Read Konyak Naga KAHTAMYENGHAN 42 Bible Online

KAHTAMYENGHAN 42 - Konyak Naga bible

KAHTAMYENGHAN 42

¹Aope Jacob-e Egypt kahtok me tah ngohnang she shinge pei, lye yoi hayimlante i, “Numan-e hangne ja ja sheta teileiye ngohke?”

²“Leihuyah, Egypt kahtok me tah ngohnang she taowe jainang; numan tüote ta-e teman jingne tah shak-e ongkei; tüome nakshih teman yelipe üyin me ngohlak yang.”

³Tüokhei Joseph I jeilan naoshe pen Egypt kahtok te tah shak ne ta.

⁴Hüpoi Jacob-e, Joseph ünao Benjaminpa-a I jeilan phei yeshon, hangjingne tapu lam me wengtuh ütam I ha tang me pei pha ma she I nyam.

⁵Hüke tah shakne peipu ülao lan phei Jacob hayimlan-o pei, hangjingne Kanan kahtok me seanyao yengle ngoh.

⁶Sha-a tüopa kahtok me Joseph-a Governor ja ne ngoh, hüyange nük-a/tah-a Iye yüopu ne ngoh. Hüyange Joseph Ijeilan I shongte wen hüyange khuh-e ta-e khüm.

⁷Aope Joseph-e iman ngeyapeih I jeiheinaolan yang she yeong mei-e shing, hüpoi Iye imante yinhünglan te ngaopu kih-e yeong menge ngao. Iye tong, “Numan ümpu mepu peipu shi?” Iman-e jan, “Kanan kahtok mepu tah shaklak jingne toman pei ke.”

⁸Hüke Joseph-e Ijeilan shinge okyapoi, iman-e I yeshing ok.

⁹Hüyange Joseph-e iman jengme mangyangpu yoi shinmang teih tüo. Iye imante i, “Numan-a kuhshükpalan; toman kahtok ümeken me we yompu wong yenang leiye tüoh ne numan peinang.”

¹⁰Iman-e Ite janne i, “Yeje, üyongpa!” “Nang rhapalan-a hahying shaklak jingne peipuweih.

¹¹Toman khongkümpu üpa ja hayim; toman-a ngaoting ipu kahtalan; üyongpa, toman-a kuhshükpalan ne yeje.”

¹²Hüpoi Iye imante i, “Yeje ja, numan-e toman kahtok ümeken me wong yenang leiye tüohne peinang.”

¹³Hüpoi iman-e i, “Üyongpa, toman jeiheinao pen me ni, Kanan kahtok me ngohpu kahta ja hayim; hüyange leihuyah, toman yo mepu ükümpa üpa phei ngohnang, hüyange ja-a yenang.”

¹⁴Hüpoi Joseph-e imante i, “Taowe hangke i, hüke numan-a kuhshükpalan.

¹⁵Tüokhei tüopa kaiye numan toklak: ahngpa üyin me ngoh tepuwe inang, numan ünao ükümpa tüome woi yepeima-a, hüma-a numan tüomepu yetailak.

¹⁶Numan yome sheja leih yetüoh, ükümpa woi peikei, hüyange numanpa-a tüome phowe ange tanlak, tüome nakshih numan ngao üting hei üleih shinglak. Hüke yelinglakne mengma-a ahngpa üyin me ngohtepuwe inang, numan-a ütingpa me kuhshükpalan.”

¹⁷Tüophei me lye iman jamme nyihlüm ngoiye küpnok me phowe ang.

¹⁸Nyih lüm shepupa me Joseph-e imante i, “Taowa Kahwang te nyampu kahta ja, hüyange numan-e ülam ja hüke lingma-a taowe numan üyin yintamlak.

¹⁹Numan-e ipuwa ngaoting üja she hüolak jingne numan jeihei naolan yo me she ja tüopa küpnok me tüotüoh: hüyange numan nok me seanyao jingne tah yah-e yetüoh.

²⁰Hüyange numan-e numan naokümpa ü-tangte woi taikei, hüwante numan ngao ngaoting ne mengkülak, hüyange taowe numan li ne yetamlak.” Hüyange iman-e hüke linglak te monge yah.

