne ngohpu toishao temuh yah yene tam, hüpoi anlingpa shümpa-a toine tam.”

¹⁴Hüwante ahngpawe Joseph woi peilak jingne shon, hüyange iman-e küpnok longsa mepu I mamshe yah-e ngai; hüyange I shang linyange, inkhek jeilei yange, ahngpa shongte woi pei.

¹⁵Hüyange ahngpawe Ite i, “Taowe mang ja mang, hüyange tüopa leppu iye okpa ao-o yenang; nange-a mang lüppe inang she nang jeng taowe jaiyang ki.”

¹⁶Hüwante Joseph-e ahngpate janne i, “Tüopa-a taowe oklakne yeje, Nang üyongpa! Hüpoi Kahwange khakshupu lüppe tampu yah phalak.”

¹⁷Hüwante Ahngpawe Joseph te i, “Leihu, ü-mangme tao Nile yengyin nah me yongyange ngoh yangki.

¹⁸Hüyange mahu nyit, nütpu hüyange shüpshepapu Nile mepu ngai hüyange phümha yo me hüng hah;

¹⁹Tüophei me ülao mahu nyit shange jienpu hüyange nunushepu iman pheite ngai, hükihpu lanna taowe Egypt kahtok üshei ye me aope-o mannge;

²⁰Hüyange jienpu nunushepu mahu nyit-e üwangne ngaipu mahu shenütpu nyit-a hahmah.

²¹Hüpoi iman-e tüolan hah taiyapoi yehah taipu kih hei nge; hangjingne iman üshongpu kih hei, nunu she ngoh yangki. Tüophei me tao shinyang.

²²Nishe tao shi ye, taowe üne-o mangme tahpe ja me tahlick maawe meipu nyit ngaiye nge;

²³hüyange leihu tüopa phei me, wantepu, ükeng, hüyange heong wangyange heapyang phei tahpe nyit ngai;

²⁴hüyange tahpe üphanlanne tahpe ümei nyit-a hahmah. Hatüo mang taowe yepahipa lante i; hüpoi üte tüopa lüppe ipa ao-o yenang.”

²⁵Hüwante Joseph-e ahngpate i, “Mang moinite leppuwa ja hei yang. Kahwang lye hanghe linghu nang tüopa jeng ahngpate ngao yangki.

²⁶Shenütpu mahu ümei nyit-a wangpeng nyit, hüyange tahpe ümei nyit-a wangpeng nyit; moini me leppuwa ja hei.

²⁷Hüyange iman phei me ngaipu mahu üjient hüyange nunushepu nyit-a wangpeng nyit; hüyange wanghe ongjing wangyange menge tampu phantephei tahpe nyit-a wangpeng nyit; wangpeng nyit mongme seanyao yenglelak.

²⁸Taowe ahngpa sheshao me ngaopu ngaowa; Kahwange mamshe hanghe linghu nang; hatüo ahngpate hüo yangki.

²⁹Leihuyah, wangpeng nyit mongme Egypt kahtok üshei yeme hahying wangman-e ngailak.

³⁰Hüpoi tüolan phei me wangpeng nyit seanyao yenglepu ngaikülak; hüyange Egypt kahtok me moimanpu hipak-a pemahlak; hüyange seanyao yenglepuwe kahtoknyu maalak;

³¹hüyange seanyao yenglepu peipu kaiye kahtoknyu me lintepu hipak me maawe ngoh yangpu jeng ye-i-okpe ngailak; hangjingne seanyaopuwa yeonge loilak.

³²Hüyange ahngpa te mang ülam ni me mangne tam, hangjingne Kahwange ngao hatüowa tümme tan; hüyange Kahwange hatüo mamshe peine tamkülak.

³³“Sha-a tüokhei wange ngoiye teih okpu, hüyange shinge manpu kahta ütam ahngpawe yamme Egypt kahtok me shot ne tamtüoh.

³⁴Nange üne-o ülao shaoshanpalan letüoh, hüyange tüolan kaiye Egypt kahtok me moimanpu wangpeng nyit mongme ngaipu üphong nga meitam ahngpawe shaine tamtüoh.

³⁵Hüyange iman-e, tüolan wangpeng ümei me hahying khongkümpu yo ne tamtüoh, hüyange hahyinglak jingne ahngpa ngaokeng me, chingshao khongkümpu me tah yowe angyange yom ne tamtüoh.