²¹Hüyange iman-e jawe jate teingaowe i, “Teman ünao jingne ütingme püoh-e ngohnang, hangjingne Iye temante jamlak jingne yeonge tongwante, I mongjang paipu teman-e nge ngoh yangki; I ngao yejai, tüokhei tüopa shaoshi teman tangte sha-a peinang.”

²²Hüwante Reubenne i, “Nahate yak tah yu she taowe numan te i, hüpoi numan-e yejai. Tüokhei sha-a, I iy temante leih yenang.”

²³Iman-e hanghe i, Joseph-e shinge ngoh, hüpoi iman ngao lye shing nang she iman-e yeshing, hangjingne ima-a iman-e I phei ngao lüppu phei hei ngaowe ngoh yangki.

²⁴Hüwante Joseph iman mepu lüppe tai hüyange shap; aope I shaphuleihpu lak üne-o I iman tangte leihye yange ngao. Iman yo mepu Simeon lye shuwe yah, hüyange iman sheshao me lye sha ne tam.

²⁵Tüophei me Joseph-e iman nyekhok me tah tümne tamyange, hüyange kahta lili nyekhok me yoi ngin nyekhok-o leih phayange, lamme hahlak tümme phatüoh she ngaokeng pha. Hüyange hüke imante ling.

²⁶Imanjing gadolan me iman-e shakpu tah tümme ki ne tam, hüyange iman yayong.

²⁷Hüyange yaning iman lakjing me iman yo me shejawe yoi gado te tahjan phalak jingne nyekhok lanwante, yoi ngin nyekhok-a nyekhok üjupong me ngohpu tüo;

²⁸hüwante jeihei naolante lye i, “Ü-ngina leih-e phapu yang.” Leihuyah, ngin-a ünyekhok üjupong me ngoh nangki. Tüokhei iman-e ninne, yashanne, teingaowe i, “Kahwange temante hanghe lingtampu!”

²⁹Aope Kanante iman üpa Jacob tangte ngoi, imante hanghe ngai khongkümpu iman-e Ite i:

³⁰“Hüke Egypt kahtok nokpuwe tomante yemeipe loishe ngao, hüyange kahmük jingne kuhshükpalan she nyik.

³¹Hüpoi toman-e Ite i, ‘Toman-a ngaoting ipalan, toman-a kuhshükpalan ne yeje;

³²toman jeihei naolan pen me ni, üpa ja hayim; ja-a yenang, hüyange ükümpa naoshe-a sha-a Kanan kahtok me üpa phei ngoh nang.’

³³Hüwante tüopa kahta, kahmüktepu nokpuwe tomante i, ‘Numan-a ngaoting ipalan ne jema-a tüo kaiye taowe shinglak, numan jeihei naolan yo me ja ü-phei tüoyange numan nok me seanyao jingne tah yah-e yetüoh.

³⁴Numan yo mepu ükümpa nao ü-tangte yah taikei. Hümme nakshih taowe numan-a kuhshükpalan yeje, hüpoi ütingpa kahtalan she shinglak. Taowe numan ünaowa numante phawe yelak, hüyange numan-e tüome ngohyange pheeileih-e ngohpu oklak.’ ”

³⁵Tüophei me aope iman-e tah nyekhok shokke ngai, kahta lili-e yoi nginshop yoi yoi nyekhok me ngohpu tüo; tüokhei iman hüyange iman üpawe nginshop ngeye nyam.

³⁶Hüyange iman üpa Jacob-e imante i, “Numan-e taowa hayimlan khongküm mahne tamyange angne ipu a? Joseph yenang, Simeon-o yenang, hüyange sha-a Benjamin-o numan-e woi teihunang; tüo lili üte la-e yongpu ngoh nang.”

³⁷Hüwante Reuben-e ipate i, “Taowe Benjamin yah yeyema-a nange üha ni toi winpu oklak. Tüokhei I-a üte phakei, hüyange taowe nang tangte I woi yekülak.”

³⁸Hüpoi Jacob-e i, “Ü-ha-a numan phei yetailak; hangjingne Ijei liteiye I shaha ngoh nang; numan taipu lamme lye wengtuh ütam hüoma-a, mongmeng phei ü-shang shaowe numan-e tao yimching te shonlak.”