³⁶Tüokhei Egypt kahtok me peine ngohpu nyaolak wangpeng nyit jingne bung me hatüowa yowe angküme, nyao lewante kahtoknyu yemahlak.”

³⁷Tüopa juteih phapuwa Pharaoh hei I shaoshanpalan khongkümpuwe meinang she monge yah.

³⁸Pharaohwe I shaoshanpalan te hüke i, “Kahwang yaha ngohpu hatüo kahta kihpu teman-e ülao tüolak a?”

³⁹Tüokhei Pharaohwe Josephte i, “Kahwang ngao tüolan khongkümpu nangte hüo, hüma-a nangkihpu juteih wang ngoipu hüyange shingemanpu ao-o yenang;

⁴⁰taowe nanga ü-kahmük me nokpu ne menge tamnang, hüyange üpin-nyuha khongkümpuwe nangte nyamlelak, hüke ahngpa shotjing me hei tao nang phei üyongpa ne mengkü ning.”

⁴¹“Sha-a taowe nanga Egypt kahtok nopu tangme Governor ne letam nang.”

⁴²Tüophei me ahngpawe yoi yak mepu ahngpa füosang pheipu shüptet yahyange Joseph yaklan me lange tam, nye ükhai pheipu phakshaoh ülao shaohtam, hüyange üngme hon yük yükke tam;

⁴³hüyange lye yoi nishepupa woipa ne tongtoi me I shotne tam; hüyange iman-e I sheshao me “Ümmekhüm tüoh, ümmekhüm tüoh ” she üngwün. Hüke Joseph-a Egypt kahtok nopu me Governor ne mengne tam.

⁴⁴Ahngpawe Joseph te i, “Taowa ahngpa, hüyange nang ye-ompe Egypt kahtok khongküm pume aowe-o yak jeyah, ya jeyah yepolak.”

⁴⁵Hüyange ahngpawe Joseph te Zaphenath-Paneah she nyik; hüyange On mepu ngengpa Potiphera üha Asenath Joseph te sheko ne yahtam.

⁴⁶Egypt ahngpa toishao te aope yuyapeih, Joseph wangpeng delüm lwngmei ne ngoh yangki. Hüyange Joseph, ahngpa sheshao mepu yayong Egypt kahtok üshei yete kem pong.

⁴⁷Juwan meipu wangpeng nyit mongme kahtok-e wangmanne ülick lick-e tam,

⁴⁸hüyange Egypt kahtok me wangpeng nyit mongme ngaipu tah mepu Joseph-e shaijemme, chingnyu lili me yo ang; Chingnyulan neikonne ngohpu kahmepu ngaipu hahying khongkümpu lye yowe ang.

⁴⁹Hüke Joseph-e yengching pheih kih-e tah yowe ang, jamloi she ngohpu jingne hatüo ipu ye-ok, hüke tüoh.

⁵⁰Seanyao yenglepu wangpeng manpei pe On mepu ngengpa, Potiphera üha Asenath kaiye Joseph me netan naha ni tüo.

⁵¹Joseph-e üwangpa ha min Manasseh she nyik. Hangjingne, lye i, “Kahwange ü-shaoshi yangpu üshei hüyange üpa nok khongkümpu pemah ne tam.”

⁵²Nishepupa min lye Ephraim she nyik, “Hangjingne tao shangyangpu kahtok me Kahwange tao ülick maatam.”

⁵³Wangpeng nyit Egypt kahtok me moiman wangmanne ngaipu üküm ngoiye pei;

⁵⁴hüyange Joseph-e iyangpu kih-e, wangpeng nyit nyaolene ükong wang; hüyange kahtok üshei yeme nyaole; hüpoi Egypt kahtok üshei yeme hahying ngoh yangki.

⁵⁵Aope Egypt kahtok üshei me kuimah, Egyptlan-e ahngpa te üngwünne hahying yu: tüokhei ahngpawe iman üsheite i, “Joseph tangte taitüoh; lye hanghe ilakei tüopa jaiyah.”

⁵⁶Tüokhei aope kahtoknyu nopu me nyaowele; Joseph-e bung khongkümpu epyange, Egyptlante tah yüo; hangjingne Egypt kahtok me nyaolepu jamloi wongnange ngoh yangki.

⁵⁷Tüophei jamme kahtoknyu nopu tah shaklak jingne Egypt kahtokte Joseph tangte pei; hangjingne kahtoknyu nopu me nyaolepu jamloi ngoh yangki.